STQARRIJA MILL-MINISTERU GĦALL-EDUKAZZJONI, L-ISPORT, IŻ-ŻGĦAŻAGĦ, IR-RIĊERKA U L-INNOVAZZJONI Qed jitqassmu 10,000 ktieb fl-iskejjel primarji fl-edizzjoni ta’ din is-sena tal-Qaritona Nazzjonali
Waqt l-edizzjoni ta' din is-sena tal-Qaritona Nazzjonali qed jitqassmu aktar minn 10,000 kopja ta' ħrejjef oriġinali fl-iskejjel primarji kollha tal-gvern. Il-ktieb, Ħerba f'Art il-Ħrejjef, miktub minn Benjamin Portelli, huwa maħsub biex iħeġġeġ lit-tfal jintilfu fid-dinja tal-qari u jħeġġiġhom jużaw it-talenti tagħhom biex jipproteġu d-dinja.
Il-Qaritona Nazzjonali hija organizzata mill-Malta Trust Foundation u l-Aġenzija Nazzjonali tal-Litteriżmu fi ħdan il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u din hija s-seba' edizzjoni tagħha. L-inizjattiva hija mmirata biex tistimula l-kreattività tat-tfal, trawwem fihom l-imħabba lejn il-kotba u l-qari u din is-sena għandha l-għan ukoll li taqsam ideat għal ambjent aktar ekoloġiku u b'saħħtu.
It-tnedija saret fl-iskola primarja ta' Pembroke mill-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima u l-President Emeritu Marie-Louise Coleiro Preca Chairperson ta' The Malta Trust Foundation. It-tema magħżula għal din is-sena hija READ - Any time, Any Place.
“Il-Qaritona Nazzjonali hija inizjattiva mill-aqwa u mezz ieħor, flimkien ma' dawk meħuda mill-Agenzija Nazzjonali tal-Litteriżmu, li tkattar imħabba lejn il-qari fost l-istudenti. Hija l-missjoni ewlenija tagħna bħala gvern li naraw li l-edukazzjoni tasal għand kulħadd – kull forma ta' edukazzjoni. L-edukazzjoni tieħu diversi forom – u huwa żgur li l-qari huwa l-bażi ta' edukazzjoni sana", qal il-Ministru Clifton Grima waqt it-tnedija ta' din l-edizzjoni tal-Qaritona.
Il-Ministru Grima esprima wkoll ix-xewqa li aktar tfal jinteressaw ruħhom fil-kitba, bħall-awtur tal-ktieb li qed jitqassam fl-iskejjel. Fil-fatt l-awtur, Benjamin Portelli kiteb il-ktieb meta kellu 17-il sena.
Min-naħa tagħha, il-President Emeritu Marie-Louise Coleiro Preca qalet, “Nittama li l-Qaritona tagħti l-ġwienaħ lill-ħolm tat-tfal biex jesploraw u jkabbru l-orizzonti tagħhom. Il-qari huwa ċ-ċavetta għall-għarfien u huwa importanti wkoll għall-iżvilupp tat-tfal."
Il-Qaritona se tibqa' għaddejja fl-iskejjel kollha sa Mejju u għandha bħala maskot lil Ben il-Ballotra; il-ballotra li hija speċi li qed tgħib f'Malta.
L-awtur tal-ktieb li qed jitqassam, Benjamin Portelli, li jagħlaq 19-il sena aktar tard dan ix-xahar, kiteb din il-ħrafa bit-tama li t-tfal isiru konxji u interessati fil-kunċett tar-responsabbiltà ambjentali b' mod impenjattiv. “Għażilt li nibbaża l-istorja fil-ħrejjef klassiċi minħabba li servew bħala l-introduzzjoni tiegħi stess għal-letteratura. Il-ħrejjef iservu wkoll l-iskop li jedukaw lit-tfal fuq il-morali u l-valuri", qal Benjamin Portelli.
Għat-tnedija kien hemm preżenti wkoll David Muscat, il-Kap Eżekuttiv tal-Aġenzija Nazzjonali tal-Litteriżmu.
Stqarrijiet Oħra:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en