STQARRIJA MILL-MINISTERU GĦALL-POLITIKA SOĊJALI U D-DRITTIJIET TAT-TFAL: 74 ħaddiem soċjali jingħataw il-warrant
74 ħaddiem soċjali ngħataw il-warrant sabiex issa jistgħu jibdew jipprattikaw il-professjoni ta' social worker, qasam illi tant għandu bżonn aktar ħaddiema fis-settur.
Nhar il-Ġimgħa filgħaxija, il-Ministru għall-Politika Soċjali u d-Drittijiet tat-Tfal Michael Falzon ippreżenta l-warrants lill-istudenti li gradwaw wara li temmew il-kors tagħhom għal dan l-aħħar erba' snin b'suċċess. Kors illi mhux biss jinkludi teorija imma anke sigħat sħaħ ta' prattika f'diversi oqsma soċjali fil-komunità, speċjalment dawk tat-tfal, tal-vizzji, diżabilità u terapija tal-familja, fost ħafna aktar servizzi.
F'Malta hawn mas-700 ħaddiem soċjali li qed jaħdmu fuq bażi full-time, filwaqt li aktar studenti jinsabu fil-perjodu t'esperjenza tax-xogħol ta' sentejn, qabel ma jingħataw il-warrant.
Il-Ministru Michael Falzon faħħar is-sehem ta' kull persuna li tiddedika ħajjitha għal din il-missjoni, illi tagħmel differenza fil-ħajja tan-nies mill-qrib u spjega kif dan il-Gvern qed ikompli jinvesti fis-settur, tant illi żied l-istipendju għal €187 kull erba' ġimgħat.
“Dan il-gvern ser ikompli jagħti sapport lil din il-professjoni bil-għan li jissalvagwardja l-interessi ta' dawk l-aktar vulnerabbli u li jeħtieġu għajnuna kontinwa. Din il-professjoni jixirqilha kull investiment għax minnha nnifisha hija arti ta' smigħ u xjenza ta' tama, u għaldaqstant xejn u ħadd ma jieħu post il-kuntatt uman ma' professjonisti li kapaċi jidħlu fiż-żarbun tal-individwu," temm jgħid il-Ministru Michael Falzon.
Min-naħa tiegħu, iċ-Chairperson tal-Bord tas-Social Workers Mike Orland tenna li l-professjonijiet soċjali bl-integrità tagħhom jagħtu l-aqwa servizz ħolistiku lill-klijenti. Huwa faħħar is-sehem ta' kull min jidħol għal din il-professjoni u inkoraġġixxa aktar studenti jidħlu għal din il-professjoni.
Stqarrijiet Oħra:
PR261936
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...
PR261935en