Left arrow Mur Lura

STQARRIJA MILL-MINISTERU GĦAX-XOGĦLIJIET PUBBLIĊI U L-IPPJANAR Inwettqu Flimkien - Imnedija Konsultazzjoni Pubblika dwar il-Liċenzjar tal-Kuntratturi

pr230384
Date Icon 13/03/2023

Mingħajr liċenzja ħadd mhu se jkun jista' jaħdem fil-kostruzzjoni

Il-Ministru għax-Xogħlijiet Pubbliċi u l-Ippjanar Stefan Zrinzo Azzopardi nieda konsultazzjoni pubblika dwar Avviż Legali li se joffri qafas għal Liċenzjar tal-Kuntratturi. Huwa qal li bid-dħul fis-seħħ ta' dawn ir-regolamenti se ssir distinzjoni ċara bejn kuntratturi serji u responsabbli fil-mod kif jaħdmu u dawk li jridu jaħdmu b'metodi inaċċettabbli, b'nuqqas ta' responsabbiltà u ta' kwalità skadenti.

Il-Ministru Zrinzo Azzopardi saħaq li bid-dħul tar-regolamenti l-ġodda, ix-xogħol irid isir b'rispett sħiħ lejn id-drittijiet ta' terzi persuni u bl-inqas impatt fuq il-madwar u bl-inqas inkonvenjent possibbli. Ix-xogħol irid isir minn min għandu l-ħiliet meħtieġa fil-kostruzzjoni. Il-pajjiż u l-pubbliku qed jistenna li dan is-settur jitħaddem minn min ikun serju fil-mod kif jaħdem, li juża l-aqwa standards u jkun responsabbli ta' kull pass li jagħmel fix-xogħol tiegħu.

Il-Ministru stqarr li din hija l-ewwel darba li ser tkun introdotta Liċenzja għall-Kuntratturi b'qafas ta' regolamenti stabbiliti għal dawk li jridu joperaw fis-settur. Fl-ewwel fażi l-Liċenzji li se jinħarġu huma għal dawk li jwettqu xogħol ta' twaqqigħ, skavar jew tqattigħ u xogħol ta' bini. Il-Ministru żied jgħid li l-bidla li se sseħħ b'din ir-riforma hija waħda radikali li għandha tħalli impatt pożittiv u li twassal għal kwalità ogħla fis-settur tal-kostruzzjoni, jissaħħaħ l-infurzar u tiddaħħal aktar serjetà għall-ġid ta' kulħadd.

Il-Kap Eżekuttiv tal-Awtorità tal-Bini u l-Kostruzzjoni Jesmond Muscat ta dettalji dwar kif qed ikun propost li taħdem is-sistema tal-Liċenzjar tal-Kuntratturi fejn fost affarijiet oħra, kull min jaħdem fis-setturi tat-twaqqigħ, skavar u tqattigħ, jew bini irid bejn l-1 ta' Ġunju u l-31 ta' Ottubru 2023 jagħmel applikazzjoni mal-Awtorità biex tinħariġlu l-Liċenzja.

L-Awtorità, bis-setgħa tal-emendi fil-Liġi, se taħtar il-Kumitat għal-Liċenzji tal-Kuntratturi bis-setgħa li joħroġ il-liċenzji. Wara l-1 ta' Novembru ta' din is-sena, min ma jkunx applika għal-Liċenzja ma jkunx jista' jopera fis-settur. Waqt li jkunu qed jiġu evalwati l-applikazzjonijiet, l-Awtorità ser toħroġ Provisional Clearance jew Liċenzja sħiħa jekk dawk li japplikaw ikunu laħqu l-kriterji mitluba mir-regolamenti. Ingħad ukoll li min japplika wara l-1 ta' Ġunju 2024, irid jistenna l-proċess li tinħariġlu l-Liċenzja biex ikun jista' jaħdem. Imbagħad mill-1 ta' Jannar 2025 dawk il-kuntratturi li ma jkollhomx Liċenzja għal Twaqqigħ, Skavar jew Bini mhux se jkunu jistgħu jaħdmu. L-applikazzjonijiet jistgħu jsiru għal aktar minn liċenzja waħda minn dawk li joperaw f'aktar minn settur wieħed minn dawn it-tlieta.

Fost il-kriterji mitluba hemm dawk li l-applikanti jridu jagħtu prova ta' ħiliet fl-oqsma li għalihom ikunu qed japplikaw u fil-każ tal-bini, l-applikanti jridu jew ikunu Bennejja Liċenzjati huma stess jew ikollhom impjegat b'Liċenzja ta' Bennej. Kriterji oħra importanti huma li l-applikanti jrid ikollhom polza ta' assigurazzjoni li tkopri l-operat tagħhom u f'każ li jimpjegaw in-nies, irid ikollhom employers' liability insurance.

L-Abbozz tal-Avviż Legali jinsab għall-Konsultazzjoni Pubblika li tagħlaq fil-21 ta' April li ġej. Aktar dettalji jistgħu jinkisbu minn https://www.gov.mt/mt/publicconsultation/Pages/default.aspx u https://bca.org.mt/licensing-of-contractors/. Suġġerimenti dwar l-abbozz ta' regolamenti jistgħu jintbagħtu wkoll fuq consultation.construction@gov.mt

STQARRIJA MILL-MINISTERU GĦAX-XOGĦLIJIET PUBBLIĊI U L-IPPJANAR Inwettqu Flimkien - Imnedija Konsultazzjoni Pubblika dwar il-Liċenzjar tal-Kuntratturi
STQARRIJA MILL-MINISTERU GĦAX-XOGĦLIJIET PUBBLIĊI U L-IPPJANAR Inwettqu Flimkien - Imnedija Konsultazzjoni Pubblika dwar il-Liċenzjar tal-Kuntratturi
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra jisħaq fuq il-vulnerabbiltajiet klimatiċi ta’ Malta u r-rwol tal-parlamenti waqt laqgħa parlamentari tal-IPU marbuta mal-COP31 fit-Turkija

PR261942

STQARRIJA MILL-UFFIĊĊJU TAL-ISPEAKER L-Ispeaker tal-Kamra jisħaq fuq il-vu...

Aktar Stqarrijiet Right arrow