STQARRIJA MILL-MINISTERU GĦALL-KULTURA, L-ARTIJIET U L-GVERN LOKALI Jibda r-restawr tal-Kappella tal-Madonna tal-Grazzja fil-Qrendi

Ingħata bidu għar-restawr tal-Kappella tal-Madonna tal-Grazzja fil-Qrendi li hija waħda minn sitt kappelli li jinsabu fil-lokalità tal-Qrendi. Hija tinsab tul it-triq li twassal għat-tempji megalitiċi, waqt li viċin hemm il-kappella dedikata lil San Mattew fiż-żona magħrufa bħala tal-Maqluba.

Il-Ministru għall-Kultura, l-Artijiet u l-Gvern Lokali Owen Bonnici, waqt żjara li għamel waqt ix-xogħlijiet f’din il-Kappella, qal li dan ir-restawr huwa pass importanti biex jiġi mħares u ppreservat il-wirt storiku ta’ pajjiżna. Huwa enfasizza li l-identità kulturali tal-komunità tissaħħaħ permezz ta’ proġetti bħal dawn, li jagħtu ħajja ġdida lil binjiet storiċi.

Oriġinarjament iddedikata lill-Madonna tal-Vitorja u mibnija fl-1685, il-kappella ġarrbet ħsarat matul il-gwerra, u partijiet minnha reġgħu nbnew.

Dan il-proġett jiffoka fuq ir-restawr u l-konservazzjoni ta’ din il-kappella rurali li hi sempliċi iżda ta’ valur kulturali sinifikativ, magħrufa għall-forma arkitettonika tradizzjonali tagħha u għall-preżenza kontinwa fil-pajsaġġ reliġjuż u storiku tal-Qrendi.

Ir-restawr huwa bbażat fuq prattiċi stabbiliti ta’ konservazzjoni, bil-għan li jinżamm kemm jista’ jkun mill-oriġinali, filwaqt li tiġi żgurata l-istabbiltà strutturali u l-konservazzjoni tal-kappella fil-futur. Ix-xogħlijiet kollha ser jsiru bl-użu ta’ materjali u metodi li jirrispettaw il-kostruzzjoni oriġinali u jiżguraw kompatibbiltà mt-tessut storiku.

Ix-xogħlijiet ta’ restawr ser jitmexxew mill-ħaddiema u staff professjonali tad-Dipartiment tar-Restawr u l-Preservazzjoni u mistennija li jdumu madwar sitt xhur, bid-Dipartiment jagħmel tajjeb għall-ispejjeż kollha.

Preżenti għal din iż-żjara kien hemm is-Sindku David Schembri, membri tal-Kunsill tal-Qrendi u l-Kappillan Fr Mario Said.