STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Investiment f’innovazzjoni responsabbli: It-tnedija tal-proġett ANCHOR għat-tisħiħ tal-benesseri u r-reżiljenza f’setturi ta’ responsabbiltà għolja

Waqt avveniment li mmarka kollaborazzjoni b’saħħitha bejn il-Gvern u l-Università ta’ Malta, is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti nieda l-proġett ANCHOR. Din l-inizjattiva tirrappreżenta l-impenn ta’ Malta lejn l-innovazzjoni responsabbli u l-benesseri ta’ professjonisti li jġorru rwoli impenjattivi fis-soċjetà, inkluż fil-kura tas-saħħa, is-servizzi ta’ emerġenza u l-edukazzjoni, fost oħrajn.

Is-Segretarju Parlamentari enfasizza li, “L-edukazzjoni u r-riċerka huma l-aqwa investiment biex dawk li jaħdmu fl-ogħla livelli jibqgħu reżiljenti f’sitwazzjonijiet diffiċli. Il-proġett ANCHOR juri x’jista’ jinkiseb meta l-Gvern u l-akkademja jaħdmu id f’id b’għan komuni: li ntejbu l-ħajja taċ-ċittadini u niżguraw li Malta tibqa’ fuq quddiem nett fl-innovazzjoni etika.”

Il-proġett ANCHOR jindirizza l-pressjonijiet f’postijiet tax-xogħol bi pressjoni kbira. Permezz ta’ dan il-qafas, qed jinbena pedament b’saħħtu għal għodda diġitali futura f’forma ta’ mobile app li tpoġġi l-evidenza xjentifika u l-esperjenza umana fiċ-ċentru tagħha.

Dr Bernice Sant, bħala r-riċerkatriċi ewlenija tal-proġett, bniet il-pedament psikoloġiku ta’ ANCHOR billi bbażat fuq metodi rikonoxxuti internazzjonalment bħall-Acceptance and Commitment Therapy (ACT) u l-mindfulness. Dr Sant spjegat li l-viżjoni tagħha kienet li toħloq appoġġ adattat għar-realtajiet ta’ professjonijiet ta’ responsabbiltà għolja. “Dak li nħoloq huwa qafas maħdum b’attenzjoni li jqiegħed is-sigurtà tal-utent u l-integrità etika bħala prijorità. Permezz ta’ din il-kompetenza psikoloġika, qed noffru għodda li tirrispetta d-dinjità tal-professjonisti tagħna filwaqt li tgħinhom jinnavigaw il-pressjonijiet intensi tax-xogħol tagħhom.”

Prof. Matthew Montebello u t-tim mill-Università ta’ Malta kellhom rwol kruċjali biex jiżguraw li l-proġett ikun allinjat mal-qafas regolatorju tal-intelliġenza artifiċjali u l-integrità etika. Dan l-investiment f’attenzjoni dettaljata fl-istadji bikrin jiżgura li l-innovazzjoni tkun waħda sostenibbli u b’impatt pożittiv fit-tul.

Permezz ta’ din l-inizjattiva, is-Segretarjat Parlamentari għaż-Żgħażagħ, ir-Riċerka u l-Innovazzjoni jkompli juri l-appoġġ tiegħu għal proġetti li jsaħħu l-forza tax-xogħol nazzjonali u jippromwovu l-użu responsabbli tat-teknoloġija għall-ġid tas-soċjetà Maltija.