STQARRIJA MINN SERVIZZ.GOV Servizz.gov tniedi portal ġdid b'għodod intelliġenti għal servizzi aktar personalizzati

L-aġenzija Servizz.gov nediet verżjoni ġdida tal-portal tagħha, Servizz.gov.mt, b'għodod diġitali innovattivi mfassla biex jagħmlu l-aċċess għas-servizzi pubbliċi aktar sempliċi, personalizzat u relevanti għall-bżonnijiet taċ-ċittadini.

Is-sit, li matul is-sena li għaddiet irreġistra aktar minn 738,000 utent u ġġenera aktar minn żewġ miljun pageview, issa joffri numru ta' funzjonalitajiet ġodda li jkomplu jsaħħu l-esperjenza tal-utent.

Fost l-aktar karatteristiċi innovattivi hemm il-Benefit Finder, għodda intelliġenti li tgħin lill-utenti jidentifikaw servizzi u benefiċċji li jistgħu jkunu eliġibbli għalihom. Il-portal il-ġdid jorganizza wkoll is-servizzi pubbliċi skont avvenimenti importanti tal-ħajja, biex l-utent isib aktar malajr dak li għandu bżonn fil-mument opportun.

Barra minn hekk, il-pjattaforma tinkludi dashboards personalizzati, il-faċilità li wieħed jibbukkja appuntament online għal assistenza professjonali u individwali fuq taxxa u l-ġbir ta' karti tal-identità, kif ukoll chatbot li joffri assistenza immedjata. Is-servizzi kollha huma disponibbli kemm bil-Malti kif ukoll bl-Ingliż.

Il-Kap tas-Servizz Pubbliku, Tony Sultana, qal li filwaqt li Servizz.gov.mt diġà kien imfittex ħafna mill-pubbliku, din il-verżjoni l-ġdida timmarka pass importanti lejn servizzi aktar iffukati fuq il-ħtiġijiet tal-utent.

“Dan l-investiment ikompli jsaħħaħ il-kwalità tas-servizzi li noffru liċ-ċittadini. Huwa wkoll pass ieħor fil-vjaġġ ta' trasformazzjoni diġitali li qed jagħmel is-Servizz Pubbliku, kif rikonoxxut mill-Kummissjoni Ewropea li għal darb'oħra poġġiet lil Malta fl-ewwel post fl-Ewropa fis-servizzi governattivi online," qal is-Sur Sultana.

Il-Kap Eżekuttiv ta' Servizz.gov, Massimo Vella, spjega kif it-tnedija tal-portal il-ġdid hija parti mill-istrateġija tal-aġenzija biex iġġib is-servizzi pubbliċi aktar qrib iċ-ċittadini.

“Qed ninvestu f'għodod diġitali li mhux biss jagħmlu s-servizzi aktar aċċessibbli, iżda li jgħinu wkoll lill-utenti jsibu aktar malajr dak li hu relevanti għalihom. L-għan tagħna hu li kull persuna tkun tista' taċċessa s-servizzi tal-Gvern b'mod aktar faċli, effiċjenti u personalizzat," temm jgħid is-Sur Vella.

Ritratti: Servizz.gov