STQARRIJA MILL-MINISTERU GĦALL-EDUKAZZJONI U L-ISPORT Tagħlim tul il-ħajja – aktar minn 450 kors għaż-żgħażagħ u l-adulti

Aktar opportunitajiet biex wieħed jitgħallem, jiżviluppa u jirnexxi f'kull stadju tal-ħajja

Aktar minn 450 kors se joffru opportunitajiet ta' tagħlim u żvilupp tal-ħiliet għal eluf ta' żgħażagħ u adulti, hekk kif il-Ministeru għall-Edukazzjoni u l-Isport nieda l-Prospett għat-Tagħlim Tul il-Ħajja 2026/2027.

Il-Prospett, imniedi mill-Ministru għall-Edukazzjoni u l-Isport Byron Camilleri, jinkludi korsijiet f'madwar 100 suġġett differenti għal persuni ta' 15-il sena jew aktar, bil-għan li jkomplu jsaħħu l-għarfien, il-ħiliet u l-kompetenzi tagħhom, filwaqt li jtejbu l-opportunitajiet għall-iżvilupp edukattiv, personali u professjonali.

Il-Ministru Byron Camilleri saħaq li t-tagħlim tul il-ħajja għandu rwol kruċjali fil-bini ta' soċjetà aktar b'saħħitha, inklużiva u preparata għall-isfidi tal-futur.

“L-edukazzjoni ma tiqafx mal-iskola jew mal-istudji formali, iżda tibqa' proċess kontinwu li jakkumpanja lill-persuna tul ħajjitha kollha. F'dinja li qed tinbidel b'pass mgħaġġel, il-ħiliet u l-għarfien għandhom jiġu aġġornati kontinwament. Għalhekk qed inkomplu ninvestu f'opportunitajiet ta' tagħlim li jagħtu lill-individwi l-għodda meħtieġa biex jikbru, jadattaw u jirnexxu. Dan il-Prospett jirrifletti l-impenn tagħna li nkomplu nressqu l-edukazzjoni eqreb lejn il-komunità, filwaqt li noħolqu aktar opportunitajiet biex persuni ta' kull età jiżviluppaw il-potenzjal tagħhom," qal il-Ministru Camilleri.

Id-Direttur tad-DLE, Grazio Grixti, spjega kif il-Prospett huwa allinjat mal-Istrateġija Nazzjonali għat-Tagħlim Tul il-Ħajja 2023–2030 u jkompli jibni fuq l-interess dejjem jikber fit-tagħlim fost l-adulti. Fil-fatt, matul is-sena akkademika li għaddiet, id-Direttorat irċieva 18,471 applikazzjoni, ċifra li tkompli tikkonferma d-domanda qawwija għal opportunitajiet ta' tagħlim kontinwu.

Il-Prospett jinkludi firxa estensiva ta' korsijiet fl-oqsma tan-Negozju, ix-Xjenza u t-Teknoloġija, l-Arti Kreattiva, l-Istudji Umanistiċi, l-Iżvilupp Personali u l-Lingwi. Fost il-korsijiet il-ġodda introdotti għal din is-sena hemm il-Kalligrafija, il-Portugiż, il-pronunzja tal-Ingliż, il-ġestjoni tal-ħin u l-istress, kif ukoll korsijiet preparatorji għal diversi eżamijiet.

Sabiex it-tagħlim jibqa' aċċessibbli għal kulħadd, persuni ta' 60 sena jew aktar huma intitolati għal kors wieħed bla ħlas kull sena, filwaqt li japplikaw ukoll eżenzjonijiet mill-ħlas għal persuni li jirċievu benefiċċji soċjali u detenturi tal-Karta tad-Diżabilità.

L-applikazzjonijiet se jkunu miftuħa mill-1 sal-31 ta' Lulju 2026 fuq lifelonglearning.gov.mt, fiċ-ċentri ta' Servizz.gov jew permezz tal-Kunsilli Lokali madwar Malta u Għawdex.

Il-Prospett jista' jiġi aċċessat hawn: https://lifelonglearning.gov.mt/prospectus/