STQARRIJA MILL-MINISTERU GĦALL-EDUKAZZJONI, L-ISPORT, IŻ-ŻGĦAŻAGĦ, IR-RIĊERKA U L-INNOVAZZJONI Il-Junior College b’qabża fil-kwalità fis-servizzi għall-istudenti tagħha
Fil-Kulleġġ Ġan Franġisk Abela ġie inawgurat it-tisbiħ u r-rinnovar ta' żewġ sulari f'binja, li huma kompletament dedikati għal servizzi li jinsabu għad-dispożizzjoni tal-istudenti u li jmorru lil hinn mill-kurrikulu tal-kulleġġ. Iż-żewġ sulari jiġbru fihom servizzi ta' gwida, appoġġ, pariri kif ukoll servizzi amministrattivi, l-uffiċċju tas-saħħa u sigurtà, l-uffiċċju internazzjonali, l-uffiċċju taċ-Chaplin, spazji għall-edukazzjoni fi gruppi żgħar u spazji fejn isiru attivitajiet u laqgħat.
“Illum mhux biss qed naraw rinnovar komplet u tisbiħ f'dawn iż-żewġ sulari, imma aktar importanti, qed naraw investiment dirett fl-istudent", qal il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima waqt l-inawgurazzjoni.
“Il-Kulleġġ Ġan Franġisk Abela llum il-ġurnata huwa istituzzjoni edukattiva li qed toffri edukazzjoni tal-aqwa kwalità, imma qed tagħti wkoll servizzi anċillari li huma tant importanti għall-istudenti biex jgħinuhom kemm waqt il-ħajja edukattiva fuq il-kampus, imma wkoll bħala gwida f'dak kollu li jkollhom bżonn, kemm fuq bażi personali, u għal dak li jeħtieġu għall-futur tagħhom", qal il-Ministru Grima.
Is-servizzi kollha mogħtija huma mmexxija minn professjonisti u minn edukaturi li għandhom esperjenza vasta warajhom, u għalhekk għandhom id-determinazzjoni kif ukoll il-kapaċità li jiggwidaw lill-istudenti f'dak li jkunu jeħtieġu.
Il-Prinċipal tal-Kulleġġ, Paul Xuereb, spjega li fiż-żminijiet tal-lum kien meħtieġ li jingħata aspett iktar modern u effiċjenti ta' dawn is-servizzi, f'bini rinnovat, biex jilħqu l-bżonnijiet ta' dawk kollha li jkunu jridu jagħmlu użu minnhom. “Dan huwa pass kbir 'il quddiem, għaliex issa dawn is-servizzi se jibdew jingħataw f'ambjent aktar adattat u li jirrispetta l-ħtiġijiet tal-lum", qal Paul Xuereb.
Il-Ministru Grima rringrazzja lill-edukaturi kollha ta' dan il-kulleġġ tal-impenn tagħhom fis-sistema edukattiva u lill-ħaddiema kollha li wettqu x-xogħol li ġie inawgurat.
L-inawgurazzjoni saret lejlet Open Day tal-kulleġġ li matulha l-istudenti prospettivi qed ikunu mistiedna jattendu biex jieħdu l-informazzjoni kollha tal-post edukattiv prospettiv tagħhom.
“Din hija ġurnata oħra li fiċ-ċentru tagħha hemm l-istudent. Huwa wkoll pass importanti għal dawk l-istudenti kollha li minn livell sekondarju se jagħmlu l-pass li jmiss. Għalhekk inħeġġeġ lil dawn l-istudenti prospettivi biex jieħdu l-okkażjoni, jiġu fil-Kampus tal-Junior College, fejn se jsibu l-għajnuna kollha meħtieġa biex tiggwidahom għat-tkomplija tal-istudji tagħhom", temm jgħid il-Ministru Grima.
Stqarrijiet Oħra:
PR261943
STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...
PR261942en