STQARRIJA MILL-MINISTERU GĦALL-POLITIKA SOĊJALI U D-DRITTIJIET TAT-TFAL Tnaqqis fiċ-ċaħda materjali u soċjali – l-anqas livell qatt irreġistrat ta’ Ċaħda Materjali u Soċjali Severa
Il-Ministeru għall-Politika Soċjali u d-Drittijiet tat-Tfal jinnota b'sodisfazzjon kbir it-tnaqqis irreġistrat matul l-2023 fir-rata taċ-Ċaħda Materjali u Soċjali Severa kif ukoll fir-rata ta' Ċaħda Materjali u Soċjali.
Ċifri tal-Uffiċju Nazzjonali tal-Istatistika, NSO ippubblikati llum juru r-rata taċ- Ċaħda Materjali u Soċjali Severa naqset minn 4.9% fl-2022 għal 4.1% fl-2023, tnaqqis ta' 3,517-il persuna. Din hija l-anqas rata rreġistrata mill-2017 'il hawn meta dan il-kejl daħal fis-seħħ skont parametri mibdula tal-Unjoni Ewropea dwar dħul u kundizzjonijiet tal-għajxien tal-familji.
Anke ir-rata ta' Ċaħda Materjali u Soċjali niżlet minn 9.6% fl-2022 għal 9.2% fl-2023. Din hija l-anqas rata mill-2019 'l hawn.
Iċ-ċifri tal-NSO jitfgħu dawl fuq kemm persuni affordjaw jew m'affordjawx numru ta' oġġetti bħal jixtru ħwejjeġ jew żraben ġodda, iħallsu biex imorru għal xi ikla mal-qraba jew ħbieb tagħhom għal mill-anqas darba f'xahar, iħallsu għall-bżonnijiet tagħhom jew li jkollhom servizz tal-internet. F'dawn is-sitt kategoriji, l-għadd ta' persuni li wieġbu pożittivament li jaffordjaw dawn l-ispejjeż kien wieħed għoli b'perċentwali li jvarjaw bejn 65% għal 94%.
Iċ-ċifri fil-fatt juru wkoll li naqas l-għadd ta' familji li ma jaffordjawx iħallsu għal btala ta' ġimgħa, naqsu dawk li ma jaffordjawx isaħħnu darhom, naqsu dawk li waqgħu lura fil-ħlasijiet ta' pagamenti jew kontijiet, naqsu dawk li ma jaffordjawx jibdlu xi għamara f'darhom, naqsu dawk li ma jaffordjawx jixtru ħwejjeġ jew żraben ġodda, u naqsu dawk li ma jaffordjawx iħallsu biex imorru għal xi ikla mal-qraba jew ħbieb tagħhom għal mill-anqas darba f'xahar.
Dan it-tnaqqis fiċ-ċaħda materjali u soċjali kien irreġistrat l-iżjed fost l-anzjani u fost il-ħaddiema.
Fuq in-naħa l-oħra ċ-ċifri jindikaw li qabel id-dħul tal-mekkaniżmu addizzjonali kontra l-għoli tal-ħajja kien żdied in-numru ta' familji li ma kinux jaffordjaw jieklu laħam jew ħut kull jumejn jew li jaffordjaw spiża mhux mistennija. Dan ċertament kien riżultat tal-inflazzjoni għolja li konna għaddejjin minna f'pajjiżna fil-perjodu tal-istħarriġ, inflazzjoni ikkawżata mill-instabbilità u l-inċertezza madwar id-dinja.
Minkejja dan, ir-rati u n-numri ta' dawk li m'affordjawx dawn l-oġġetti jew attivitajiet fl-2023 kienu sostanzjalment anqas minn kemm kienu fl-2013, kif muri fit-tabella t'hawn taħt:
| 2013 | 2023 | Tnaqqis 2013 - 2023 | ||||
| Persuni li ma jaffordjawx | % | Numru ta' persuni | % | Numru ta' persuni | % | Numru ta' persuni |
| Ilaħħqu ma' spejjeż li jinqalgħu għall-għarrieda | 23.0 | 95,225 | 15.9 | 84,570 | 7.1 | 10,655 |
| Iħallsu għal btala ta' ġimgħa 'l bogħod mid-dar | 55.9 | 231,183 | 30.0 | 159,485 | 25.9 | 71,698 |
| Iħallsu self fuq dar jew kera, kontijiet tad-dawl u l-ilma, u ħlasijiet fuq xiri u self | 12.5 | 51,842 | 5.7 | 30,564 | 6.8 | 21,278 |
| Jieklu laħam, tiġieġ u ħut kull jumejn | 15.3 | 63,403 | 9.4 | 50,214 | 5.9 | 13,189 |
| Isaħħnu darhom fix-xitwa | 23.9 | 99,013 | 6.8 | 35,959 | 17.2 | 63,054 |
Mitlub jikkummenta, il-Ministru għall-Politika Soċjali u d-Drtittijiet tat-Tfal Michael Falzon stqarr li huwa sodisfatt bil-fatt liċ-ċaħda materjali u soċjali, inkluż dik severa, reġgħu naqsu anke fl-2023 u jinsabu fl-anqas livelli. Huwa nnota wkoll b'sodisfazzjon it-titjib irreġistrat fost l-anzjani grazzi għal għexieren ta' miżuri immirati għalihom.
Minkejja dan, il-Ministru Michael Falzon innota l-fatt li l-inflazzjoni li feġġet fil-perjodu tal-istħarriġ speċjalment fil-prezzijiet tal-ikel ħalliet impatt fuq il-familji, l-aktar dawk fil-faxxa ta' isfel.
Il-Ministru Falzon tenna li għal din ir-raġuni, minbarra li l-Gvern baqa' jissussidja l-prezzijiet tal-enerġija u l-qmuħ u ċ-ċereali, lejn l-aħħar tal-2022 beda jitħallas benefiċċju ġdid maħsub biex familji u persuni bi dħul baxx jew medju jkunu jistgħu jlaħħqu aħjar mal-effetti tal-inflazzjoni.
Dan il-benefiċċju kompla jissaħħaħ u jitwessa' fl-2023 u fil-fatt minnu gawdew madwar 96,000 familja li bejniethom tħallsu aktar minn €20 miljun. Dan il-benefiċċju ser jitħallas mill-ġdid f'Mejju li ġej u se jkompli jitħallas kull sena biex b'hekk il-Gvern se jkompli jkun ta' spalla għal kulħadd, speċjalment dawk li l-aktar għandhom bżonnha. Dan minbarra l-ftehim għall-istabbilità fil-prezzijiet li qed jgħin ukoll sabiex ikun hemm roħs fi prezzijiet ta' 450 prodott essenzjali tal-ikel.
Il-Ministru Michael Falzon temm jgħid li huwa għalhekk ukoll liċ-ċifri ta' ċaħda materjali u soċjali, inkluż dik severa, huma fl-anqas livelli tagħhom u huma sostanzjalment anqas minn kif kienu fl-2013.
*Ir-rati tal-NSO huma ibbażati fuq stħarriġ li sar fl-2023 fost madwar 4,000 familja u li kkunsidra d-dħul tal-familji fl-2022. Permezz ta' kwestjonarju l-familji jintalbu jwieġbu dwar kemm ikunu jaffordjaw ilaħħqu mal-ispejjeż ta' 13-il oġġett jew attività li bihom jitkejjel il-livell ta' ċaħda materjali u soċjali.
Jekk fir-rispons dwar mill-anqas 5 mill-mistoqsijiet tkun fin-negattiv, dawk il-familji jitqiesu li huma mċaħħda materjalment u soċjalment. Jekk ir-rispons fin-negattiv ikun dwar 7 mistoqsijiet jew aktar, jitqiesu li huma mċaħħda materjalment u soċjalment b'mod sever.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261928