STQARRIJA MIS-SEGRETARJAT PARLAMENTARI GĦALL-GVERN LOKALI: Iċ-ċittadini fiċ-ċentru tal-ħidma tal-Kunsilli Lokali u Reġjonali
Is-Segretarju Parlamentari għall-Gvern Lokali Alison Zerafa Civelli indirizzat il-konferenza annwali tal- Assoċjazzjoni Nazzjonali tas-Segretarji Eżekuttivi tal-Kunsilli Lokali u Reġjuni (ANSEK). Il-konferenza kienet miftuħa għas-Segretarji Eżekuttivi tal-kunsilli lokali u reġjonali u għal stakeholders tal-kunsilli lokali.
Għal din il-konferenza kien hemm preżenti wkoll uffiċjali għolja mill-UDiTE li hija organizzazzjoni għall-kapijiet amministrattivi fil-qasam tal-Gvern Lokali madwar l-Ewropa, kif ukoll kapijiet amministrattivi mill-Irlanda, Franza, l-Italja, ir-Rumanija u l-Belġju.
Fid-diskors tagħha, is-Segretarju Parlamentari Alison Zerafa Civelli rreferiet għall-fatt li kienet l-ANSEK li ħadmet sabiex il-kunsilli reġjonali jiġu introdotti fis-settur tal-gvern lokali f’pajjiżna. Hija qalet li l-għan ewlieni tal-kunsilli reġjonali huwa li jkunu ta’ sostenn għall-kunsilli lokali fi ħdanhom sabiex jaqdu d-dmirijiet tagħhom b’mod effiċjenti u effikaċi u jkomplu jwasslu servizz tal-ogħla kwalità liċ-ċittadini.
Is-Segretarju Parlamentari Zerafa Civelli sostniet ukoll li l-irwol tas-segretarji eżekuttivi huwa kruċjali sabiex ikun hemm komunikat effiċjenti u b’saħħtu bejn il-kunsilli lokali u l-kunsill reġjonali rispettiv, dan filwaqt li jkomplu jżommu liċ-ċittadini fiċ-ċentru ta’ ħidmiethom. Hija temmet id-diskors tagħha billi rringrazzjat lis-segretarji eżekuttivi tal-ħidma tagħhom.
Min-naħa tiegħu, il-President tal-ANSEK Paul Gatt ħeġġeġ lill-kunsilli lokali sabiex jutilizzaw ir-riżorsi tagħhom bl-aħjar mod sabiex ikomplu jindirizzaw il-bżonnijiet tal-lokalitajiet u r-residenti.
F’din il-konferenza saru preżentazzjonijiet minn ħames kelliema differenti fuq il-ħidma bejn il-kunsilli lokali u r-reġjuni. Saret ukoll diskussjoni fuq diversi aspetti relatati ma’ dan il-qasam bħall-implimentazzjoni effettiva ta' policies ġodda u servizzi aktar ċentralizzati, fost l-oħrajn.
Other Press Releases:
PR261926
STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...
PR261925EN