STQARRIJA MILL-MINISTERU GĦALL-EKONOMIJA, FONDI EWROPEJ U ARTIJIET Parkeġġ ġdid għar-residenti ta’ Birżebbuġa għas-sajf li ġej
Waħda mill-problemi li jaffaċċjaw ir-residenti ta' Birżebbuġa, b'mod speċjali fis-sajf, hija n-nuqqas ta' parkeġġ. Iżda din il-problema se tkun qiegħda tittaffa, hekk kif ix-xogħol fuq il-parkeġġ il-ġdid ta' 'l fuq minn 400 karozza mill-Freeport miexi ġmielu. Dan qalu l-Ministru għall-Ekonomija, Fondi Ewropej u Artijiet Silvio Schembri waqt li żar ix-xogħlijiet f'dan il-parkeġġ.
Kif jitlesta l-parkeġġ, dan se jgħaddi lill-Kunsill Lokali ta' Birżebbuġa għall-użu tar-residenti. Huwa tenna li dan huwa l-mod pożittiv kif il-Korporazzjoni tgħin lill-komunità ta' Birżebbuġa, f'dan il-każ b'investiment ta' €3.2 miljun.
Dan il-parkeġġ, li mistenni jkun lest sal-bidu ta' dan is-sajf, qed jinbena fuq art ta' 'l fuq minn 5,000 metru kwadru u huwa maqsum fuq tliet sulari, b'żewġ sulari minnhom se jkunu qegħdin jintużaw mir-residenti.
“L-importanza ta' dan il-port għall-ekonomija ta' pajjiżna hija rikonoxxuta minn kulħadd, iżda bħala gvern aħna kommessi li naraw li l-komunità ta' Birżebbuġa tgħix b'mod seren. Il-Korporazzjoni fil-fatt twettaq diversi proġetti ta' corporate social responsibility fil-lokalità, fosthom bl-iskema fil-passat tad-double glazing u għajnuniet lill-għaqdiet sportivi tal-lokal. Dan il-parkeġġ huwa l-akbar proġett ta' Corporate Social Responsibility li se jagħmlu użu minnhu r-residenti ta' Birżebbuġa," qal il-Ministru Silvio Schembri.
Il-Ministru semma kif il-Freeport se tkun qed tinvesti fi proġett ta' shore-to-ship biex b'hekk ikun qed jitnaqqas b'mod drastiku t-tniġġis fl-akwata. Semma wkoll il-proġett tal-isquaring off tal-Freeport, proġett ta' €103.8 miljun li se jwassal biex dan il-port ikun aktar kompetittiv. “Iżda, fl-istess ħin ma nsejniex lir-residenti. Fil-fatt il-Freeport irrinunzja mid-dritt li jinstalla cranes fl-aktar parti viċin in-nies, kif ukoll li attività ta' roll-on roll-off ma tistax issir matul il-lejl u fis-sigħat bikrin ta' filgħodu," temm jgħid il-Ministru Schembri.
Il-Kap Eżekuttiv tal-Freeport David Magro qal li f'dan il-parkeġġ se jkun hemm ukoll spazji għall-persuni bi bżonnijiet speċjali u charging pillars għall-karozzi elettriċi. Huwa rringrazzja wkoll lill-Projects Plus li qed jibnu dan il-parkeġġ.
Stqarrijiet Oħra:
PR261943
STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...
PR261942en