STQARRIJA MILL-MINISTERU GĦALL-POLITIKA SOĊJALI U D-DRITTIJIET TAT-TFAL Aktar tnaqqis fir-rati ta’ deprivazzjoni materjali u soċjali, inkluż dik severa
Il-Ministeru għall-Politika Soċjali u Drittijiet tat-Tfal jinnota b'sodisfazzjon l-aħħar ċifri ppublikati mill-Uffiċju Nazzjonali tal-Istatistika (NSO) li juru li fl-2022 kien hemm tnaqqis fl-għadd ta' persuni li jħossuhom imċaħħda materjalment u soċjalment, inkluż severament.
Skont l-NSO, minn sena għal oħra, dawn tal-aħħar niżlu bi kważi 2,000 persuna għal 25,370, tnaqqis ta' 0.5%.
Fl-istess waqt ir-rata ta' persuni mċaħħda materjalment u soċjalment naqset b'0.2% għal 49,298.
Dawn ir-rati jirriżultaw minn stħarriġ li jsir kull sena mill-NSO, msejjes fuq skeda ta' indikaturi mfassla mill-Unjoni Ewropea li nbidlet fl-2017 biż-żieda ta' indikaturi soċjali ma' dawk materjali.
Bil-metodoloġija l-ġdida, persuni jiġu kklassifikati bħala severament mċaħħda materjalment u soċjalment jekk jindikaw li ma jaffordjawx seba' minn tlettax il-oġġett jew servizz li huma meqjusa materjalment jew soċjalment meħtieġa. Minn naħa l-oħra, huma kkunsidrati mċaħħda materjalment u soċjalment (mhux severament) jekk iwieġbu li ma jifilħux għal spejjeż fuq ħames oġġetti jew servizzi.
Minkejja l-bidla fil-mod kif isir il-kejl fejn illum sar aktar rigoruż, hemm numru ta' kriterji li huma komuni fiż-żewġ metodoloġiji. Għalhekk meta wieħed iħares lejn il-kriterji ta' deprivazzjoni materjali mill-2013 'l hawn, jista' jinnota titjib sinifikanti kif muri fit-tabella t'hawn isfel. Dan l-aktar fit-tnaqqis ta':
- Familji li ma jaffordjawx vaganza annwali ta' ġimgħa 'il bogħod mid-dar;
- Familji li waqgħu lura fi ħlasijiet fuq self jew kirjiet, kontijiet tad-dawl u l-ilma u pagamenti oħra;
- Familji li ma jaffordjawx ikla b'laħam, tiġieġ, ħut jew ikla ekwivalenti veġetarjana, ġurnata iva u oħra le;
- Familji li ma jaffordjawx iżommu djarhom sħuna fix-xitwa; u
- Familji li ma jaffordjawx spiża mhux mistennija ta' €770 jew aktar.
Meta wieħed jikkunsidra lil dawk imċaħħda materjalment bil-kejl l-antik, mill-2013 sal-2021 dawn naqsu minn 19.9% għal 8.9%, tnaqqis ta' 11 il-punt perċentwali jew aktar minn 37,000 persuna. Dawk imċaħħda materjalment severament naqsu minn 10.2% fl-2013 għal 3.4% fl-2021, tnaqqis ta' 6.8 punti perċentwali jew aktar minn 25,000 persuna.
Dawn iċ-ċifri juru li llum hawn anqas minn nofs tal-persuni mċaħħda materjalment li kien hawn fl-2013. Fl-istess waqt illum hawn biss terz tal-persuni mċaħħda materjalment severament li kien hawn fl-2013.
Dan it-tnaqqis fil-faqar jispikka wkoll fi sfond Ewropew fejn l-istatistika tal-lum tkompli turi li fid-deprivazzjoni materjali u soċjali Malta għamlet progress sinifikanti kif muri fit-tabella t'hawn isfel.
Filwaqt li l-medja Ewropea bejn l-2014 u l-2021 niżlet b'7.8 punti perċentwali għal 11.9%, r-rata Maltija fl-istess perjodu niżlet bi 13.7 punti perċentwali għal 9.8% u fl-2022 niżlet għal 9.6%. Dan il-progress jispikka aktar fit-tnaqqis reġistrat fl-għadd ta' persuni bejn l-2014 u l-2022, minkejja ż-żieda qawwija fil-popolazzjoni.
Dwar din l-istatistika tal-NSO, il-Ministru għall-Politika Soċjali u d-Drittijiet tat-Tfal Michael Falzon stqarr li wieħed irid iqis dawn iċ-ċifri fl-isfond tal-pandemija u l-gwerra fl-Ukrajna.
Huma kompla li din hija konferma oħra tar-resiljenza tas-sistema soċjali li qed tkun ħajt ta' sostenn għal firxa dejjem akbar tal-popolazzjoni. Hija konferma wkoll tal-għaqal tal-gvern li b'mod massiċċ qed jissussidja l-prezzijiet tal-enerġija u taċ-ċereali biex jipproteġi l-pajjiż minn kontijiet ogħla u jrażżan l-inflazzjoni, li b'hekk baqgħet fost l-anqas rati fl-Ewropa.
Il-Ministru Michael Falzon tenna li waqt dawn iċ-ċifri jagħmlulna kuraġġ, fl-istess ħin juru li minkejja l-progress li seħħ għad hemm nies li jeħtieġu l-għajnuna u għalhekk il-ħidma tal-gvern se tkompli biex, b'miżuri u inizjattivi ġodda, tissaħħaħ dejjem aktar x-xibka soċjali ta' pajjiżna u tkompli titrażżan l-inflazzjoni.
| Kriterji ta' Deprivazzjoni Materjali | 2013 Popolazzjoni ca 420,000 | 2022 Popolazzjoni ca 520,000 | Tnaqqis | |||
| % | Numru ta' persuni | % | Numru ta' persuni | % | Numru ta' persuni | |
| Familji ma jaffordjawx spiża mhux mistennija ta' €770 jew aktar | 23.0 | 95,225 | 15.4 | 78,728 | 7.6 | 16,497 |
| Familji ma jaffordjawx vaganza annwali ta' ġimgħa 'il bogħod mid-dar | 55.9 | 231,183 | 33.3 | 170,965 | 22.6 | 60,218 |
| Familji li waqgħu lura fi ħlasijiet fuq self jew kirjiet, kontijiet tad-dawl u l-ilma u pagamenti oħra | 12.5 | 51,842 | 6.1 | 31,317 | 6.4 | 20,525 |
| Familji ma jaffordjawx ikla b'laħam, tiġieġ, ħut jew ikla ewkivalenti veġetarjana, ġurnata iva u oħra le | 15.3 | 63,403 | 7.5 | 38,612 | 7.8 | 24,791 |
| Familji li ma jaffordjawx iżommhom djarhom sħuna fix-xitwa | 23.9 | 99,013 | 7.6 | 38,752 | 16.3 | 60,261 |
| Familji ma jaffordjawx karozza | 3.0 | 12,249 | 1.5 | 7,439 | 1.5 | 4,810 |
| Familji Imċaħħda Materjalment | 19.9 | 82,253 | 8.9* | 45,012* | 11.0 | 37,241 |
| Familji Imċaħħda Materjalment u Severament | 10.2 | 42,210 | 3.4* | 17,098* | 6.8 | 25,112 |
* Ċifri għall-2021
Stqarrijiet Oħra:
PR261936
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...
PR261935en