STQARRIJA MILL-MINISTERU GĦALL-INKLUŻJONI U L-VOLONTARJAT Imniedi proġett ta' St John Ambulance and Rescue biex isaħħaħ is-salvataġġ fl-ilma

Taħriġ għal 140 voluntier, vettura ġdida ta' salvataġġ u kampanja edukattiva għal aktar minn 400 student

L-għaqda volontarja St John Ambulance and Rescue (SJAR) nediet proġett li permezz tiegħu se ssaħħaħ il-kapaċitajiet ta' 140 voluntier fis-salvataġġ fl-ilma, filwaqt li se tkun mgħammra b'vettura ġdida ta' salvataġġ u twettaq kampanja edukattiva li se tilħaq aktar minn 400 student. Il-proġett sar possibbli wara li l-SJAR ibbenefikat minn għotja ta' €20,000 mill-iskema VOPS immexxija mill-Kunsill Malti għas-Settur tal-Volontarjat fi ħdan il-Ministeru għall-Inklużjoni u l-Volontarjat.

It-tnedija tal-proġett saret mill-Ministru għall-Inklużjoni u l-Volontarjat Julia Farrugia waqt attività li ttellgħet minn St John Ambulance and Rescue, li fiha tat dimostrazzjoni ta' salvataġġ ġo pixxina. Il-voluntiera ta' din l-għaqda jingħataw taħriġ regolari fl-ilma sabiex jinżammu l-ħiliet li wieħed ikollu bżonn meta jkunu qed jiġu offruti servizzi ta' lifeguard kemm fuq l-art u anke fuq il-baħar. Dawn is-servizzi jikkumplimentaw dawk fl-oqsma tas-salvataġġ fuq l-art, tifi tan-nar, salvataġġ minn postijiet għoljin, l-ewwel għajnuna u dixxiplini oħra relatati ma' emerġenza li din l-għaqda tħarreġ kemm lil voluntiera kif ukoll lill-pubbliku inġenerali fihom.

Permezz ta' dan il-proġett SJAR se tiffinanzja materjal edukattiv u Rapid Rescue Vehicle (RRV) speċjalizzata li se jservu biex tingħata edukazzjoni fost it-tfal għas-sigurtà fl-ilma u tkun ta' appoġġ għal sejħiet ta' emerġenza. Il-proġett se jsaħħaħ il-kapaċitajiet tal-140 voluntier ta' SJAR biex jissalvagwardjaw is-sigurtà pubblika waqt li jkattru l-kultura ta' prevenzjoni u l-għarfien dwar il-prevenzjoni u l-kura relatata ma' sitwazzjonijiet li jistgħu jinqalgħu fl-ilma.

Bejn dan ix-xahar u Settembru li ġej, St John Ambulance and Rescue se tkun qed twassal kampanja ta' għarfien dwar is-sigurtà tat-tfal meta jkunu fl-ilma, bl-isem ta' Young Lives Safe Shores. Il-kampanja se tkun mifruxa f'sessjonijiet interattivi li jittellgħu fl-iskejjel, speċjalment dawk matul is-sajf, u ċentri taż-żgħażagħ li se tkun qiegħda tilħaq 'il fuq minn 400 student. Il-kampanja hija maħsuba biex tgħallem lit-tfal kif għandhom jirreaġixxu ħdejn u fl-ilma u kif għandhom iwieġbu f'każijiet ta' emerġenza. Parti mill-investiment f'dan il-proġett, grazzi għal VOPS, se tmur ukoll għall-pubblikazzjoni ta' ktejjeb edukattiv, li t-tfal ikunu jistgħu jieħdu magħhom anke fid-djar sabiex l-għarfien ikompli anke fid-djar mal-kumplament tal-familja.

Is-sessjonijiet għandhom l-għan li jnaqqsu l-inċidenti, li jistgħu jkunu fatali, permezz ta' involviment prattiku relatat mal-età tal-parteċipanti. L-RRV se tkun mgħammra b'apparat mediku essenzjali biex tkun salvata l-ħajja tal-persuna u apparat li jagħmilha possibbli biex l-SJAR tkun tista' tkompli tgħin u tassisti aktar lid-Dipartiment tal-Protezzjoni Ċivili (CPD) u lill-Awtoritajiet dwar is-Saħħa waqt il-qadi ta' dmirijiethom. Il-vettura se tintuża wkoll waqt is-sessjonijiet ta' taħriġ biex it-tfal ikunu wkoll esposti għal apparat ta' salvataġġ. L-għan ta' dan l-involviment dirett tat-tfal waqt is-sessjonijiet ta' taħriġ huwa biex jagħmilhom aktar konxji.

Il-Ministru Julia Farrugia qalet li “dan il-proġett ikompli jibni fuq il-ħidma tal-Gvern favur aktar prevenzjoni u edukazzjoni dwar is-sigurtà fl-ilma. Proprju għalhekk bdejna kampanja nazzjonali ta' tagħlim tal-għawm għal tfal ta' bejn it-3 u l-5 snin, għax nemmnu li l-għarfien u l-ħiliet miksuba minn età bikrija jistgħu jsalvaw il-ħajjiet." Hija rringrazzjat lil St John Ambulance and Rescue u lill-voluntiera tagħha għad-dedikazzjoni tagħhom, u saħqet li din l-inizjattiva tkompli ssaħħaħ l-edukazzjoni u l-prevenzjoni fil-komunità. Il-Ministru sostniet li l-appoġġ permezz tal-iskema VOPS juri l-impenn tal-Gvern li jkompli jinvesti fis-settur volontarju u f'inizjattivi b'impatt pożittiv fil-komunità.

Min-naħa tiegħu Mauro Pace Parascandalo, Kap Eżekuttiv tal-Kunsill Malti għas-Settur tal-Volontarjat, qal li huwa dejjem ta' sodisfazzjon li tara proġetti finanzjati minn fondi tal-Kunsill, bħalma hija l-iskema VOPS, jieħdu l-ħajja.

Christopher Borg Cardona, Kummissarju għall-Operat fi ħdan St John Ambulance and Rescue, saħaq fuq il-fatt li skemi bħal VOPS jagħtu lil għaqda bħal SJAR dak is-sapport sabiex jiġi estiż iktar l-involviment fil-komunità. Huwa qal li permezz tal-vettura l-organizzazzjoni se tkun tista' toffri iktar servizzi relatati mal-ilma u l-baħar, li jikkumplimentaw dawk li diġà qiegħda tagħti f'emerġenzi fuq l-art, bħalma kienet is-sitwazzjoni bi Storm Harry fil-bidu ta' din is-sena u tliet emerġenzi maġġuri oħra, ħafna minnhom relatati mat-tifi tan-nar.

Ritratti: MIV