STQARRIJA MILL-MINISTERU GĦALL-INTERN, IS-SIGURTÀ U X-XOGĦOL Ftehim kollettiv b'benefiċċji akbar għall-ħaddiema tal-Aġenzija għas-Servizzi ta' Detenzjoni
Il-ħaddiema tal-Aġenzija għas-Servizzi ta' Detenzjoni se jibbenefikaw minn drittijiet, kundizzjonijiet u salarji aħjar grazzi għall-iffirmar ta' ftehim kollettiv ġdid. Fost l-oħrajn, l-aġenzija tamministra u tieħu ħsieb l-operat taċ-ċentri magħluqa ta' detenzjoni.
Fi Frar tas-sena li għaddiet, dak li qabel kien dipartiment tal-gvern inbidel f'aġenzija bil-ftehim kollettiv li ġie ffirmat ikun l-ewwel wieħed għall-ħaddiema ta' din l-aġenzija minn meta seħħ dan l-iżvilupp.
Permezz tal-ftehim kollettiv, il-ħaddiema tal-aġenzija se jibbenefikaw minn progress aħjar fil-karriera u għarfien permezz ta' titjib sostanzjali fis-salarji u fl-allowance.
Preżenti għall-iffirmar tal-ftehim kollettiv kien hemm il-Ministru għall-Intern, is-Sigurtà u x-Xogħol, Byron Camilleri, li qal li l-ftehim huwa wieħed minn kullana ta' rekord ta' ftehimiet li l-gvern iffirma mal-għaqdiet tal-ħaddiema li jaħdmu fil-qasam tas-sigurtà ta' pajjiżna.
“Dan hu ftehim ieħor importanti mal-ħaddiema, ftehim li tmexxa mit-Taqsima tar-Relazzjonijiet Industrijali tal-amministrazzjoni pubblika flimkien mal-unjin u l-uffiċjali li jirrappreżentaw lill-istess ħaddiema. B'kuntrast għal snin ilu, fejn il-ħaddiema f'din l-aġenzija ma kellhomx kuntratt fiss u setgħu jitwaqqfu ħesrem mix-xogħol, illum dawn il-ħaddiema huma rikonoxxuti għall-ħidma importanti li huma jwettqu, b'kundizzjonijiet u salarji aħjar", qal il-Ministru Camilleri.
Is-Segretarju tat-Taqsima fil-General Workers' Union, Theo Vella, qal li permezz ta' dan il-ftehim kollettiv, fl-Aġenzija għas-Servizzi ta' Detenzjoni sar pass importanti ieħor fejn l-uffiċjali tad-detenzjoni qed jagħmlu qabża oħra fil-kundizzjonijiet tax-xogħol tagħhom. Is-Sur Vella rrikonoxxa l-koperazzjoni sħiħa mill-amministrazzjoni tal-aġenzija, kif ukoll mill-Gvern, biex kien issiġillat ftehim kollettiv ma' grupp ieħor ta' ħaddiema li jservu fis-sigurtà ta' pajjiżna.
Preżenti għal dan l-iffirmar kien hemm ukoll is-Segretarju Permanenti fil-Ministeru għall-Intern, is-Sigurtà u x-Xogħol, Joyce Dimech, is-Segretarju Permanenti Joyce Cassar u uffiċjali oħra fl-Uffiċċju tal-Prim Ministru (People and Standards), flimkien mas-Segretarju Ġenerali tal-General Workers' Union, Josef Bugeja, u rappreżentanti oħra tal-ħaddiema fl-Aġenzija għas-Servizzi ta' Detenzjoni.
Stqarrijiet Oħra:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261926