STQARRIJA MIS-SEGRETARJAT PARLAMENTARI GĦALL-UGWALJANZA U R-RIFORMI Malta tafferma l-ħidma tagħha f’konferenza organizzata mill-Kummissjoni Ewropea kontra r-razziżmu

Is-Segretarju Parlamentari għall-Ugwaljanza u r-Riformi Rebecca Buttigieg attendiet għall-Konferenza Ewropea kontra r-Razziżmu 2026, li saret fi Brussell u kienet ko-organizzata mill-Kummissjoni Ewropea u l-Presidenza Ċiprijotta tal-Kunsill tal-Unjoni Ewropea.

Din il-konferenza mmarkat it-tnedija tal-Istrateġija tal-Unjoni Ewropea kontra r-Razziżmu 2026-2030, u laqqgħet flimkien rappreżentanti tal-istituzzjonijiet tal-UE, l-Istati Membri, organizzazzjonijiet internazzjonali, korpi tal-ugwaljanza, is-soċjetà ċivili u l-akkademja, sabiex jissaħħaħ l-impenn tal-Ewropa fil-ġlieda kontra r-razziżmu permezz ta’ implimentazzjoni konkreta.

Is-Segretarju Parlamentari Buttigieg ipparteċipat f’diskussjoni bit-tema “Pjanijiet ta’ Azzjoni kontra r-Razziżmu: mil-livell globali għal dak lokali – għaliex azzjoni koordinata hija kruċjali”. Din id-diskussjoni esplorat esperjenzi nazzjonali fl-iżvilupp ta’ strateġiji kontra r-razziżmu u enfasizzat interventi effettivi kemm fil-kuntest Ewropew kif ukoll dak internazzjonali. Hija kellha l-opportunità li tippreżenta l-mixja ta’ Malta f’dak li għandu x’jaqsam mal-Pjan ta’ Azzjoni Nazzjonali kontra r-Razziżmu (NAPAR).

Intant, is-Segretarju Parlamentari Buttigieg enfasizzat li governanza li tinvolvi lill-gvern kollu hija essenzjali għal implimentazzjoni effettiva, flimkien ma’ konsultazzjoni kontinwa mal-komunitajiet affettwati mir-razziżmu, is-soċjetà ċivili u l-istituzzjonijiet fuq quddiem nett. Hija nnotat ukoll li l-ewwel NAPAR ta’ Malta kkontribwixxa biex jissaħħaħ il-livell professjonali tal-politika nazzjonali kontra r-razziżmu, tejjeb l-użu tal-informazzjoni fl-iżvilupp tal-politika u integra l-prinċipji kontra r-razziżmu fis-servizzi pubbliċi, inkluż fil-korp tal-pulizija, fl-edukazzjoni u fl-impenn fil-komunità.

Is-Segretarju Parlamentari Rebecca Buttigieg, tul din il-konferenza, affermat mill-ġdid l-impenn ta’ Malta li tkompli tipparteċipa b’mod attiv fi gruppi ta’ esperti tal-UE u pjattaformi multilaterali, filwaqt li enfasizzat li għarfien kondiviż, kollaborazzjoni kontinwa u governanza b’saħħitha huma essenzjali biex tinbena Unjoni fejn kulħadd jista’ jgħix ħieles mir-razziżmu u d-diskriminazzjoni.