​ STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR Malta tikseb l-appoġġ biex il-proġett tal-pipeline jibqa’ eliġibbli għall-finanzjament tal-Unjoni Ewropea

Malta kisbet l-appoġġ tal-Istati Membri għall-estensjoni ta’ deroga li tippermetti li l-proġett tal-pipeline, kompatibbli mal-idroġenu, jibqa’ rikonoxxut mill-Unjoni Ewropea bħala Proġett ta’ Interess Komuni (Project of Common Interest) u jibqa’ eliġibbli biex potenzjalment jibbenefika minn finanzjament Ewropew.

Il-Ministri għall-Enerġija tal-Unjoni Ewropea ltaqgħu l-Ġimgħa fil-Lussemburgu, fejn il-Kunsill tal-Unjoni Ewropea laħaq Pożizzjoni Ġenerali dwar ir-reviżjoni tar-Regolament tat-TEN-E.

Il-pożizzjoni tal-Kunsill issa trid tgħaddi għan-negozjati tat-trilogu mal-Kummissjoni Ewropea u l-Parlament Ewropew qabel jiġi adottat it-test finali.

“Dan huwa pass importanti ’l quddiem għal Malta, li jirrifletti r-realtajiet ġeografiċi ta’ pajjiżna, filwaqt li jibqa’ konformi mal-istrateġija fit-tul tal-Gvern u mal-viżjoni tagħna biex sal-2050 is-settur tal-produzzjoni tal-elettriku jkun dekarbonizzat. Assigurajna l-appoġġ tal-Kunsill biex il-proġett tal-pipeline jibqa’ eliġibbli għal finanzjament potenzjali mill-Unjoni Ewropea, grazzi għat-tim kollu Malti li ħadem fuq din il-pożizzjoni. Minħabba li l-pipeline huwa ddisinjat biex ikun kompatibbli mal-idroġenu, pajjiżna se jkun f’pożizzjoni li jkun jista’ jingħaqad man-netwerk Ewropew tal-idroġenu u mas-suq tal-idroġenu li qed jiżviluppa,” qalet il-Ministru għall-Enerġija Dr Miriam Dalli.

Mid-dħul fis-seħħ tagħha fl-2021, din id-deroga kienet kruċjali biex il-proġett tal-pipeline jibqa’ jżomm l-istatus ta’ Proġett ta’ Interess Komuni (PCI) fil-Listi tal-Unjoni tal-2023 u tal-2025. Id-deroga tissalvagwardja wkoll l-eliġibbiltà tal-proġett għal finanzjament mill-programm Connecting Europe Facility (CEF).

L-estensjoni proposta tad-deroga ngħatat l-appoġġ fuq il-bażi li Malta u Ċipru għadhom fiżikament iżolati min-netwerk trans-Ewropew tal-gass u min-netwerk futur tal-idroġenu fl-Ewropa. Id-delegazzjonijiet tal-Istati Membri laqgħu l-argumenti favur ir-realtajiet ġeografiċi ta’ Stati Membri gżejjer żgħar, u qablu li konnessjoni permezz ta’ pipeline għal dawn iż-żewġ pajjiżi tibqa’ objettiv importanti għall-Unjoni Ewropea.

Il-pożizzjoni tal-Kunsill tirrifletti wkoll il-fehma li l-implimentazzjoni ta’ dawn il-konnessjonijiet permezz ta’ pipeline m’għandhiex tfixkel il-proċess ta’ dekarbonizzazzjoni tal-ekonomija jew l-iżvilupp ta’ sorsi ta’ enerġija nadifa u tal-infrastruttura relatata magħhom.

Matul l-istess laqgħa tal-Kunsill, id-delegazzjonijiet tal-Unjoni Ewropea adottaw ukoll Pożizzjoni Ġenerali dwar Direttiva li għandha l-għan li tħaffef il-proċessi tal-permessi għal proġetti ta’ enerġija rinnovabbli. Il-Ministri tal-Enerġija qasmu wkoll fehmiet dwar kif l-Unjoni Ewropea tista’ tilħaq bl-aħjar mod l-għanijiet tagħha fil-qasam tal-enerġija għall-perjodu ta’ wara l-2030, filwaqt li kkoordinaw il-miżuri ta’ rispons fid-dawl tat-tensjonijiet ġeopolitiċi fil-Lvant Nofsani.