STQARRIJA MILL-MINISTERU GĦALL-POLITIKA SOĊJALI U L-FAMILJA Ippubblikat ktieb immirat biex jagħti sapport lil tfal f’kura alternattiva

Il-Fondazzjoni għas-Servizzi ta’ Ħarsien Soċjali (FSWS) ippubblikat ktieb għat-tfal bl-isem ta’ ‘Kannella’, miktub minn Angie Farrugia Ellul, kap fi ħdan id-Direttorat għall-Kura Alternattiva. Dan il-ktieb huwa ntiż sabiex joħloq aktar għarfien u jibgħat messaġġi pożittivi lit-tfal li jesperjenzaw kura alternattiva. 

L-istorja ssegwi l-vjaġġ ta’ Kannella minn esperjenzi ta’ telf, bidla u fejqan, u se tgħin lit-tfal f’kura alternattiva jifhmu aħjar l-emozzjonijiet diffiċli, filwaqt li tiġi enfasizzata l-importanza tal-empatija, l-appoġġ u s-sens ta’ appartenenza. 

Għat-tnedija tal-ktieb kien hemm preżenti wkoll il-Ministru għall-Politika Soċjali u l-Familja, Michael Falzon li tkellem dwar kif dan il-qasam jingħata importanza kbira mill-Gvern sabiex kull tifel u tifla jgawdu mill-istess opportunitajiet. Huwa faħħar lid-Direttorat għall-ħidma tiegħu u li ttieħdet din l-inizjattiva biex jiġi ppubblikat dan il-ktieb. Ħabbar li l-qligħ minn dan il-ktieb ser imur għal tfal li bħalissa qed jgħixu fid-djar residenzjali tal-Kura Alternattiva.

Waqt it-tnedija ssemma’ wkoll kif it-trobbija tat-tfal hija meqjusa bħala waħda mill-aktar fażijiet sensittivi u importanti tal-ħajja u hija fażi li tħalli impatt estensiv fuq il-kumplament tal-iżvilupp personali ta’ dik il-persuna. Permezz tad-Direttorat tal-Kura Alternattiva, f’każijiet fejn it-tfal ma jkunux jistgħu jibqgħu jgħixu mal-ġenituri bijoloġiċi tagħhom għal diversi raġunijiet, jingħataw ambjent alternattiv u sigur, imħabba u trobbija xierqa. 

Madanakollu, minkejja l-ambjent adattat li jmorru jgħixu fih, ħafna drabi dawn it-tfal jaffaċċjaw emozzjonijiet diversi, mistoqsijiet u ħsibijiet dwar il-futur tagħhom. Għaldaqstant dan il-ktieb ser ikun qed jgħin f’dan ir-rigward.

L-awtriċi tal-ktieb u l-Kap tad-Direttorat tal-Kura Alternattiva, Angie Farrugia Ellul, spjegat kif din l-istorja ħelwa u terapewtika tesplora t-trawma fit-tfulija, in-niket u l-qawwa tal-fejqan li joħroġ mill-empatija u mis-sens li tappartjeni. L-istorja hija mmirata lejn tfal ta’ 7 snin ’il fuq, tgħin lit-tfal żgħar u lill-ġenituri jew lill-kustodji tagħhom jagħtu tifsira lill-emozzjonijiet sabiex isibu t-tama wara t-telfa.