STQARRIJA MILL-MINISTERU GĦALL-INTERN U S-SIGURTÀ Il-Beach Patrols tal-Uffiċjali tal-Komunità jirritornaw dan is-sajf biex iżommu l-bon ordni fil-bajjiet Maltin

Il-Ministru għall-Intern u s-Sigurtà, Glenn Bedingfield, nieda uffiċjalment il-Beach Patrols 2026, inizjattiva li se terġa’ tara lill-Uffiċjali tal-Komunità tal-LESA jkunu preżenti fuq uħud mill-aktar bajjiet frekwentati f’Malta matul l-istaġun tas-sajf, bil-għan li jkomplu jsaħħu s-sigurtà, l-indafa u l-ordni fl-ispazji pubbliċi.

L-inizjattiva se tibda mill-4 ta’ Lulju sat-30 ta’ Awwissu u se tkun attiva kull nhar ta’ Sibt, Ħadd u Festa Pubblika bejn l-10:00 ta’ filgħodu u s-6:00 ta’ filgħaxija. Il-patrols se jkopru l-bajjiet tal-Għadira, Għajn Tuffieħa, Golden Bay, Buġibba Perched Beach, Qawra Point, St George’s Bay f’San Ġiljan, Balluta Bay, Fond Għadir, il-Fajtata, il-Bajja ta’ San Tumas, Pretty Bay u St George’s Bay f’Birżebbuġa.

Waqt it-tnedija, il-Ministru Glen Bedingfield saħaq li l-Gvern jibqa’ impenjat li jinvesti f’inizjattivi li jsaħħu l-prevenzjoni, itejbu s-sigurtà pubblika u jkomplu jtejbu l-kwalità tal-ħajja fil-komunitajiet tagħna. “Is-sajf għandu jkun sinonimu mas-serħan tal-moħħ. Kulħadd għandu d-dritt li jgawdi l-bajjiet tagħna f’ambjent sigur, nadif u organizzat. Il-Beach Patrols mhumiex dwar l-infurzar biss, iżda dwar il-prevenzjoni, l-assistenza u s-servizz lejn il-komunità. Permezz ta’ din l-inizjattiva qed inkomplu ninvestu fi spazji pubbliċi aktar siguri fejn il-familji, ir-residenti u l-viżitaturi jistgħu jgawdu l-kosta Maltija  b'rispett lejn xulxin.”

Il-Ministru spjega li matul dawn il-patrols, l-Uffiċjali tal-Komunità tal-LESA se jkunu qed jassistu lill-pubbliku, jipprovdu informazzjoni dwar ir-regolamenti u l-miżuri ta’ sigurtà fil-bajjiet, kif ukoll iservu ta’ punt ta’ referenza għal kull min ikollu bżonn l-għajnuna.

Il-Ministru rringrazzja lill-Korp tal-Pulizija ta' Malta, lill-Awtorità Maltija għat-Turiżmu, lir-Red Cross, lill-lifeguards u lill-entitajiet kollha involuti għall-kollaborazzjoni kontinwa tagħhom. Huwa rringrazzja wkoll lill-Uffiċjali tal-Komunità tal-LESA għall-professjonalità, id-dedikazzjoni u l-impenn tagħhom.

Il-Kap Eżekuttiv tal-LESA, Svetlick Flores, qal li l-Beach Patrols illum saru parti importanti mill-approċċ tal-Aġenzija matul ix-xhur tas-Sajf. “L-esperjenza tas-snin li għaddew turi biċ-ċar il-valur tal-preżenza tal-Uffiċjali tal-Komunità fil-bajjiet tagħna. Ir-rwol tagħhom imur ferm lil hinn mill-infurzar, billi jiffoka fuq il-prevenzjoni, l-assistenza u l-kuntatt dirett mal-pubbliku. Kemm jekk qed jipprovdu gwida, joffru għajnuna jew jirrispondu għal sitwazzjonijiet ta’ emerġenza, il-preżenza tagħhom tikkontribwixxi direttament għal spazji pubbliċi aktar siguri u għal esperjenza aħjar għal kulħadd.”

Il-pubbliku huwa mħeġġeġ igawdi l-bajjiet b’responsabbiltà, jirrispetta l-ambjent, isegwi l-istruzzjonijiet tal-lifeguards u tal-awtoritajiet, u jagħti s-sehem tiegħu biex il-bajjiet u l-ispazji pubbliċi ta’ pajjiżna jibqgħu siguri, nodfa u aċċessibbli għal kulħadd.