STQARRIJA MILL-UFFIĊĊJU TAL-PRESIDENT It-tieni edizzjoni ta' The 10km L-istrina Palace Run se ssir fl-14 ta' Ġunju

It-tieni edizzjoni ta' The 10km L-istrina Palace Run b'risq il-Malta Community Chest Fund se ssir fl-14 ta' Ġunju.

Wara li l-ewwel edizzjoni tas-sena li għaddiet għaqqdet il-Kastell Verdala mal-Palazz ta' Sant'Anton, l-edizzjoni ta' din is-sena se tieħu lill-parteċipanti matul rotta ta' 10 kilometri mill-Palazz ta' Sant'Anton sal-Palazz tal-President fil-Belt Valletta.

Dettalji dwar il-konferenza tal-aħbarijiet ingħataw waqt konferenza tal-aħbarijiet fil-Palazz ta' Sant'Anton, li matulha l-President ta' Malta, l-Eċċellenza Tagħha Myriam Spiteri Debono rringrazzjat lil dawk kollha li permezz tal-parteċipazzjoni tagħhom qed jgħinu lill-Malta Community Chest Fund  biex tkompli tassisti lil dawk kollha li jiġu bżonn l-għajnuna tagħha.

Il-President ta' Malta fissret kif il-Malta Community Chest Fund tirċievi talbiet għall-għajnuna matul is-sena kollha, u li t-talbiet jirriflettu wkoll kundizzjonijiet u mard li dejjem jiżdied u jinbidel. Qalet li hu għalhekk li l-Malta Community Chest Fund, li tgħin lil dawk kollha li jirrikorru għandha, teħtieġ fondi matul is-sena kollha u l-bżonnijiet ikomplu jikbru sena wara l-oħra.

Il-Maġġur Richard Vassallo, li ħareġ b'din l-inizjattiva, tkellem dwar kif l-idea bdiet mix-xewqa tal-atleti li jkollhom attività oħra, minbarra l-Mixja tal-President, li fiha jistgħu jipparteċipaw u fl-istess waqt iħossu s-sodisfazzjoni li qed jgħinu lill-Malta Community Chest Fund.

Spjega kif wara s-suċċess tal-ewwel edizzjoni, The 10km L-istrina Palace Run issa daħlet ukoll fil-kalendarju tal-atletika Maltija, u esprima s-sodisfazzjon tiegħu għall-interess u l-konkorrenza mill-atleti.

Il-konferenza tal-aħbarijiet kienet indirizzata wkoll minn Joe Micallef, l-organizzatur ewlieni ta' The Malta Marathon li qed jikkordina wkoll din l-edizzjoni ta' The 10km L-istrina Palace Run.

Hu tkellem dwar il-konkorrenza inkoraġġanti fl-edizzjoni ta' din is-sena, li mistennija tkompli tibni fuq is-suċċess tal-ġirja tas-sena li għaddiet, li matulha ħadu sehem kważi 800 persuna. Micallef fakkar li din l-attività mhix biss għal atleti professjonali, u ħeġġeġ lil dawk kollha li jħobbu l-ġiri anke bħala passatemp, biex jipparteċipaw.

Il-biljetti għal The 10km L-istrina Palace Run b'risq il-Malta Community Chest Fund jinsabu disponibbli fuq is-sit maltamarathon.com.

The 10km L-istrina Palace Run qed issir bl-appoġġ ta' diversi entitajiet tal-forzi dixxiplinari Maltin, fosthom il-Korp tal-Pulizija, il-Forzi Armati ta' Malta, LESA u Transport Malta, kif ukoll l-entitajiet kummerċjali Eurosport, Social Causes Fund, Fort Fitness, The Farsons Foundation, MCP Car Park u Star Fruit Limited.

Ritratti (DOI/OPR)