STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR

B’referenza għall-istqarrija tal-Partit Nazzjonalista dwar il-ftehim il-ġdid għall-provvista tal-LNG, il-Gvern jinnota li kif ġie spjegat fi stqarrija minn Enemalta, dan il-ftehim huwa marbut mal-indiċi Title Transfer Facility (TTF), il-punt ta’ riferiment ewlieni Ewropew għall-prezz tal-gass naturali.

Dan ifisser li l-akkwist tal-LNG se jkun ibbażat fuq mekkaniżmu ta’ prezzijiet trasparenti, rikonoxxut internazzjonalment u allinjati mal-kundizzjonijiet attwali tas-suq Ewropew tal-gass.

Il-ftehim, li ġie konkluż minn Enemalta ma’ BP, jiżgura l-provvista tal-LNG sal-aħħar ta’ Mejju 2027. Dan seħħ wara proċess kompetittiv li ġibed interess minn seba’ kumpaniji internazzjonali stabbiliti, u wara evalwazzjoni kummerċjali u teknika dettaljata mill-kumpanija.

L-offerta magħżula kienet dik li tat l-aħjar valur u sigurtà fil-provvista għal Malta, f’kuntest internazzjonali fejn is-swieq tal-enerġija għadhom affettwati minn tensjonijiet ġeopolitiċi u inċertezza fil-prezzijiet.

Fl-istess waqt, Enemalta qed taħdem b’mod parallel fuq il-kontinwità tal-provvista lil hinn mill-perjodu kopert minn dan il-kuntratt. Dan jirrifletti l-impenn kontinwu lejn ippjanar fit-tul u sigurtà fil-provvista tal-enerġija għal familji u negozji.

Dan il-ftehim jikkumplimenta programm usa’ ta’ investiment fl-infrastruttura tal-enerġija, inkluż it-tisħiħ u l-modernizzazzjoni tan-network tad-distribuzzjoni tal-elettriku, biex is-sistema tal-enerġija ta’ Malta tibqa’ aktar sigura, reżiljenti u lesta għall-isfidi tal-futur.

Fuq l-enerġija m’hemmx paragun. Il-pjan tal-Gvern hu ċar u qed ikun implimentat, kemm fuq provvista u enerġija sostenibbli fit-tul, kif ukoll fejn tidħol distribuzzjoni, fejn qatt daqs illum ma sar investiment u xogħol biex titjib is-sistema.