STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI Il-Gvern jafferma l-impenn tiegħu favur qafas legali robust għall-intrapriżi soċjali

B’reazzjoni għad-dikjarazzjoni tax-Shadow Minister għas-Self-Employed, l-Intrapriżi Żgħar u l-Koperattivi, Michael Piccinino, il-Gvern jixtieq jafferma u jassigura li l-Abbozz li jemenda l-Att dwar l-Intrapriża Soċjali kien ippreżentat fil-Parlament f'Marzu 2026, u sussegwentement ġie ppubblikat fil-Gazzetta tal-Gvern ix-xahar ta' wara. Il-passi li fadal huma sempliċiment kwistjoni ta’ proċedura parlamentari.

Dan il-proċess ma setax jitkompla minħabba li l-Parlament ġie xolt minħabba l-Elezzjoni Ġenerali.

L-Att dwar l-Intrapriża Soċjali jeħtieġ il-ħatra tar-Regolatur qabel ma jidħol fis-seħħ. Wara l-iżviluppi fis-settur inħass li kienu meħtieġa aktar emendi għall-implimentazzjoni tal-Att.

L-Oppożizzjoni dan tafu. Din inżammet aġġornata dwar il-ħidma li qed titwettaq mal-partijiet ikkonċernati matul il-proċess kollu.

Il-Gvern jibqa’ impenjat li jimplimenta qafas kredibbli u robust għall-intrapriżi soċjali — wieħed li jagħti ċertezza lill-operaturi, jipproteġi l-integrità tat-terminu “intrapriża soċjali”, u jiżgura li dan is-settur ikun jista’ jkompli jikber b’mod serju, trasparenti u sostenibbli.