STQARRIJA MILL-MINISTERU GĦALL-EDUKAZZJONI, L-ISPORT, IŻ-ŻGĦAŻAGĦ, IR-RIĊERKA U L-INNOVAZZJONI

Il-Ministeru għall-Edukazzjoni jirreferi għar-rapporti fil-mezzi tax-xandir ilbieraħ u wkoll fil-ġurnali dalgħodu dwar proċeduri ta' tfittxija għall-bombi fl-iskejjel.

Il-Ministeru jibda billi jirringrazzja lill-professjonisti u l-edukaturi kollha tal-ħidma mwettqa fil-mument tal-prova. Fl-episodju tal-aħħar jiem il-Ministeru kien proattiv u kkomunika mal-entitajiet responsabbli li għandhom l-għodda u t-taħriġ neċessarju għar-rispons ta' din is-sitwazzjoni. Żgur li mhix l-intenzjoni tal-Ministeru li jgħabbi individwi b'responsabbiltajiet li għalihom mhux kwalifikati jew imħarrġa u għalhekk jipperikola l-benesseri tagħhom b'xi mod.

B'referenza għal dak li qed jiġi rrappurtat, il-Ministeru jippreċiża li d-dokument ikkwotat kien ġie żviluppat lura fl-2010 taħt amministrazzjoni preċedenti. Il-Ministeru jiċċara wkoll li ma ħareġ l-ebda ċirkolari fuq is-suġġett f'dawn l-aħħar jiem u jispeċifika li fl-aħħar 10 snin fl-ebda ħin jew mument ma ċċirkola dan id-dokument jew qatt ma rċieva lmenti dwar il-kontenut tiegħu.

Il-Ministeru se jkompli l-ħidma sabiex protokolli u politika varji jkomplu jiġu aġġornati biex jirriflettu r-realtajiet preżenti, hekk kif fl-aħħar snin il-Ministeru għamel numru ta' eżerċizzji li permezz tagħhom dejjem ikkonsulta ma' diversi entitajiet, sabiex jassigura l-benesseri ta' kull individwu fis-settur edukattiv.