AVVIŻ MILL-AWTORITÀ GĦAS-SIGURTÀ TAL-IKEL Miżuri ta’ Emerġenza introdotti sabiex jissalvagwardjaw lil Malta kontra l-Marda tal-Ilsien u d-Dwiefer serotip SAT 1

L-Awtorità għas-Sigurtà tal-Ikel, fi ħdan il-Ministeru għall-Agrikoltura, is-Sajd u d-Drittijiet tal-Annimali, qed toħroġ sett ta' miżuri ta' emerġenza b'effett immedjat b'reazzjoni għat-tixrid tal-Marda tal-Ilsien u d-Dwiefer (FMD) serotip SAT 1 fl-Ewropa.

Wara każijiet riċenti tal-Marda tal-Ilsien u d-Dwiefer rrappurtati f'Ċipru u fil-Greċja, u f'konformità mad-dikjarazzjoni tal-Organizzazzjoni Dinjija għas-Saħħa tal-Annimali (WOAH) maħruġa fil-15 ta' April 2026 li ssejjaħ għal aktar viġilanza, Malta qed tadotta miżuri ta' prekawzjoni biex tipproteġi s-saħħa tal-annimali, tissalvagwardja s-settur agrikolu, u tassigura s-sigurtà tal-ikel.

Dawn il-miżuri qed jiġu implimentati skont l-Att dwar is-Servizzi Veterinarji (Kapitolu 437), Artikolu 15 (2) u (5).

Miżuri Ewlenin ta' Emerġenza

B'effett mill-21 ta' April 2026, il-miżuri li ġejjin japplikaw:

• Kwarantina Obbligatorja:

Id-dħul kollu f'Malta ta' ruminanti u majjali minn Stati Membri tal-Unjoni Ewropea għandu jkun soġġett għal perjodu obbligatorju ta' kwarantina ta' erbatax-il (14) jum, bi spejjeż fuq sid l-annimali, qabel ma jinħelsu.

• Projbizzjoni fuq Importazzjoni minn Pajjiżi Mhux tal-UE:

L-importazzjoni ta' ruminanti u majjali minn pajjiżi barra l-Unjoni Ewropea hija strettament ipprojbita.

• Restrizzjonijiet fuq Persuni minn Żoni ta' Riskju:

Kull persuna li tkun għaddiet minn żona ta' protezzjoni jew sorveljanza ma tkunx tista', għal perjodu ta' erbatax-il (14) jum mid-dħul tagħha f'Malta, tidħol jew iżżur kwalunkwe post fejn jinżammu ruminanti jew majjali.

• Restrizzjonijiet fuq Vetturi:

Vetturi li jġorru annimali ma jitħallewx jidħlu f'Malta jekk ikunu għaddew minn żoni ta' protezzjoni jew sorveljanza matul il-perjodu li fih dawn il-miżuri jkunu fis-seħħ.

• Kontroll tal-Moviment ġewwa Malta:

Il-moviment ta' ruminanti u majjali ġewwa Malta huwa pprojbit sakemm ma jkunx awtorizzat mill-Uffiċjal Veterinarju Ewlieni (CVO) fi ħdan l-Awtorità għas-Sigurtà tal-Ikel.

• Miżuri Msaħħa ta' Bijosigurtà:

L-irziezet kollha li jżommu ruminanti u/jew majjali huma obbligati jsegwu b'mod strett l-istruzzjonijiet dwar il-bijosigurtà maħruġa mill-CVO, kemm jekk ippubblikati kif ukoll jekk ikkomunikati direttament.

• Restrizzjonijiet fuq Prodotti tal-Annimali:

Prodotti jew oġġetti derivati minn ruminanti u/jew majjali li joriġinaw minn żoni ta' protezzjoni jew sorveljanza ma jistgħux jiddaħħlu f'Malta, kemm għal skopijiet kummerċjali kif ukoll personali.

• Miżuri għal Speċi Mhux Suġġetti għall-Marda:

Speċi ta' annimali li mhumiex suġġetti għall-Marda tal-Ilsien u d-Dwiefer iżda li joriġinaw minn żoni ta' riskju jkunu soġġetti għal miżuri speċifiċi ta' prekawzjoni, inkluż it-tindif tas-saqajn u r-rimi sigur tal-ħmieġ (permezz ta' inċinerazzjoni).

• Għeluq ta' Farms ta' Kuntatt (Petting Farms):

Farms li jospitaw ruminanti u majjali u li huma miftuħa għall-pubbliku għandhom jibqgħu magħluqa sakemm dawn il-miżuri jibqgħu fis-seħħ.

• Kontrolli fuq ir-Rimi tal-Iskart:

Skart tal-ikel jew skart li jirriżulta mit-tisjir jew mill-ipproċessar tal-ikel minn mezzi ta' trasport marittimu u ajru (inklużi dgħajjes, bastimenti u ajruplani) għandu jew jiġi inċinerat f'faċilitajiet approvati jew ma jkunx hemm mir-rimi ta' skart ta' dan it-tip f'Malta.

Dawn il-miżuri ta' prekawzjoni huma maħsuba biex jipprevjenu d-dħul u t-tixrid tal-Marda tal-Ilsien u d-Dwifer f'Malta u biex jipproteġu l-bhejjem, il-bdiewa u l-ekonomija b'mod ġenerali. L-Awtorità tħeġġeġ lill-partijiet kollha kkonċernati u lill-pubbliku biex jikkonformaw bis-sħiħ ma' dawn ir-regolamenti. Aktar aġġornamenti jiġu pprovduti kif meħtieġ.

Għal aktar informazzjoni, il-pubbliku jista' jikkuntattja lill-Awtorità għas-Sigurtà tal-Ikel fuq in-numru tat-telefon disponibbli 24 siegħa kuljum, 7 ijiem fil-ġimgħa fuq +356 99170532 jew jibgħat email fuq info.fssa@gov.mt.