STQARRIJA MILL-MINISTERU GĦAL GĦAWDEX Titnieda t-tieni edizzjoni tal-Gozo Green Energy Expo
Il-Ministru għal Għawdex Clint Camilleri fetaħ it-tieni edizzjoni tal-Gozo Green Energy Expo, inizjattiva ambjentali tas-Soċjetà Filarmonika Leone. Huwa qal li dan l-avveniment għandu importanza reġjonali għaliex se jkun qed jesibixxi f'Għawdex l-aħħar żviluppi għal soluzzjonijiet alternattivi t'enerġija sostenibbli, u huwa relevanti wkoll għaliex Għawdex tiddependi ħafna fuq l-enerġija impurtata.
Din qed tittella' fl-ewwel Ċentru tal-Konferenzi u Esibizzjonijiet f'Għawdex, permezz ta' fondi Ewropej. Din il-faċilità qed tkun mgħammra biex tospita varjetà ta' avvenimenti, minn konferenzi tan-negozju għal wirjiet kulturali u intraprendorjali.
“Ninsab fiduċjuż li Għawdex jista' jsir mexxej f'soluzzjonijiet ta' enerġija sostenibbli, u jikkontribwixxi għall-isforzi ġenerali ta' Malta lejn futur aktar ekoloġiku," tenna l-Ministru Camilleri filwaqt li elenka diversi proġetti importanti li qed jiġu implimentati permezz ta' EkoGħawdex u l-Awtorità għall-Iżvilupp Reġjonali (GRDA).
Il-Ministru semma l-proġett InCircle, li permezz tiegħu nbena ġibjun li jesa 'l fuq minn 500 metru kubu t'ilma li ser jgħin lill-bdiewa fit-tisqija tal-prodotti agrikoli tagħhom lejn in-naħat ta' Santa Luċija. Proġett ieħor huwa dak tal-multi-modal hub f'Ta' Xħajma, li malli jitlesta ser ikun qiegħed joffri servizz ta' Park and Ride b'xejn permezz ta' sitt karozzi tal-linja elettriċi kif ukoll spazju rikreattiv u aħdar għall-komunità Għawdxija, li se jinkludi Smartflowers biex jiġi ġġenerat l-elettriku.
Huwa semma l-proġett BioBlu li permezz tiegħu, EkoGħawdex flimkien mal-Università ta' Malta u l-Università ta' Catania, qegħdin jaħdmu sabiex inaqqsu l-effetti tal-microplastics li jħammġu l-bajjiet u l-ibħra tagħna u li jkollhom effett negattiv fuq il-fawna u l-food chain u dan kollu permezz tal-aħħar teknoloġija.
Il-Ministru Camilleri tkellem ukoll dwar il-proġett MedWet, li għadu kif rebaħ unur mill-Greening the Islands Awards fil-Gran Canaria, li permezz tiegħu qed ssir riċerka dwar l-effiċjenza fl-użu tal-ilma għat-tisqija kif ukoll fuq x'effett l-ilma tan-New Water għandu fit-tkabbir tal-pjanti meta imqabbel mal-ilma tax-xita.
Il-Ministru fakkar kif fuq livell Ewropew, Għawdex intgħażel ukoll bħala wieħed mill-100 belt sabiex isiru Climate-Neutral. Hawnhekk spjega li dan jinvolvi tibdil ta' kif nużaw l-enerġija u wkoll kif nivvjaġġaw minn u lejn Għawdex u f'Għawdex stess.
Huwa tenna li din hi mixja li tirrikjedi ħidma kollettiva. “Il-Gvern għandu rwol x'jaqdi imma hemm ukoll rwol fundamentali ta' kif kull individwu jġib ruħu u d-deċiżjonijiet li jrid jagħmel," kompla jgħid il-Ministru Camilleri.
Il-Ministru faħħar lis-Soċjetà Filarmonika Leone għax-xogħol u d-dedikazzjoni tagħhom sabiex itellgħu dan l-avveniment. “Inħeġġeġ lil kulħadd biex jieħu vantaġġ minn din l-opportunità biex jitgħallem aktar dwar soluzzjonijiet ta' enerġija sostenibbli sabiex flimkien inkomplu naħdmu lejn futur aktar ekoloġiku u sostenibbli għal Għawdex, bħala gżira reġjun," temm jgħid il-Ministru Camilleri.
Stqarrijiet Oħra:
PR261943
STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...
PR261942en