Left arrow Mur Lura

STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tiċċelebra 20 Sena ta’ Sħubija fl-Unjoni Ewropea

pr240746
Date Icon 03/05/2024

Il-Ministru Ian Borg jirrifletti fuq għoxrin sena ta' progress u kisbiet notevoli fi ħdan il-komunità Ewropea

“Qegħdin niċċelebraw dan il-vjaġġ ta' 20 sena mhux biss bħala mogħdija taż-żmien iżda bħala xempju tal-kisbiet kollettivi tagħna u tal-aspirazzjonijiet konġunti u l-impenn tagħna lejn il-valuri Ewropej li tant inħaddnu." Dan qalu l-Ministru għall-Affarijiet Barranin u Ewropej u l-Kummerċ Ian Borg waqt konferenza fl-Aula Magna, fil-Kampus tal-Belt Valletta fejn irrifletta fuq għoxrin sena ta' progress u kisbiet notevoli fi ħdan il-komunità Ewropea u tkellem dwar it-triq 'il quddiem fejn Malta tibqa' impenjata lejn il-valuri Ewropej ta' solidarjetà, għaqda u kooperazzjoni.

“Minn mindu ngħaqdet mal-UE fl-1 ta' Mejju 2004, Malta għaddiet minn vjaġġ trasformattiv, b'transizzjoni lejn pajjiż Ewropew modern filwaqt li ppreservat l-istorja u l-kultura rikka tagħha," qal il-Ministru Borg fejn kompla jgħid li d-deċiżjoni li tissieħeb fl-UE kienet tissimbolizza l-aspirazzjonijiet ta' Malta għal kooperazzjoni usa', stabbiltà, u prosperità lil hinn mill-fruntieri tagħha.

Il-Ministru Borg spjega kif is-sħubija ta' Malta fl-UE mhux biss mexxa l-iżvilupp ekonomiku tal-pajjiż iżda saħħet ukoll in-nisġa soċjali tiegħu u saħħet il-pożizzjoni globali tiegħu. “Malta esperjenzat tkabbir ekonomiku u prosperità, b'aċċess għas-Suq Uniku u l-użu strateġiku tal-Fondi tal-UE għall-infrastruttura u l-iżvilupp soċjali," qal Dr Borg.

Saru referenzi wkoll għal inizjattivi oħra bħall-Programm Erasmus+, fejn il-Ministru Borg saħaq kif dan iffaċilita l-iskambju kulturali u t-tagħlim, saħħaħ is-sens nazzjonali ta' Malta u rawwem il-kooperazzjoni bejn il-fruntieri, u offra liċ-ċittadini Maltin mobilità u opportunitajiet edukattivi.

Il-Ministru Borg innota wkoll li Malta dejjem uriet il-valur tagħha b'mod konsistenti, u semma l-involviment f'deċiżjonijiet ewlenin u s-suċċessi li nkisbu matul is-snin, mhux b'inqas meta Malta mexxiet il-Presidenza tal-Kunsill tal-UE lura fl-2017. Suġġetti oħra diskussi waqt il-konferenza inkludew sfidi bħall-migrazzjoni, dibattiti dwar is-sovranità, u miri klimatiċi. Dr Borg saħaq li dawn l-isfidi jeħtieġu soluzzjonijiet Ewropej u enfasizza fuq l-importanza tal-għaqda u s-solidarjetà fost l-istati membri.

Fl-aħħar nett, il-Ministru Borg esprima wkoll id-determinazzjoni ta' Malta li tkompli tipparteċipa b'mod attiv fit-tiswir tal-futur tal-Unjoni Ewropea, filwaqt li enfasizza l-importanza tad-djalogu, il-paċi, u l-prosperità għaċ-ċittadini kollha, elementi ewlenin li Malta wkoll qed timbotta 'l quddiem fir-rwol doppju attwali tagħha fil-Presidenza tal-OSCE u s-sħubija fil-Kunsill tas-Sigurtà tan-Nazzjonijiet Maqgħuda.

STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tiċċelebra 20 Sena ta’ Sħubija fl-Unjoni Ewropea
STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tiċċelebra 20 Sena ta’ Sħubija fl-Unjoni Ewropea
STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ Malta tiċċelebra 20 Sena ta’ Sħubija fl-Unjoni Ewropea
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 student jieħdu sehem fil-Malta Skills Championships 2026

PR261928

STQARRIJA MILL-MINISTERU GĦALL-EDUKAZZJONI U L-ISPORT Aktar minn 320 studen...

Aktar Stqarrijiet Right arrow