STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Idearti – Graphic Art 2025: Żgħażagħ artisti juru t-talent tagħhom f’edizzjoni li tkompli ssaħħaħ il-kreattività u l-empowerment fil-komunità artistika żagħżugħa

Is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti indirizza l-ftuħ tal-wirja tal-programm “Idearti – Graphic Art 2025”, inizjattiva li tinsab fir-raba’ edizzjoni tagħha u li tkompli tikber permezz tal-kollaborazzjoni bejn Aġenzija Żgħażagħ u l-Mikiel Anton Vassalli College – School of Art. Il-programm jagħti spazju lil żgħażagħ ta’ bejn it-18 u t-30 sena biex jiżviluppaw il-ħiliet artistiċi tagħhom u jesprimu l-lingwa kreattiva personali tagħhom permezz ta’ taħriġ prattiku, mentoring u esperjenzi ta’ tagħlim li jdumu disa’ xhur.

Din l-edizzjoni, li tiffoka fuq il-graphic art, qasam li jgħaqqad flimkien l-arti u d-disinn, il-komunikazzjoni u t-teknoloġija, turi biċ-ċar kemm il-kreattività tista’ ssir mezz ta’ empowerment, riflessjoni u tkabbir personali. Il-proċess wassal għal varjetà ta’ xogħlijiet finali li jesprimu talent frisk, ħsieb kritiku u l-kuraġġ li żgħażagħ artisti għandhom biex jesperimentaw u jfasslu identità artistika unika.

Fl-intervent tiegħu, is-Segretarju Parlamentari Keith Azzopardi Tanti faħħar ir-rwol ta’ dan il-programm li qed joħloq pjattaforma sostanzjali għal artisti żgħażagħ.

“Kull darba li nħares lejn inizjattivi bħal Idearti, nikkonferma aktar kemm meta nagħtu spazju u appoġġ liż-żgħażagħ tagħna, dawn jirnexxu b’mod straordinarju. Dan il-programm mhuwiex biss dwar l-arti, iżda dwar it-tkabbir personali, il-kuraġġ u l-ħsieb innovattiv li rridu nrawmu fil-ġenerazzjoni żagħżugħa tagħna. Meta ninvestu fil-kreattività taż-żgħażagħ, inkunu qed ninvestu fil-futur ta’ pajjiżna.”

Is-CEO ta’ Aġenzija Żgħażagħ Miriam Teuma enfasizzat l-importanza tal-programm bħala pilastru ewlieni tal-politiki tal-aġenzija favur l-empowerment taż-żgħażagħ.

“Idearti huwa programm li jagħti vuċi u viżibilità liż-żgħażagħ tagħna. Joffri spazju sigur fejn jistgħu jesploraw il-ħsieb kreattiv tagħhom, jikbru fil-kunfidenza u jikkollaboraw ma’ mentors u ma’ xulxin. Il-livell ta’ impenn u maturità artistika li rajna f’din l-edizzjoni juri li meta noffru opportunitajiet sinifikanti, iż-żgħażagħ iwieġbu b’eċċellenza straordinarja.”

Ix-xogħlijiet tal-parteċipanti se jiġu evalwati minn bord ta’ esperti, u l-artist rebbieħ jirċievi borża ta’ studju ta’ €3,500 biex jattendi kors barra minn Malta, li jkopri spejjeż tal-kors, tal-ivvjaġġar u tas-sussistenza. Barra minn hekk, ix-xogħlijiet kollha se jkunu inklużi f’e-catalogue li jiddokumenta l-vjaġġ artistiku ta’ kull parteċipant bħala ġieħ lejn ix-xogħol u d-dedikazzjoni tagħhom.

L-edizzjoni ta’ din is-sena affermat għal darb’oħra li l-kreattività żagħżugħa hija forza li tiġġenera ħsieb ġdid, toħloq komunitajiet aktar b’saħħithom u ssuq kultura innovattiva li tibqa’ kruċjali għall-iżvilupp kulturali u ekonomiku ta’ Malta. Idearti jibqa’ xhieda ta’ kollaborazzjoni b’saħħitha u viżjoni komuni biex jinħolqu spazji ġenwini ta’ tkabbir u espressjoni artistika għall-ġenerazzjoni li ġejja.