Left arrow Go Back

STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Il-qagħda umanitarja mwiegħra tal-Palestinjani f’Gaża u Rafah laħqet livell katastrofiku – il-Ministru Ian Borg

pr240915
Date Icon 27/05/2024

Malta tappella għal soluzzjonijiet tanġibbli u dejjiema għall-paċi fil-Lvant Nofsani

“Il-qagħda umanitarja mwiegħra ta' eluf ta' Palestinjani f'Gaża, u issa f'Rafah, laħqet livell katastrofiku. Jeħtieġ nagħmlu l-almu kollu tagħna biex nerġgħu nagħtu l-ħajja l-proċess ta' paċi lejn soluzzjoni dejjiema ta' żewġ stati." Il-Ministru għall-Affarijiet Barranin u Ewropej u l-Kummerċ Ian Borg saħaq fuq il-ħtieġa urġenti ta' soluzzjonijiet tanġibbli ta' paċi fil-Lvant Nofsani waqt li kien qed jieħu sehem fil-laqgħa tal-Kunsill tal-Affarijiet Barranin fi Brussell, it-Tnejn filgħodu.

Il-Ministru appella lill-komunità internazzjonali biex tkompli tinsisti għal waqfien mill-ġlied immedjat fl-Iżrael u l-Palestina bħala l-unika triq biex tintemm din it-traġedja umana, kif ukoll bħala pass effettiv 'il quddiem għall-ħelsien tal-ostaġġi kollha f'Gaża u ż-żieda fl-għajnuna umanitarja lill-familji Palestinjani.

Huwa enfasizza l-importanza li l-Awtorità Palestinjana tingħata l-appoġġ, sabiex issaħħaħ ir-rwol strumentali tagħha fiż-żamma tal-istabbiltà fir-reġjun.

“Nilqgħu l-isforzi li saru s'issa biex tittaffa t-tbatija f'Gaża, inkluż il-ħidma tal-aġenziji umanitarji f'dawn il-komunitajiet. Madankollu, l-isforzi tagħna jidher ċar li huma biss qatra f'oċean ta' bżonnijiet kbar li n-nies f'dan ir-reġjun qed ikomplu jiffaċċjaw," qal il-Ministru Ian Borg.

Malta tirrifjuta bil-qawwa l-aħħar invażjoni f'Rafah, afferma l-Ministru, hekk kif esprima t-tama li l-Unjoni Ewropea għadha tista' tikkonvinċi lill-Iżrael biex itemmha.

Waqt il-laqgħa tat-Tnejn, il-Ministri tal-Affarijiet Barranin mill-Unjoni Ewropea laqgħu wkoll Ministri mill-Qatar, l-Arabja Sawdija, l-Eġittu, il-Ġordan u l-Emirati Għarab Magħquda, kif ukoll lis-Segretarju Ġenerali tal-Lega tal-Istati Għarab, għal skambju importanti dwar l-aħħar żviluppi fil-Lvant Nofsani.

F'sessjoni separata, il-Ministri tal-Affarijiet Barranin tal-Unjoni Ewropea ddiskutew ukoll il-gwerra fl-Ukrajna, bil-parteċipazzjoni (permezz ta' video teleconference) tal-Ministru tal-Affarijiet Barranin Ukren Dmytro Kuleba. Waqt l-intervent tiegħu, il-Ministru Ian Borg irrefera għas-Summit tax-xahar id-dieħel dwar il-Paċi fl-Ukrajna, u ħeġġeġ lill-istati membri biex jibdlu dan l-avveniment fi pjattaforma effettiva għal negozjati li jistgħu jtemmu l-gwerra, fuq il-bażi tal-Karta tan-Nazzjonijiet Maqgħuda.

“Il-komunità internazzjonali għandha rwol importanti fil-ħarsien tas-sovranità u l-integrità territorjali fl-Ukrajna. Irridu nkomplu ninsistu li nżommu l-ordni bbażata fuq id-dritt," żied jgħid il-Ministru Ian Borg.

STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Il-qagħda umanitarja mwiegħra tal-Palestinjani f’Gaża u Rafah laħqet livell katastrofiku – il-Ministru Ian Borg
STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Il-qagħda umanitarja mwiegħra tal-Palestinjani f’Gaża u Rafah laħqet livell katastrofiku – il-Ministru Ian Borg
Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow