STQARRIJA MILL-MINISTERU GĦALL-EDUKAZZJONI, L-ISPORT, IŻ-ŻGĦAŻAGĦ, IR-RIĊERKA U L-INNOVAZZJONI Tmexxija ġdida għaċ-Ċentru tar-Riżorsi Guardian Angel
Wara li ġie konkluż ir-rapport ta’ Fact Finding, kompost minn professjonisti indipendenti, imwaqqaf mill-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni dwar is-sitwazzjoni fiċ-Ċentru tar-Riżorsi Guardian Angel, saret l-analiżi meħtieġa tar-rapport, kemm tal-fatti li ġew identifikati, kif ukoll ta’ numru ta’ rakkomandazzjonijiet li ħarġu minn dan ir-rapport.
Tajjeb li wieħed ifakkar li f’Diċembru tal-2022 kien sar eżerċizzju ffukat fuq Leadership u Management f’dan iċ-Ċentru ta’ Riżorsi. F’dan l-eżerċizzju kienu involuti, l-membri tal-SLT (Senior Leadership Team), l-edukaturi u l-LSEs, u professjonisti li jżuru l-iskejjel fuq bażi regolari. Kien sar ukoll kwestjonarju mal-partijiet kollha interessati. Dan ir-rispons ġie diskuss, evalwat u mfassal f’rapport komprensiv. Dan ir-rapport kien jinkludi azzjonijiet kif ukoll rakkomandazzjonijiet meħtieġa biex ikun hemm titjib għall-benefiċċju kemm tat-tmexxija, l-edukaturi u LSEs u l-istudenti li jattendu din l-istituzzjoni edukattiva. Numru ta’ rakkomandazzjonijiet fil-fatt kienu implimentati.
Biex ikompli jħares il-benesseri tal-edukaturi u l-istudenti, f’Jannar li għadda l-Ministeru ħa wkoll deċiżjoni li jinnomina Fact Finding Board, li issa ppreżenta r-rapport tiegħu.
Ir-rakkomandazzjonijiet li saru jittrattaw tibdil meħtieġ b’mod immedjat fit-tmexxija kollha ta’ dan iċ-Ċentru. Saret rakkomandazzjoni wkoll li fejn huwa possibbli għandu jibda jintuża mekkaniżmu differenti ta’ kif jiġu allokati ħaddiema li huma qraba. Kien rakkomandat aġġustament fir-ratios, kif inhuma stabbiliti permezz tal-ftehim settorjali li jwasslu għal żieda ta’ staff, kif ukoll jiġi intensifikat l-ammont ta’ taħriġ għall-edukaturi kollha li jaħdmu f’dan iċ-Ċentru.
Dan għandu jinkludi ukoll team building sessions u interventi minn professjonisti oħra skont il-bżonn. Rakkomandazzjoni oħra hija dwar streamlining fejn jidħol l-assessjar inizjali tal-istudenti u l-bini ta’ profil ħolistiku għal kull student. L-aħħar rakkomandazzjoni hija dwar ir-rappurtaġġ mit-tmexxija taċ-Ċentru, biex ikun hemm rappurtaġġ lil line manager wieħed.
Wara li kienu diskussa u analizzati b’mod immedjat ir-rakkomandazzjonijiet li saru, kien deċiż li min nhar it-Tnejn 29 ta’ April 2024 se jkun hemm tmexxija ġdida fiċ-Ċentru ta’ Riżorsi Guardian Angel. It-tmexxija l-ġdida se jkollha prijorità li tara li jittieħdu l-passi meħtieġa skont ir-rakkomandazzjonijiet li saru, għall-aħjar interess tal-istudenti u l-edukaturi infushom.
Matul il-ġimgħat li ġejjin, il-Ministeru se jieħu wkoll id-deċiżjonijiet meħtieġa biex numru ta’ Standard Operating Procedures (SOPs), policies u mekkaniżmi jkunu jistgħu jiġu modifikati wkoll skont ir-rakkomandazzjonijiet tal-Fact Finding Board.
Se ssir ukoll ħidma intensiva mill-Ministeru biex it-tmexxija il-ġdida, l-edukaturi kif ukoll l-istudenti jingħataw l-appoġġ kollu meħtieġ f’dan iż-żmien biex jiġi żgurat livell ta’ edukazzjoni għoli.
Stqarrijiet Oħra:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261928