STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Tnedija ta’ proġett innovattiv għall-ismart manufacturing f’Malta

F'konferenza tal-aħbarijiet f'Seifert Systems Ltd, fiż-żona industrijali ta' Ħal Far, is-Segretarju Parlamentari Keith Azzopardi Tanti ħabbar it-tnedija ta' proġett ġdid ta' riċerka fl-ismart manufacturing, li jagħmel parti minn proġett wiesa' li jinkludi 10 inizjattivi innovattivi ta' riċerka. Dan il-proġett għandu l-għan li jtejjeb il-kompetittività tas-settur industrijali Malti, joħloq impjiegi ġodda u jikkontribwixxi għal tkabbir ekonomiku sostenibbli. Dan il-proġett qed isir b'kollaborazzjoni mal-industrija privata u l-Università ta' Malta.

Is-Segretarju Parlamentari Keith Azzopardi Tanti qal, “Dan il-proġett mhuwiex biss dwar it-teknoloġija; huwa dwar li nagħtu lill-industrija tagħna l-għodod u l-ħiliet meħtieġa biex tikkompeti fuq livell globali. L-ismart manufacturing mhux biss qed iġib opportunitajiet ekonomiċi, iżda qed jgħin ukoll fil-ħolqien ta' impjiegi ta' kwalità għall-ħaddiema u l-gradwati Maltin."

Dan il-proġett innovattiv għandu l-għan li jiżviluppa teknoloġiji avvanzati bħall-Intelliġenza Artifiċjali, l-Internet of Things (IoT), u l-awtomazzjoni fil-produzzjoni. Barra minn hekk, il-proġett se jgħin lill-kumpaniji lokali jespandu u jikkompetu f'suq globali, filwaqt li jipprovdi taħriġ speċjalizzat għal ħaddiema biex jakkwistaw il-ħiliet meħtieġa għal dan is-settur innovattiv.

Min-naħa tiegħu, l-Inġinier Emanuel Francalanza mill-Università ta' Malta, li ser ikun qed imexxi l-proġett, qal, “L-ismart manufacturing mhux biss qed jittrasforma l-industrija, iżda qed joffri opportunitajiet ġodda biex nistabbilixxu ekonomija aktar sostenibbli u kompetittiva. Dan il-proġett huwa pass importanti lejn futur fejn it-teknoloġija u l-innovazzjoni jkunu ċ-ċentru tal-iżvilupp ekonomiku tagħna."

Philip Seifert, il-Manager Ġenerali ta' Seifert Systems, qal, “Malta hija waħda mill-aqwa lokazzjonijiet biex tagħmel negozju, mhux biss minħabba l-pożizzjoni strateġika tagħha, iżda wkoll minħabba l-ambjent favorevoli għall-investiment u l-infrastruttura moderna li toffri. Il-Gvern Malti dejjem kien ta' appoġġ u dan jagħmel lil Malta post ideali biex kumpaniji internazzjonali jistabbilixxu u jespandu l-operat tagħhom. Seifert Systems hija eżempju ċar ta' kif Malta tista' tkun dar għall-kumpaniji li qed ifittxu tkabbir u innovazzjoni."

Dan il-proġett jirrappreżenta pass ieħor importanti lejn innovazzjoni li tpoġġi l-industrija u l-ekonomija ta' pajjiżna fiċ-ċentru. L-inizjattiva hija wkoll riflessjoni ta' kollaborazzjoni effettiva bejn il-Gvern, l-industrija privata, u l-istituzzjonijiet edukattivi. Is-Segretarju Parlamentari Azzopardi Tanti temm jgħid, “L-investiment fl-ismart manufacturing mhuwiex biss dwar il-qligħ ekonomiku; huwa wkoll dwar il-ħolqien ta' opportunitajiet. Dan il-proġett mhux biss qed jgħin lill-industrija, iżda qed jibni wkoll futur sostenibbli għall-ġenerazzjonijiet futuri".