STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tingħaqad mal-komunità internazzjonali biex tiċċelebra Jum l-Afrika
“Opportunità biex nirrikonoxxu d-diversità u r-reżiljenza tal-kontinent Afrikan" – il-Ministru Ian Borg
Malta qed tingħaqad mal-komunità internazzjonali biex tfakkar Jum l-Afrika, l-anniversarju minn meta twaqqfet l-Organizzazzjoni tal-Unità Afrikana, fil-25 ta' Mejju 1963.
Il-Ministru għall-Affarijiet Barranin u Ewropej u l-Kummerċ Ian Borg fakkar li Malta diġà tgawdi minn relazzjonijiet bilaterali u ekonomiċi b'saħħithom ma' ħafna pajjiżi Afrikani, filwaqt li enfasizza l-importanza li tkompli tissaħħaħ ir-reputazzjoni ta' Malta bħala sieħeb ta' fiduċja għal kollaborazzjonijiet ġodda bejn l-Unjoni Ewropea u l-Afrika.
“Jum l-Afrika huwa opportunità unika biex nirrikonoxxu u niċċelebraw id-diversità rikka, il-wirt kulturali u r-reżiljenza tal-kontinent Afrikan, u Malta kburija li tinsab maġenb nazzjonijiet Afrikani hekk kif flimkien nistgħu nkomplu negħlbu l-isfidi u naħdmu lejn il-prosperità," qal il-Ministru Ian Borg.
Huwa faħħar ukoll il-kontribut tal-komunità Afrikana f'Malta, hekk kif appella għal aktar impenn interkulturali għall-promozzjoni tad-diversità fil-komunitajiet kollha.
L-Istrateġija Malta-Afrika 2020-2025 tinkoraġġixxi l-kontribut attiv ta' Malta fil-ħolqien ta' sħubijiet ta' kummerċ, investiment u żvilupp sostenibbli li huma ta' benefiċċju reċiproku kemm għal Malta kif ukoll għall-Afrika. F'dan ir-rigward, il-Gvern huwa kommess li jappoġġja l-Għanijiet ta' Żvilupp Sostenibbli, partikolarment f'edukazzjoni ta' kwalità, ugwaljanza bejn is-sessi u azzjoni klimatika, sabiex jiġi żgurat tkabbir inklussiv u sostenibbli madwar l-Afrika.
Malta hija konxja wkoll mill-isfidi kumplessi li jaffaċċjaw reġjuni bħas-Saħel, il-Baħar l-Aħmar, u l-Lagi l-Kbar, u tesprimi solidarjetà u appoġġ għal inizjattivi li jippromwovu l-istabbiltà, il-paċi u l-iżvilupp sostenibbli f'dawn iż-żoni. Malta tappoġġja wkoll l-inizjattivi tal-Unjoni Ewropea mmirati lejn il-promozzjoni tal-paċi, l-istabbiltà u l-iżvilupp sostenibbli fl-Afrika. Ir-rwol ta' Malta, bħala membru mhux permanenti tal-Kunsill tas-Sigurtà tan-Nazzjonijiet Maqgħuda, wkoll qed jenfasizza l-impenn ta' pajjiżna li jippromwovi temi Afrikani fix-xena globali.
F'Marzu 2024, il-President Emeritus George Vella żar il-Ghana, filwaqt li l-Ministru għall-Affarijiet Barranin Ian Borg żar l-Etjopja. Matul iż-żjara tiegħu, il-Ministru kellu laqgħat għolja ma' uffiċjali ewlenin tal-gvern Etjopjan biex jissaħħu r-rabtiet diplomatiċi u titrawwem iżjed kooperazzjoni. Fl-istess xahar, Trade Malta organizzat ukoll żjara kummerċjali fl-Etjopja, biex tkompli ssaħħaħ ir-rabtiet kummerċjali u tesplora opportunitajiet ġodda għall-kumpaniji bbażati f'Malta.
F'April, il-Ministru Ian Borg laqa' wkoll lill-Ministru tal-Affarijiet Barranin u l-Kooperazzjoni Internazzjonali tar-Rwanda f'Malta għal diskussjonijiet dwar kwistjonijiet bilaterali u reġjonali. Din is-sena timmarka wkoll il-ħatra tal-ewwel Kummissarju Għoli mhux residenti ta' Malta fin-Namibja, li tkompli tespandi s-sehem diplomatiku ta' Malta f'dan ir-reġjun tal-Afrika.
Stqarrijiet Oħra:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261926