Left arrow Mur Lura

STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Prosteżi tal-idejn irħas, eħfef u aktar effiċjenti

PR230354
Date Icon 08/03/2023

Ir-riżultati tal-proġett MAProHand flimkien ma' prototip ġew ippreżentati waqt konferenza fl-Esplora, li għaliha attenda s-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti.

Permezz tal-proġett MAProHand (Minimal Anthropomorphic Prosthetic Hand) ġie żviluppat qafas mekkaniku għal id prostetika li tixbaħ l-id umana. Tliet dipartimenti mill-Università ta' Malta kkollaboraw flimkien f'dan il-proġett: id-Dipartiment tal-Inġinerija Mekkanika; id-Dipartiment tas-Sistemi u l-Inġinerija; u d-Dipartiment tal-Intelliġenza Artifiċjali li ssieħbu mal-Orthopaedic Centre Malta Ltd biex jiżviluppaw id prostetika għal skop kummerċjali.

Dan il-proġett irċieva madwar €200,000 f'fondi permezz tal-Programm tal-R & I Fusion, iffinanzjat mill-Kunsill Malti għax-Xjenza u t-Teknoloġija (l-MCST). Minbarra li dan il-proġett ippermetta li tiġi żviluppata din l-id prostetika fi żmien qasir ħafna, ta lok lill-konsorzju li jimpjega riċerkaturi full-time biex iwettqu x-xogħol analitiku li huwa meħtieġ biex twettaq proġett ta' dan it-tip.

Is-Segretarju Parlamentari Keith Azzopardi Tanti laqa' dan il-proġett fejn stqarr li riċerka bħal din li qed issir f'Malta tista' wkoll tħalli impatt kbir f'pajjiżi oħra. “Qed naħdmu biex intejbu r-riċerka li qed issir f'Malta. Il-Gvern diġà joffri diversi opportunitajiet ta' skemi u finanzjament sabiex intejbu r-riċerka lokali u nsaħħu l-kollaborazzjonijiet ma' pajjiżi oħra. Madanakollu, se nkomplu noffru aktar opportunitajiet għall-industrija lokali sabiex twettaq ir-riċerka tagħha u tkabbar l-operat tagħha."

Filwaqt li feraħ lid-dipartimenti fi ħdan l-Università ta' Malta li kienu involuti fil-proġett, is-Segretarju Parlamentari Azzopardi Tanti rringrazzja lill-MCST tar-rwol fundamentali li jħaddan fl-industrija tar-riċerka f'Malta bl-għotjiet mogħtija u l-assistenza professjonali provduta għal proġetti li jistgħu jkunu utli għal ħafna nies.

Iċ-Chairman tal-MCST Dr Tonio Portughese qal, “L-MCST jemmen bis-sħiħ fl-importanza tal-investiment fir-riċerka u l-innovazzjoni bħala wieħed mill-mezzi biex noħolqu u niddiversifikaw l-attività ekonomika, u b'hekk jiġi ġġenerat il-ġid ekonomiku. Il-formazzjoni ta' konsorzji, bħal dak li qed imexxi dan il-proġett, flimkien ma' msieħba oħra li qed jikkontribwixxu għal din il-ħidma kollaborattiva, mhumiex biss utli, iżda essenzjali." Huwa saħaq li meta l-entitajiet pubbliċi jikkollaboraw ma' entitajiet privati, fejn jaqsmu l-għarfien u r-riżorsi bejn iż-żewġ naħat, iwassal sabiex jinkisbu r-riżultati mixtieqa.

Min-naħa tiegħu, il-Prof Michael A. Saliba, li mexxa l-proġett MAProHand qal, “Ninsabu ferm kuntenti bir-riżultati li ksibna, partikolarment li l-id prostetika li fiha numru żgħir ħafna ta' ġogi, jekk jiġu ddisinjati tajjeb, tista' twettaq ħafna mill-funzjonijiet tal-id fl-attivitajiet ta' kuljum."

STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Prosteżi tal-idejn irħas, eħfef u aktar effiċjenti
STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Prosteżi tal-idejn irħas, eħfef u aktar effiċjenti
STQARRIJA MIS-SEGRETARJAT PARLAMENTARI GĦAŻ-ŻGĦAŻAGĦ, IR-RIĊERKA U L-INNOVAZZJONI Prosteżi tal-idejn irħas, eħfef u aktar effiċjenti
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA  Id-Dipartiment tar-Radjoloġija f’San Vinċenz mistenni jaqbeż l-20,000 eżami fl-2026

PR261943

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

Aktar Stqarrijiet Right arrow