STQARRIJA MILL-MINISTERU GĦALL-INKLUŻJONI U L-VOLONTARJAT U MIS-SEGRETARJAT GĦALL-UGWALJANZA U R-RIFORMI Stabbilit il-Malta Diversity & Inclusion Charter b’għajnuna finanzjarja mill-Kunsill Malti għas-Settur tal-Volontarjat
Ġie stabbilit il-Malta Diversity & Inclusion Charter mill-għaqda volontarja CORE Platform b'għajnuna finanzjarja ta' €20,000 mill-fond VOPS amministrat mill-Kunsill Malti għas-Settur tal-Volontarjat. Din l-inizjattiva innovattiva għandha l-għan li trawwem id-diversità u l-inklużjoni f'setturi varji. It-tnedija ta' dan iċ-Charter ġiet imħabbra mill-Ministru għall-Inklużjoni u l-Volontarjat Julia Farrugia Portelli u s-Segretarju Parlamentari għall-Ugwaljanza u r-Riformi Rebecca Buttigeg, fil-preżenza tal-President tal-għaqda CORE Platform Helga Ellul.
L-organizzazzjonijiet li jintrabtu ma' dan iċ-Charter jimpenjaw ruħhom li jħarsu l-prinċipji tad-diversità u l-inklużjoni fl-operat tagħhom Id-Direttorat tad-Drittijiet tal-Bniedem se jkun l-ewwel entità pubblika li se tappoġġja u tkun firmatarja taċ-Charter għat-tliet snin li ġejjin filwaqt li l-bank APS se jkun l-ewwel entità kummerċjali lokali li se jkun firmatarju ta' dan iċ-Charter. Uħud mill-miżuri li hemm f'dan iċ-Charter jinkludu l-implimentazzjoni ta' prattiċi tal-Human Resources fejn id-diversità titpoġġa fiċ-ċentru tal-operat u fejn l-inklużjoni tiġi enfasizzata mal-impjegati kollha, flimkien ma' miżuri oħra biex ikunu żgurati opportunitajiet indaqs f'kull pass tal-karrieri tal-impjegati. Dan isir permezz ta' għażla, reklutaġġ u proċeduri u li għandhom fiċ-ċentru tagħhom l-inklużjoni.
Il-Ministru Julia Farrugia Portelli faħħret din l-inizjattiva filwaqt li enfasizzat il-bżonn ta' aktar inklużjoni fuq il-post tax-xogħol. “Ta' min jieħu inkunsiderazzjoni l-fatt li l-post tax-xogħol huwa dak il-post li fih inqattgħu parti sew mill-ħin ta' kuljum u huwa kruċjali li naċċertaw li apparti li l-ambjent ikun wieħed li jħares l-inklużjoni u l-ugwaljanza, il-kultura ta' kuljum u l-operat li bih titmexxa l-kumpanija ma jkun xejn anqas. Inħares 'il quddiem li mhux biss nara aktar proġetti ta' din ix-xorta jkomplu jieħdu l-ħajja, iżda li nara aktar kumpaniji u negozji ta' kull daqs isiru firmatarji ta' dan iċ-charter," sostniet il-Ministru Julia Farrugia Portelli.
Is-Segretarju Parlamentari Rebecca Buttigieg qalet li dan iċ-Charter, li kien imwiegħed fil-programm elettorali tal-Gvern elett, ikompli mal-kullana ta' inizjattivi favur l-inklussività u d-diversità fil-mixja kontinwa biex jinbidlu ċerti mentalitajiet. Hija ħeġġet lill-firmatarji ta' dan iċ-Charter biex fl-operat kollu tagħhom jaraw li ma jkunx hemm xejn li jfixkel il-valuri tal-inklussività u jiżguraw li kulħadd ikun valutat u rispettat. Hija qalet li l-vantaġġ għal firmatarji ser ikun l-opportunità li jkunu parti minn pjattaforma Ewropea li tiffaċilita l-kollaborazzjoni ma' firmatarji ta' charters simili fl-istati membri oħra tal-Unjoni Ewropea.
Il-President tal-għaqda volontarja CORE Platform Helga Ellul qalet, “Illum jimmarka pass importanti fil-vjaġġ kollettiv tagħna lejn il-ħolqien ta' soċjetà aktar inklussiva, fejn kull individwu jkun stmat u rispettat irrispettivament mill-isfond, it-twemmin, jew il-kapaċitajiet tiegħu. Iċ-Charter imħabbar llum jinkorpora l-impenn tagħna biex nippromwovu d-diversità, l-ekwità, u l-inklużjoni fl-aspetti kollha ta' ħajjitna, kemm jekk fil-post tax-xogħol, fl-edukazzjoni, jew fl-ispazji pubbliċi."
Stqarrijiet Oħra:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en