STQARRIJA MILL-MINISTERU GĦALL-POLITIKA SOĊJALI U D-DRITTIJIET TAT-TFAL Ħidma kontra l-abbuż ta' servizzi soċjali
Madwar 50% tal-applikazzjonijiet ġodda għall-benefiċċji mhux kontributorji nstab illi l-informazzjoni mogħtija ma kinitx korretta u ġew miċħuda mid-Diviżjoni tal-Għajnuna Finanzjarja u Osservanza fi ħdan id-Dipartiment tas-Sigurtà Soċjali. Dan wara li nstab li dawn il-persuni li applikaw għat-tali servizz kienu jeċċedu l-ammonti stipulati.
F'perjodu ta' 6 snin, bejn is-sena 2016 u s-sena 2022, ġew skrutinizzati madwar 26,850-il applikazzjoni. Dan l-eżerċizzju kontinwu rrenda €10 miljun f'benefiċċji li ma kellhomx jitħallsu mid-dipartiment u li jistgħu jiġu investiti f'każijiet li verament jeħtieġu għajnuna.
Ħabbar dan il-Ministru għall-Politika Soċjali u d-Drittijiet tat-Tfal Michael Falzon waqt konferenza tal-aħbarijiet fejn matulha tkellem f'dettall dwar il-ħidma kontinwa tal-Gvern sabiex jiżgura illi ma jkunx hemm abbuż ta' benefiċċji soċjali.
Fl-2016, il-Gvern nieda l-Business Intelligence Unit, sabiex isir skrutinju fuq il-'means tested benefits' qabel isir il-ħlas tal-benefiċċju. Din id-diviżjoni tħaddan fiha wkoll il-Benefits Compliance Unit, fejn jiġu skrutinizzati każijiet ta' allegat abbuż permezz ta' spezzjonijiet mingħajr avviż u fejn jiġu wkoll prattikati eżerċizzji ta' osservanza (compliance) kontinwa.
Dawn l-eżerċizzji u spezzjonijiet wasslu saħansitra sabiex jitwaqqfu benefiċċji lill-persuni li assolutament ma kienx ħaqqhom ħlasijiet, u fejn permezz ta' hekk ġew frankati u nħolqu 'overpayments' li jlaħħqu l-miljuni ta' ewro.
Fil-fatt fuq medda ta' sentejn, bejn is-sena 2021 u s-sena 2022, kienu frankati kważi mal-għaxar miljun ewro, wara li nstabu irregolaritajiet f'aktar minn elfejn każ.
| Sena | Savings u Overpayments | Każijiet |
| 2012 | €2.8m | 779 |
| 2013 | €3.4m | 838 |
| 2014 | €3.8m | 887 |
| 2015 | €4.2m | 972 |
| 2016 | €4m | 975 |
| 2017 | €4m | 957 |
| 2018 | €4m | 1196 |
| 2019 | €3.9m | 1045 |
| 2020 | €3.9m | 1015 |
| 2021 | €4.9m | 1174 |
| 2022 | €4.9m | 1059 |
“Dan il-Gvern se jkun dejjem hemm biex jinċentiva u jgħin liż-żgħir, iżda qatt mhuwa se jħalli jew jippermetti xi forma ta' abbuż. Ksibna ħafna suċċessi soċjali tul dawn l-aħħar snin, iżda fl-istess waqt ridna naċċertaw trasparenza u kontabilità. Għaldaqstant, kompliet il-ħidma sabiex jiġi aċċertat illi l-ħlasijiet tal-benefiċċji soċjali qegħdin imorru għand min verament għandu bżonn. B'hekk biss tkun qiegħda tiġi pprattikata l-ġustizzja soċjali," temm jgħid il-Ministru Michael Falzon.
Other Press Releases:
PR261936
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...
PR261935en