STQARRIJA MILL-MINISTERU GĦALL-AMBJENT, L-ENERĠIJA U R-RIĠENERAZZJONI TAL-PORT IL-KBIR Il-Ministru Miriam Dalli tmexxi n-negozjati għall-adattament klimatiku tal-UE fil-COP29

Għat-tieni darba konsekuttiva, il-Ministru għall-Ambjent, l-Enerġija u r-Riġenerazzjoni tal-Port il-Kbir Miriam Dalli, flimkien mal-Ministru Awstrijaka Leonore Gewessler, ġiet magħżula biex tmexxi n-negozjati tal-Unjoni Ewropea fuq id-dokument tal-adattament klimatiku waqt il-COP29.

Dan l-irwol importanti għal darb'oħra jenfasizza l-impenn li dejjem qiegħed jikber ta' Malta biex tkun fuq quddiem nett fost il-mexxejja globali fil-qasam tal-klima.

Waqt laqgħa f'Baku, il-Ministru Miriam Dalli enfasizzat li l-adattament, wieħed mill-pilastri ewlenin tal-Ftehim ta' Pariġi, għandu jiffoka fuq kif il-pajjiżi jistgħu jibnu reżiljenza biex jiffaċċjaw l-impatti dejjem jiżdiedu tat-tibdil fil-klima.

In-negozjati dwar l-adattament klimatiku se jindirizzaw kif tista' tissaħħaħ il-kapaċità globali biex jiġu mmitigati r-riskji klimatiċi, jiġu protetti l-komunitajiet vulnerabbli, u jiġi żgurat progress tanġibbli lejn il-miri tar-reżiljenza.

“Dan huwa mument kruċjali għall-kooperazzjoni internazzjonali dwar it-tibdil fil-klima. Permezz ta' dawn in-negozjati, qed niżguraw li l-adattament jibqa' prijorità globali, b'soluzzjonijiet li jindirizzaw l-isfidi reali tal-ħajja. Malta hija lesta li taħdem ma' kull parti involuta biex inwasslu riżultati prattiċi u bbilanċjati," qalet il-Ministru Miriam Dalli.

Malta se tiffoka fuq li jintlaħaq kunsens dwar miżuri prattiċi li jagħtu prijorità lil pajjiżi l-aktar vulnerabbli, filwaqt li jsaħħu l-miri globali għar-reżiljenza. Se jkun hemm enfasi partikolari biex jiġi żgurat finanzjament adegwat li jgħin lill-pajjiżi, speċjalment lill-gżejjer żgħar, jadattaw għall-impatti tat-tibdil fil-klima.

Id-delegazzjoni Maltija tinkludi lis-Segretarju Permanenti tal-Ministeru Joseph Caruana kif ukoll l-Ambaxxatriċi għat-Tibdil fil-Klima, il-Professur Simone Borg, li bl-esperjenza vasta tagħha se tgħin biex Malta tmexxi b'suċċess id-diskussjonijiet tekniċi u politiċi dwar l-ippjanar għall-adattament.