STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Investiment ta’ €25 miljun biex jiġi ffurmat irmiġġ kontinwu ġdid tul il-mollijiet ta’ Pinto 4 u 5 u Lascaris Wharf
Il-Ministru għat-Trasport, l-Infrastruttura, u l-Proġetti Kapitali Aaron Farrugia żar ix-xogħlijiet li għaddejjin bħalissa bħala parti minn proġett ta' €25 miljun biex jiġu estiżi l-mollijiet ta' Pinto 4 u 5 u jsir il-bini mill-ġdid tax-xatt ta' Lascaris. Dan l-investiment se jifforma rmiġġ kontinwu ġdid fiż-żewġ żoni.
Dan l-irmiġġ il-ġdid ta' 350 metru tul il-mollijiet ta' Pinto 4 u 5 flimkien max-xatt ta' Lascaris se jintroduċi spazju ta' rmiġġ addizzjonali li bħalissa huwa tant meħtieġ fil-Port il-Kbir. Dan il-proġett se jkun qed itejjeb l-effiċjenza ta' dan il-port filwaqt li lill-awtoritajiet marittimi lokali se jkun qed jipprovdilhom ferm aktar flessibbiltà u disponibbiltà biex jiġu użati mollijiet oħra fl-istess żona.
Waqt iż-żjara, il-Ministru Farrugia tenna kif “dan il-proġett huwa turija ċara ta' kif ix-xogħol li twettaq Infrastructure Malta jmur lil hinn minn ħidma infrastrutturali fuq l-art. Dan il-proġett huwa kruċjali biex inkomplu nagħtu spinta 'l quddiem lill-Port il-Kbir li intant, se joffri wkoll spinta lill-ekonomija lokali hekk kif issa se jkollna l-abbiltà li nilqgħu bastimenti akbar."
Ġie spjegat ukoll li l-estensjoni taż-żona l-ġdida tal-moll se tkun qed issir fuq medda ta' 5,200 metru kwadru. Il-moll se jkollu l-kapaċità li jirmiġġa bastimenti sa tul ta' 320 metru u sa 10 metri fond fil-baħar.
Dan il-proġett ta' €25 miljun jinkludi t-tqegħid ta' pjattaformi ta' 200 metru u t-tiswija ta' strutturi eżistenti. L-aġenzija se tkun qed tipproteġi wkoll il-ħitan tal-baħar eżistenti u dawk ġodda, permezz tat-tqegħid ta' materjal speċjali li se jservi ta' protezzjoni mill-kurrent u l-ħsara mill-ilma baħar. L-aġenzija se tagħmel ukoll tibdiliet fil-wiċċ tal-art biex taċċerta li l-ilma maħmuġ ma jinġabarx, flimkien ma' xogħol ġenerali ieħor ta' pavimentar. Se jsiru wkoll numru ta' faċilitajiet oħra, fosthom l-installazzjoni ta' diversi ċnut biex jiġi limitat l-aċċess fejn mhux suppost, u sistema ġdida ta' dawl permezz tal-installazzjoni ta' arbli ġodda.
Stqarrijiet Oħra:
PR261943
STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...
PR261942en