Left arrow Mur Lura

STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI ​ Imnedija l-programmi għas-sajf għaż-żgħażagħ

pr240876
Date Icon 22/05/2024

Bħala parti mill-Politika Nazzjonali taż-Żgħażagħ, Aġenzija Żgħażagħ nediet il-programmi għas-sajf għaż-żgħażagħ, ‘Dive into Summer’, bil-għan li jiksbu diversi ħiliet li jkunu jistgħu jużaw matul ħajjithom. Dawn il-programmi tnedew mis-Segretarju Parlamentari għaż-Żgħażagħ, ir-Riċerka u l-Innovazzjoni, Keith Azzopardi Tanti, flimkien mal-Kap Eżekuttiv tal-Aġenzija Żgħażagħ, Miriam Teuma.

Il-programmi huma miftuħa għal żgħażagħ ta’ bejn it-12 u s-16-il sena, u bil-parteċipazzjoni tagħhom iż-żgħażagħ jistgħu jiksbu abbiltajiet ġodda u jitgħallmu dwar suġġetti varji bħal: l-etika, it-teknoloġija u kif taħdem f’tim.

Is-Segretarju Parlamentari Keith Azzopardi Tanti qal, “L-għan ta’ dawn il-programmi huwa li jgħin liż-żgħażagħ ikollhom aktar kunfidenza fihom infushom. Billi jipparteċipaw b’mod attiv, mhux biss jiksbu ħiliet ġodda iżda wkoll jiskopru l-abbiltajiet tagħhom, li huma kruċjali għat-tkabbir personali u professjonali tagħhom”.

Is-sena li għaddiet aktar minn 550 żagħżugħ u żagħżugħa attendew għall-programmi tas-sajf. Din is-sena l-aġenzija se twassal 18-il programm varjat f’erba’ postijiet: Santa Venera, l-Imsida, il-Birgu u Għajnsielem.

Dawn il-programmi jkopru firxa wiesgħa ta’ suġġetti, mill-iżvilupp personali sal-komunikazzjoni, kif ukoll il-ħsieb kreattiv u kritiku. Kull programm huwa mfassal biex jipprovdi liż-żgħażagħ b’opportunitajiet biex jiskopru u jtejbu l-kapaċitajiet u l-ħiliet tagħhom permezz ta’ diversi mezzi bħad-drama, il-podcasting u l-midja soċjali.

Il-Kap Eżekuttiv Miriam Teuma spjegat li l-aġenzija tara li tuża l-edukazzjoni mhux formali u toffri programmi li jagħtu ħiliet liż-żgħażagħ biex jikkumplimentaw il-bżonnijiet tas-soċjetà kif ukoll għall-futur. Bħala eżempju semmiet il-ħiliet diġitali li dan is-sajf l-aġenzija se tkun qed twassalhom b’diversi modi, fosthom bl-użu tar-realtà virtwali.

Il-parteċipazzjoni f’dawn il-programmi mhix biss vjaġġ ta’ tkabbir personali iżda wkoll opportunità biex ikomplu jkabbru l-profil edukattiv tagħhom. Iż-żgħażagħ jistgħu jinkludu l-involviment tagħhom f’dawn il-programmi fiċ-ċertifikat tal-iskola sekondarja, u dan jirrifletti l-impenn tagħhom għall-attivitajiet extrakurrikulari.

Għal aktar informazzjoni u biex tirreġistra għall-programmi tista’ tidħol hawn: https://forms.office.com/pages/responsepage.aspx?id=9dnNNLhdvEmsugH2XMpoDd6rXM0pqTxKpLlUcIjWDqhUQUFOSVEyNlQzVkJMN1dVVVZESkI0MDlJSC4u

STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI ​ Imnedija l-programmi għas-sajf għaż-żgħażagħ
STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI ​ Imnedija l-programmi għas-sajf għaż-żgħażagħ
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow