Left arrow Go Back

STQARRIJA MILL-MINISTERU GĦALL-ĠUSTIZZJA: Ġustizzja effettiva u proporzjonali

pr231860
Date Icon 27/11/2023

Imressaq abbozz ta’ liġi li jemenda varji liġijiet dwar ir-rikavat mill-kriminalità

Il-Ministru għall-Ġustizzja Jonathan Attard, waqt li kien qed jindirizza lill-midja, ippreżenta numru ta’ emendi leġiżlattivi li jemendaw varji liġijiet dwar ir-rikavat mill-kriminalità, bil-għan li joħolqu ġustizzja effettiva u proporzjonali.

“Quddiem diversi sentenzi tal-Qorti ma stajniex ma nwettqux dan l-eżerċizzju ta’ reviżjoni li għandu jwassal għal ġustizzja aktar effettiva u proporzjonali fil-qasam tar-reati finanzjarji”. Il-ministru qal li dawn l-emendi huma ntiżi li joħolqu bilanċ bejn l-interess ġenerali tas-soċjetà u d-drittijiet tal-persuna suspettata jew imputata.

Dan l-abbozz ta’ liġi jemenda numru ta’ liġijiet li jittrattaw reati finanzjarji bħal money laundering, servizzi u swieq finanzjarji u li joħloq proċedura uniformi rigward ordnijiet ta’ sekwestri, iffriżar u konfiska. Il-proċess li wassal għal dan l-abbozz  sar bil-parteċipazzjoni tal-Kummissarju għal-Liġijiet, in-National Coordinating Committee on Combating Money Laundering (NCC), l-Uffiċċju tal-Avukat Ġenerali u l-Uffiċċju tal-Avukat tal-Istat.

Għaldaqstant, dan l-eżerċizzju serva wkoll biex l-entitajiet li huma responsabbli mill-ġlieda kontra r-reati finanzjarji jkollhom għodda leġiżlattiva aġġornata u aktar effettiva għad-dispożizzjoni tagħhom.  

Il-membri tal-midja kienu indirizzati wkoll mill-Kummissarju għal-Liġijiet l-Imħallef Antonio Mizzi li spjega kif il-punt ta’ tluq tal-emendi jsibu l-bażi tagħhom f’diversi sentenzi tal-Qorti Kostituzzjonali u anke dik kriminali, magħdud mal-esperjenzi ta’ dawn l-aħħar snin li uriet li l-liġi qed toħloq sproporzjonalità u żbilanċ bejn it-tfittxija u l-kisba tal-ġustizzja u d-drittjiet tal-imputat.

L-abbozz ta’ liġi li jittratta varji liġijiet dwar ir-rikavat mill-kriminalità ser jikkonsisti minn diversi emendi leġiżlattivi, fosthom:

Ordni ta’ Sekwestru:

• Se jitnaqqas il-perjodu tal-validità tal-ordni ta’ sekwestru bin-nofs, biex issa se jkun hemm terminu wieħed ta’ 6 xhur.

• Se jkun ukoll possibbli li l-ordni ta’ sekwestru tkun varjata u jiġu rilaxxati flus għal għajxien diċenti.

• Se tkun introdotta emenda li tipprovdi li meta ordni ta’ sekwestru jaqa’ jew jiskadi jiġu notifikati mill-qorti s-sekwestratarji kollha awtomatikament u b’hekk is-sekwestratarji jkunu notifikati mill-Qorti li s-sekwestru ma jkunx għadu fis-seħħ. 

Ordni ta’ Iffriżar:

• Prosekuzzjoni trid tiddikjara liema proprjetà jew kemm flus għandhom ikunu ffriżati u jekk ma jsirx dan mal-preżentata jew ċitazzjoni fi żmien 90 ġurnata jew b’estensjoni oħra b’talba lill-Qorti ta’ 90 ġurnata oħra, l-ordni ta’ ffriżar taqa’ fuq rikors tal-imputat;

• Se jkun hemm Dritt ta’ Appell quddiem il-Qorti Kriminali;

• L-ammont / proprjetà ffriżata tista’ tkun varjata fuq talba tal-prosekuzzjoni jew tal-imputat.

• L-imputat jista’ jitlob sa massimu ta’ dik li hija paga annwali medja (determinat mill-ministru minn żmien għal żmien) biex ikun jista’ jgħix ħajja diċenti.

• L-imputat jista’ jagħmel ukoll talba fil-Qorti biex jibqa’ għaddej bin-negozju, kummerċ u professjoni.

• It-talbiet għal spejjeż rikorrenti, bħal loans, insurance, school fees, etċ. jistgħu jsiru b’rikors wieħed.

Konfiska

• Il-Qorti Kriminali wara li tiddeċiedi dwar il-ħtija, trid tistabbilixxi wkoll il-valur/kwantum tar-rikavat mir-reat, u tidentifika l-proprjetà, assi jew flus li għandhom ikunu konfiskati.

• Id-dritt ta’ appell se jkun fuq is-sejbien tal-ħtija kif ukoll il-konfiska.

• Terzi persuni se jkollhom id-dritt joġġezzjonaw għall-konfiska ta’ proprjetà li fiha t-terzi jkollhom interess billi jippreżentaw kawża fil-Qorti Ċivili, Prim’Awla (Sezzjoni tal-Irkupru tal-Assi) fi żmien sitt xhur mindu ssir il-konfiska definittiva.

Il-Ministru Attard spjega li l-liġi attwali se tibqa’ applikabbli għal każijiet li jkunu bdew qabel id-dħul fis-seħħ ta’ dawn l-emendi, sakemm l-imputat ma jagħmilx rikors biex ikunu applikati l-proċeduri l-ġodda. F’dak il-każ tkun il-Qorti stess li tiddetermina l-modalità tat-tranżizzjoni.

STQARRIJA MILL-MINISTERU GĦALL-ĠUSTIZZJA: Ġustizzja effettiva u proporzjonali
STQARRIJA MILL-MINISTERU GĦALL-ĠUSTIZZJA: Ġustizzja effettiva u proporzjonali
Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Inawgurat bust ta’ Ġorġ tal-Mużew fl-Isptar Mater Dei b’tifkira tal-ħidma tiegħu fost dawk vulnerabbli

PR261936

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...

PRESS RELEASE BY THE MINISTRY FOR ENERGY, THE ENVIRONMENT AND THE REGENERATION OF THE GRAND HARBOUR  ERA launches anniversary publication: A decade of protecting Malta’s natural future

PR261935en

PRESS RELEASE BY THE MINISTRY FOR ENERGY, THE ENVIRONMENT AND THE REGENERAT...

More Press Releases Right arrow