STQARRIJA MILL-MINISTERU GĦALL-AFFARIJIET BARRANIN U EWROPEJ U L-KUMMERĊ: Malta u San Marino jiffirmaw ftehim dwar it-tisħiħ tal-konsultazzjonijiet politiċi bejn iż-żewġ pajjiżi
Matul il-jum tat-Tnejn, 11 ta’ Settembru, il-Ministru għall-Affarijiet Barranin u Ewropej u l-Kummerċ Ian Borg laqa’ lill-Ministru għall-Affarijiet Barranin, il-Kooperazzjoni Ekonomika Internazzjonali u Telekomunikazzjoni tar-Repubblika ta' San Marino, Luca Beccari għal-laqgħa bilaterali li saret sabiex ikomplu jissaħħu r-relazzjonijiet bilaterali bejn iż-żewġ pajjiżi fejn ġie ffirmat ftehim dwar it-tisħiħ tal-konsultazzjonijiet politiċi bejn ir-Repubblika ta’ Malta u r-Repubblika ta’ San Marino.
Il-Ministru Ian Borg qal li Malta tilqa’ din l-opportunità sabiex insaħħu r-relazzjonijiet bilaterali tagħna mal-pajjiż ta’ San Marino kif ukoll nassistu bl-għajnuna meħtieġa sabiex il-pajjiż ta’ San Marino jsaħħaħ ir-relazzjoni tiegħu mal-Unjoni Ewropea. Huwa tenna li Malta u San Marino diġà jgawdu minn relazzjonijiet eċċellenti u l-kuntatt u l-iskambji bejn iż-żewġ pajjiżi huma ta’ valur.
Fuq livell Ewropew, il-Ministru Borg qal li integrazzjoni aktar mill-qrib ma’ San Marino hija wkoll fl-interess ta’ Malta u l-Unjoni Ewropea peress li tista’ potenzjalment ittejjeb il-perspettivi għal aktar tkabbir, investiment, innovazzjoni, u impjiegi. Huwa nnota li tliet setturi li jistgħu jibbenefikaw minn dan huma is-settur tal-kultura, tal-edukazzjoni u tal-isports.
Matul il-laqgħa saret ukoll referenza għall-aħħar laqgħa ta’ livell għoli li saret f’Turin fl-20 ta’ Mejju 2022 bejn il-Ministri Ian Borg u Luca Beccari.
Il-Ministru Luca Beccari rringrazzja lill-Ministru Borg tal-ospitalità li rċieva f’pajjiżna u saħaq li dan tal-lum huwa pass ferm importanti fejn pajjiżna jista’ jservi ta’ gwida tajba ħafna sabiex San Marino jsaħħaħ ir-relazzjonijiet tiegħu mal-Unjoni Ewropea.
Matul il-laqgħa ġew diskussi wkoll suġġetti relatati mal-kummerċ, is-siġġu ta’ Malta fil-Kunsill tas-Sigurtà tan-Nazzjonijiet Magħquda kif ukoll il-gwerra fl-Ukrajna.
Stqarrijiet Oħra:
PR261936
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...
PR261935en