STQARRIJA MILL-MINISTERU GĦALL-INTERN, IS-SIGURTÀ, IR-RIFORMI U L-UGWALJANZA Fl-2022 ġiet reġistrata l-inqas rata ta’ kriminalità fi 15-il sena - tnaqqis ta’ 5.4% meta mqabbel mal-2021
Waqt konferenza tal-aħbarijiet ġie ppreżentat rapport indipendenti tal-Kriminologu Saviour Formosa li jinnota li fl-2022, pajjiżna rreġistra l-inqas rata ta' kriminalità fi 15-il sena. Fil-fatt, fl-2022 ġie nnotat tnaqqis ta' 5.4% fir-rata ta' kriminalità meta mqabbel mas-sena ta' qabel, l-2021.
Il-preżentazzjoni ta' dan ir-rapport saret fil-preżenza tal-Ministru għall-Intern, is-Sigurtà, ir-Riformi u l-Ugwaljanza Byron Camilleri u tal-Kummissarju tal-Pulizija Angelo Gafà, fil-Kwartieri Ġenerali tal-Pulizija.
Mir-rapport joħroġ li s-sena li għaddiet saru 28 reat kriminali għal kull 1,000 persuna f'pajjiżna. Dan juri tnaqqis drastiku meta mqabbel mas-sena 2012 fejn matul dik is-sena kienu rreġistrati 37 reat kriminali għal kull 1,000 persuna. Fl-2004, kienu ġew reġistrati 45 reat kriminali għal kull 1,000 persuna f'pajjiżna.
Ir-rapport jinnota fost oħrajn li r-rata ta' omiċidji baqgħet stabbli bejn l-2004 u l-2022, filwaqt li sar tnaqqis fir-reati ta' vjolenza u ta' serq. Fil-fatt, reati ta' serq is-sena l-oħra naqsu b'aktar min-nofs meta mqabbel mal-2004 u anke mal-2012.
Fl-istess rapport tal-Professur Formosa ġiet innotata żieda fir-rapporti ta' każijiet marbuta ma' vjolenza domestika hekk kif fl-aħħar 14-il sena, il-każijiet irrappurtati żdiedu b'iżjed minn erba' darbiet, konferma li aktar persuni qed jersqu 'l quddiem biex jirrappurtaw każijiet marbuta ma' vjolenza domestika.
Ir-rapport indipendenti jinnota li ma kinitx esperjenzata abnormalità fir-reati kriminali f'xi lokalità jew oħra, iżda kull lokalità qiegħda fl-istess livelli ta' reati esperjenzati.
B'reazzjoni għal dawn ir-riżultati, il-Ministru Byron Camilleri qal li l-mod differenti li qed jaħdem il-Korp tal-Pulizija billi fost l-oħrajn żdiedet il-preżenza tal-pulizija fil-lokalitajiet, qed tħalli l-frott mixtieq. Il-ministru tenna li fil-fatt, il-pulizija qed ikunu iżjed fil-qalba tal-komunitajiet Maltin u Għawdxin biex b'hekk qed tiżdied is-sigurtà fil-lokalitajiet.
“L-obbligu tagħna hu li nieħdu d-deċiżjonijiet ibbażati fuq il-fatti u r-realtajiet ta' pajjiżna, bħalma hi r-riċerka mħabbra llum mill-Professur Formosa. Iżda bħala gvern l-impenn tagħna hu li nibqgħu nagħtu l-għodda possibbli lill-Korp tal-Pulizija u lill-entitajiet kollha tas-sigurtà sabiex dawn ir-riżultati miksuba nibqgħu nibnu fuqhom," temm jgħid il-Ministru Camilleri.
Il-Kummissarju Angelo Gafà rringrazzja lill-membri kollha tal-korp. Sostna li bl-impenn ta' kull membru tal-korp, matul is-sena 2022 il-Korp tal-Pulizija wettaq kisbiet tant pożittivi billi mhux biss naqqas ir-rata ta' kriminalità b'aktar minn 5% imma fl-istess waqt kompla jkabbar il-fiduċja tal-poplu Malti u Għawdxi. “Dan kollu ċertament li jimliena b'kuraġġ sabiex ġurnata wara l-oħra nkomplu nipprovdu servizz professjonali u fdat għal pajjiż aktar sigur bi sħubija mal-komunità", temm jgħid il-kummissarju.
Stqarrijiet Oħra:
PR261943
STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...
PR261942en