STQARRIJA MIS-SEGREARJAT PARLAMENTARI GĦAD-DJALOGU SOĊJALI L-MCESD jiddiskuti l-viżjoni tal-gvern lejn trasport pubbliku iktar effiċjenti kif ukoll il-ġlieda kontra l-vizzju tad-droga
Waqt il-laqgħa tal-Kunsill Malti għall-Iżvilupp Ekonomiku u Soċjali (MCESD), l-imsieħba soċjali flimkien mas-Segretarju Parlamentari għad-Djalogu Soċjali Andy Ellul, il-Ministru għat-Trasport, l-Infrastruttura u l-Proġetti Kapitali Aaron Farrugia, kif ukoll l-Ministru għall-Politika Soċjali u d-Drittijiet tat-Tfal Michael Falzon iddiskutew żewġ suġġetti kurrenti; l-isfida tat-traffiku f’pajjiżna u kif it-trasport pubbliku jista’ jsir iktar effiċjenti u alternattiva reali, kif ukoll il-ġlieda kontra l-vizzju tad-droga.
Fl-ewwel parti tal-laqgħa fejn ġie diskuss il-pjan tal-gvern biex tiġi indirizzata l-isfida tat-traffiku, l-Ministru Aaron Farrugia qal li biex in-nies jibdew jiddependu inqas fuq il-karozza u jagħmlu l-pass biex jibdew jużaw it-trasport pubbliku li issa hu bla ħlas, jeħtieġu servizz effiċjenti, frekwenti u fil-ħin, possibbilment b’rotot ġodda. Bl-istess mod qed iħarsu lejn servizzi offruti mill-gvern u l-istituzzjonijiet tiegħu kif ukoll dawk offruti mill-privat biex jiġi rivedut f’liema ħinijiet jingħataw servizzi fit-toroq ta’ pajjiżna waqt il-peak hours.
Huwa spjega li l-Ministeru għat-Trasport flimkien mal-esperti għaddej b’laqgħat bit-titlu “Deċiżjoni b’direzzjoni: djalogu dwar trasport u mobbilità” immexxija mill-akkademiku Prof. Gordon Sammut li mistennija jħallu l-frott hekk kif il-gvern miexi b’ritmu mgħaġġel lejn il-bidliet li hemm bżonn isiru filwaqt li jkunu nvoluti l-partijiet interessati kollha.
Għat tieni parti tal-laqgħa li fiha ġiet diskussa il-ġlieda kontra l-vizzju tad-droga, il-Ministru Michael Falzon sostna li kommessi li jkomplu jkunu ta’ spalla għal min għaddej minn ċertu problemi marbuta mal-vizzji, fejn l-ewwel pass huwa li jifhmu x’qed iwassal lil persuna taqbad ċertu stil ta’ ħajja, filwaqt li jaraw x’inhuma dawk il-fatturi li qed iħallu impatt fuq l-imġieba ta’ dik il-persuna.
“Ejja nkomplu nagħtu importanza kbira lill-edukazzjoni u l-għarfien sa’ minn etajiet żgħar, dwar il-konsegwenzi marbuta mal-vizzji. Fl-aħħar snin komplejna nsaħħu l-għarfien permezz ta’ diversi programmi ta’ prevenzjoni fl-iskejjel bħal S.A.F.E, Teen Outside the Box u S.T.O.P, sabiex nibgħatu messaġġ b’saħħtu kontra l-vizzji”, tenna l-Ministru Falzon.
Waqt il-laqgħa saru wkoll diversi preżentazzjonijiet fosthom mill-pulizija u l-Professur Saviour Formosa mid-Dipartiment tal-Kriminoloġija. Il-Professur Formosa stqarr li minkejja ż-żieda fil-popolazzjoni, naqset il-kriminalità u fost l-oħrajn juri li fl-2004 saru 45 reat għal kull 1,000 persuna, filwaqt li s-sena l-oħra kien hemm 28 reat għal kull 1,000 persuna.
Preżenti għal-laqgħa kien hemm ukoll kelliem min-naħa tal-Ministeru għall-Intern u s-Sigurtà Nazzjonali. Huwa qal li dan ir-rapport juri titjib fi sferi varji tas-soċjetà tant li f’pajjiżna naqset ir-rata’ ta’ kriminalità. Huwa rrefera wkoll għall-ħidma tal-pulizija kontra t-traffikar tad-droga u semma kif fl-aħħar snin il-pulizija investiet b’mod b’saħħtu fir-riżorsi tagħha, tant li s-sena li għaddiet mill-pulizija ġew maqbuda kważi 3000kg ta’ droga kokaina, flimkien ma’ ‘l fuq minn miljun ewro fi flus kontanti u oġġetti oħra ta’ valur ogħla.
Min-naħa tiegħu, s-Segretarju Parlamentari Andy Ellul saħaq fuq il-bżonn li l-imsieħba soċjali flimkien mal-gvern ikomplu jiddiskutu dawn it-temi li jaffettwaw il-ħajja ta’ kuljum. “Permezz ta’ dawn il-laqgħat nistgħu inkomplu ntejbu il-kwalità tal-ħajja tal-Maltin u l-Għawdxin”, tenna s-segretarju parlamentari.
Rigward t-trasport pubbliku, s-Segretarju Parlamentari nnota kif f’dawn l-aħħar snin sar ħafna investiment f’dan il-qasam. Huwa rrimarka kif il-ħidma mill-Ministeru tat-Trasport u l-MCESD għandha tkompli tissaħħaħ sabiex tkompli tibni fuq ix-xogħol tajjeb li diġà sar. Huwa żied jgħid li l-impenn tal-gvern lejn miżuri sostenibbli fil-qasam tat-trasport juri biċ-ċar ir-rieda tal-gvern sabiex dan s-settur ikompli dejjem jitjieb. Fuq il-ġlieda kontra l-vizzju tad-droga, s-Segretarju Parlamentari Andy Ellul sellem lill-partijiet ikkonċernati, u filwaqt li rringrazzjahom tal-ħidma tagħhom, saħaq li l-MCESD dejjem lest jiddiskuti r-rakkomandazzjonijiet tagħhom.
Stqarrijiet Oħra:
PR261943
STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...
PR261942en