STQARRIJA MILL-MINISTERU GĦALL-INTERN U S-SIGURTÀ 65 rekluta ġdida jingħaqdu mal-Forzi Armati ta’ Malta

Ilbieraħ, 65 rekluta ġdida tal-Forzi Armati ta’ Malta temmew uffiċjalment it-taħriġ tagħhom bil-Passing Out Parade li saret fil-Barracks tal-Forzi Armati ta’ Malta f’Ħal Luqa. Matul iċ-ċerimonja, il-65 rekluta, fosthom 8 nisa, ġew ingaġġati uffiċjalment bħala Gunners mal-Forzi Armati ta’ Malta.

Għall-parata attendew il-Ministru għall-Intern u s-Sigurtà, Glenn Bedingfield, il-Kmandant tal-Forzi Armati ta’ Malta, il-Brigadier Clinton O’Neill, uffiċjali għolja tal-Forzi Armati ta’ Malta, mistednin distinti, kif ukoll il-familji u l-ħbieb tal-Gunners il-ġodda.

Fl-indirizz tiegħu, il-Ministru Bedingfield  qal li s-servizz, lejn il-pajjiż huwa l-akbar unur u privileġġ, filwaqt li saħaq li din il-parata għandha sinifikat doppju, hekk kif din kienet l-ewwel Passing Out Parade kemm għar-rekluti kif ukoll għalih fil-kariga ta’ Ministru għall-Intern u s-Sigurtà.

“Għalikom dan huwa mument li jimmarka t-tmiem ta’ perjodu intensiv ta’ taħriġ u l-bidu ta’ karriera ta’ servizz lejn pajjiżna. Għalija huwa ta’ unur li l-ewwel żjara tiegħi f’dawn il-Barracks hija għal din l-okkażjoni ta’ rekluti ġodda – intom il-futur tal-Armata tagħna,” qal il-Ministru.

B’kollox kien hemm 191 applikant, 87 għaddew mill-proċess ta’ selezzjoni. Minn dawn, 84 bdew it-taħriġ f’Jannar li għadda, filwaqt li 65 rekluta lestew b’suċċess kors impenjattiv ta’ madwar 22 ġimgħa.

Matul dan il-perjodu, ir-rekluti ngħataw taħriġ komprensiv f’diversi oqsma essenzjali għall-ħidma militari, inkluż taħriġ fiżiku intensiv, drill ċerimonjali, l-użu sigur tal-armi tas-servizz, fieldcraft, eżerċizzji fuq il-post, l-ewwel għajnuna, il-qari tal-mapep, il-proċeduri tal-komunikazzjoni u l-għarfien militari. Dan it-taħriġ sar f’diversi faċilitajiet tal-Forzi Armati ta’ Malta.  

Il-Ministru rringrazzja lill-instructors u lill-uffiċjali kollha tal-Forzi Armati ta’ Malta għad-dedikazzjoni tagħhom fit-taħriġ tar-rekluti u għat-trasmissjoni tal-għarfien, il-valuri u l-esperjenza tagħhom lill-ġenerazzjoni l-ġdida ta’ suldati.

Huwa enfasizza wkoll l-importanza dejjem tikber tal-irwol tal-Forzi Armati ta’ Malta fis-sorveljanza marittima, is-sigurtà tal-fruntieri, l-operazzjonijiet ta’ tfittxija u salvataġġ, l-assistenza waqt emerġenzi u l-kontribut għas-sigurtà nazzjonali.

“L-uniformi li tilbsu ġġib magħha responsabbiltà kbira, iżda wkoll privileġġ kbir: dak li sservu lil Malta u lill-poplu Malti. F’isem il-Gvern ta’ Malta u tal-poplu Malti, nirringrazzjakom talli għażiltu li taqdu lil pajjiżkom,” qal il-Ministru Glenn Bedingfield.

Min-naħa tiegħu, il-Kap Kmandant tal-Forzi Armati ta’ Malta, il-Brigadier Clinton O’Neil qal li: “Matul dawn l-aħħar xhur intom għaddejtu minn taħriġ intensiv li kontinwament poġġa għall-prova l-kapaċitajiet fiżiċi u r-reżiljenza mentali tagħkom. Dħaltu hawn bħala individwi fejn ġejtu mgħallma kif taħdmu flimkien, u llum qegħdin narawkom magħqudin bħala skwadra.”