STQARRIJA MILL-MINISTERU GĦALL-EDUKAZZJONI, L-ISPORT, IŻ-ŻGĦAŻAGĦ, IR-RIĊERKA U L-INNOVAZZJONI U S-SEGRETARJAT PARLAMENTARI GĦALL-GVERN LOKALI Iffirmat ftehim li se jwassal biex il-parkeġġ ta’ żewġ skejjel fil-Ħamrun jintuża mill-komunità
Ġie ffirmat ftehim li se jwassal biex il-komunità tal-Ħamrun tkun tista' tagħmel użu mill-parkeġġ tal-iskola Ex-Liceo Secondary School u Ex-Maria Assumpta Secondary Complex. Il-ftehim mhux se jaffettwa l-użu tal-parkeġġi mill-edukaturi u mill-amministrazzjoni tal-iskejjel u lanqas meta jkun hemm attivitajiet tal-massa organizzati mill-iskejjel.
Il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima qal, “Dan il-ftehim huwa parti mill-ħidma tagħna li nqarrbu l-edukazzjoni mal-komunità u dan qed nagħmluh b'diversi mezzi. F'kull skola li qed nimmodernizzaw kif ukoll f'dawk li qed nibnu ġodda, fejn huwa possibbli qed niftħu l-faċilitajiet għall-użu tal-komunitajiet rispettivi. Nemmnu li l-ispazji tal-iskejjel għandhom ikunu disponibbli għall-komunità fil-ħin li dawn ma jkunux qed jintużaw għall-edukazzjoni ta' uliedna."
Huwa spjega li fost il-faċilitajiet li hemm disponibbli għall-użu tal-komunità hemm dawk sportivi, swali u spazji oħra. Anke l-parkeġġi tal-vetturi, bħalma qed isir permezz tal-ftehim li ġie ffirmat, il-Ministeru qed jara li dawn ma jkunux spazji vojta fil-ħin li ma jkunux qed jintużaw.
Min-naħa tagħha, is-Segretarju Parlamentari għall-Gvern Lokali Alison Zerafa Civelli faħħret dan il-ftehim bejn iż-żewġ skejjel u l-Kunsill Lokali tal-Ħamrun li se jkompli jtejjeb il-kwalità tal-ħajja tar-residenti Ħamruniżi. Hija qalet li l-ispazji ta' parkeġġ bla ħlas f'lokalità urbana bħall-Ħamrun se jtejjeb b'mod sinifikanti l-konvenjenza għar-residenti.
“Filwaqt li għandi fiduċja li dan il-ftehim se jsarraf f'serħan il-moħħ għal sidien ta' vetturi residenti l-Ħamrun, nappella biex kull min jagħmel użu minn dan il-parkeġġ isegwi r-regoli u l-ħinijiet tal-parkeġġ" saħqet is-Segretarju Parlamentari Zerafa Civelli.
Il-ftehim jinkludi wkoll dispożizzjonijiet speċifiċi biex jiġi żgurat li l-parkeġġi jkunu siguri u mnaddfa kif suppost. Is-sigurtà se tkun provduta permezz ta' gwardjani tas-sigurtà u kameras ta' sorveljanza.
Is-Sindku tal-Kunsill Lokali tal-Ħamrun Christian Sammut irringrazzja lil dawk kollha li kienu involuti fit-taħditiet li wasslu għal dan il-ftehim. “Dan il-ftehim se jwassal biex tittaffa l-problema ta' nuqqas ta' parkeġġ għall-komunità tal-Ħamrun u għalhekk il-kunsill huwa grat li ntlaqgħet it-talba tiegħu u li permezz tal-ftehim din il-komunità se tkun moqdija aħjar," qal is-Sur Sammut.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261926