Left arrow Mur Lura

STQARRIJA MILL-MINISTERU GĦALL-AMBJENT, L-ENERĠIJA U L-INTRAPRIŻA Solar farm ġdid f’Ta’ Qali jiġġenera enerġija nadifa għal 365 dar

pr230305
Date Icon 28/02/2023

Investiment ambjentali ieħor lejn Malta dekarbonizzata

Solar farm ġdid fuq il-ġibjuni tal-Korporazzjoni għas-Servizzi tal-Ilma f'Ta' Qali qed jiġġenera enerġija nadifa għal 365 residenza.

Il-Ministru għall-Ambjent, l-Enerġija u l-Intrapriża Miriam Dalli żaret dan l-investiment ambjentali ta' €1.6 miljun, b'kollaborazzjoni bejn il-Korporazzjoni għas-Servizzi tal-Ilma u Malta Developers Association.

Is-solar farm ġie installat fuq medda ta' 6,319 metru kwadru fuq is-saqaf ta' wieħed mill-akbar ġibjuni li għandha l-Korporazzjoni. L-installazzjoni tinkludi 2,198 pannella fotovoltajika, b'kapaċità totali ta' megawatt (1 MW). B'hekk, qed tiġġenera l-elettriku mill-enerġija solari u tnaqqas mal-296,000 kilo ta' tniġġis tal-karbonju fis-sena.

Il-Ministru Miriam Dalli spjegat li permezz tal-kollaborazzjoni mal-Malta Developers Association, il-Korporazzjoni qed tittrasforma l-ispazji fuq il-bjut tal-ġibjuni tagħha, li kienu ilhom vakanti għal ħafna snin, f'opportunità ta' investiment ambjentali, sabiex ittejjeb is-sostenibbiltà tal-operat tagħha, filwaqt li tikkontribwixxi biex Malta tilħaq il-miri ambjentali dwar il-klima.

“Proġetti bħal dawn jirriflettu l-viżjoni tal-gvern li nkomplu ninċentivaw l-investiment privat fl-enerġija rinnovabbli f'Malta u Għawdex, bħala parti mill-pjan ambjentali għan-newtralità fil-klima sal-2050. Filwaqt li qed inkomplu niżguraw prezzijiet tal-enerġija stabbli għall-familji u għan-negozji minkejja l-pressjonijiet internazzjonali, jeħtieġ inkomplu wkoll ninkoraġġixxu aktar investiment fl-enerġija rinnovabbli," spjegat il-ministru.

Hija fakkret li aktar kmieni dan ix-xahar tnediet it-tieni skema għal enerġija nadifa f'inqas minn sena, biex jgħinu n-negozji jinvestu f'installazzjonijiet ta' enerġija rinnovabbli bħal dan il-proġett. Hija kompliet li permezz ta' dawn iż-żewġ skemi biss, allokaw mal-€104 miljun f'għajnuna mill-gvern lejn is-settur privat fl-20 sena li ġejjin.

Is-solar farm f'Ta' Qali jagħmel parti mill-pjan tal-Korporazzjoni għas-Servizzi tal-Ilma biex gradwalment tiddekarbonizza l-operat tagħha. Il-Korporazzjoni diġà għandha installazzjonijiet ta' pannelli fotovoltajiċi simili fil-Qrendi, fiż-żona tal-Fiddien fir-Rabat, u f'Ta' Ċenċ, Għawdex. Flimkien ma' dak ġdid f'Ta' Qali, dawn is-solar farms jammontaw għal kapaċità totali ta' 4.83 megawatt peak, li jfisser li qed jiġġeneraw biżżejjed enerġija nadifa għal 1,760 dar u mat-3,100,000 kilo ta' emissjonijiet inqas fis-sena.

Il-Kap Eżekuttiv tal-Korporazzjoni għas-Servizzi tal-Ilma, Karl Cilia qal, “Il-Korporazzjoni qed tieħu r-responsabbiltajiet ambjentali tagħha b'serjetà kbira. Qed inħabbru solar farm ieħor fuq il-ġibjuni tal-Korporazzjoni, mhux biss biex innaqqsu l-impatt tal-emissjonijiet tal-karbonju, iżda wkoll biex nipprovdu enerġija nadifa lill-komunità. Dawn is-solar farms huma xhieda tal-impenn tagħna lejn is-sostenibbiltà u pass ieħor 'il quddiem lejn il-mira li nkunu entità li ma jkollhiex impatti fuq l-ambjent."

Il-President u s-Segretarju tal-Malta Developers Association Michael Stivala u Alfred Camilleri, flimkien mal-Kap tat-Taqsima tal-Enerġija Rinnovabbli tal-istess assoċjazzjoni Mario Cachia, ħadu sehem fl-attività ukoll, fejn taw aktar tagħrif dwar din l-installazzjoni tal-enerġija rinnovabbli ġdida f'Ta' Qali.

STQARRIJA MILL-MINISTERU GĦALL-AMBJENT, L-ENERĠIJA U L-INTRAPRIŻA Solar farm ġdid f’Ta’ Qali jiġġenera enerġija nadifa għal 365 dar
STQARRIJA MILL-MINISTERU GĦALL-AMBJENT, L-ENERĠIJA U L-INTRAPRIŻA Solar farm ġdid f’Ta’ Qali jiġġenera enerġija nadifa għal 365 dar
STQARRIJA MILL-MINISTERU GĦALL-AMBJENT, L-ENERĠIJA U L-INTRAPRIŻA Solar farm ġdid f’Ta’ Qali jiġġenera enerġija nadifa għal 365 dar
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA  Id-Dipartiment tar-Radjoloġija f’San Vinċenz mistenni jaqbeż l-20,000 eżami fl-2026

PR261943

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

Aktar Stqarrijiet Right arrow