Left arrow Go Back

​ STQARRIJA MILL-MINISTERU GĦALL-INKLUŻJONI, IL-KWALITÀ TAL-ĦAJJA U L-VOLONTARJAT Imħabbar il-Ġirasol Community Hub, għal persuni b’diżabilità, b’investiment ta’ kważi nofs miljun ewro fuq ħames snin

pr220278
Date Icon 28/02/2022

Is-servizz ta’ community hub fit-Tramuntana ta’ Malta għal persuni b’diżabilità, li kien tħabbar fil-budget għal din is-sena, se jsir f’Tal-Virtù, ir-Rabat, hekk kif ġie identifikat il-Ġirasol Community Hub li qed isir b’investiment ta’ kważi nofs miljun ewro fuq medda ta’ ħames snin.

Dan tħabbar f’konferenza tal-aħbarijiet mill-Ministru għall-Inklużjoni, il-Kwalità tal-Ħajja u l-Volontarjat Julia Farrugia Portelli, li spjegat li l-objettiv numru 10 tal-Istrateġija Nazzjonali għall-Persuni b’Diżabilità, li jistabbilixxi li fejn hu possibbli l-persuni b’diżabilità għandhom jgħixu bl-aktar mod indipendenti fil-komunitajiet tagħna.

Il-Ministru Julia Farrugia Portelli spjegat li sal-aħħar ta’ din is-sena, il-Ġirasol Community Hub se jservi bħala l-ewwel community hub f’Malta fejn persuni b’diżabilità jistgħu jirċievu taħriġ speċjalizzat fuq aspetti diversi li għandhom x’jaqsmu mal-għajxien indipendenti.

Il-binja tinsab lesta u fadal biss xogħlijiet li permezz tagħhom dan il-post se jsir aktar aċċessibbli u adekwat għal persuni b’diżabilità li se jkunu qed jibbenefikaw minn dan is-servizz, inklużi dawk b’diffikultajiet ta’ mobilità. Diġà ġew sottomessi l-pjanti tal-post lill-Awtorità tal-Ippjanar bil-proposti ta’ kif irid jitranġa skont l-esiġenzi tas-servizz. 

Fl-istess waqt, għaddejjin ukoll preparamenti biex fost l-oħrajn tinxtara l-għamara ħalli l-post ikun mgħammar u attrezzat bil-faċilitajiet kollha li hemm bżonn skont il-ħtiġijiet tas-servizz u tal-persuni b’diżabilità. 

Dan il-proġett se jgħin lil Aġenzija Sapport biex twassal programmi ta’ għajxien indipendenti lill-persuni b’diżabilità li jagħmlu użu mis-servizzi fil-komunità, speċjalment dawk li minħabba raġunijiet partikolari, ma jkunx possibbli li jirċievu dawn il-programmi f’darhom.

Minn dan il-proġett mistenni li jibbenefikaw mal-40 persuna b’diżabilità li se jingħataw iċ-ċans li jakkwistaw ħiliet ġodda u jkunu jistgħu jgħixu ħajja indipendenti fil-komunitajiet fejn trabbew. 

Il-Kap Eżekuttiv ta’ Aġenzija Sapport, Ruth Sciberras, irreferiet għal dan il-proġett bħala mudell li se jagħti kunċett ġdid fil-qasam tal-provediment tas-servizzi bbażati fil-komunità lil persuni b’diżabilità f’Malta. 

“Dan l-investiment mhux biss se jsir fil-binja minn fejn se nkunu qed inwasslu dan it-taħriġ dwar għajxien indipendenti, iżda wkoll se jkun investiment fil-persuni nfushom għax permezz ta’ dawn is-sessjonijiet f’dan l-ambjent aċċessibbli u modern, dawn se jkunu qed jitgħallmu ħiliet ġodda li permezz tagħhom se jkunu jistgħu jgħixu b’mod inklussiv fil-komunità”.

Is-Segretarju Permanenti Matthew Vella qal li importanti li dejjem inpoġġu lill-persuna fiċ-ċentru tal-ħidma li ssir ħalli tkun tista’ tisfrutta l-potenzjal tagħha u tilħaq l-aspirazzjonijiet u l-ħolm tagħha. Hu faħħar il-ħidma ta’ Aġenzija Sapport fl-implimentazzjoni b’mod konkret tal-Istrateġija Nazzjonali għall-Persuni b’Diżabilità u qal li permezz ta’ dan il-hub, il-persuni b’diżabilità se jkunu jistgħu jkomplu jgħixu fil-komunitajiet rispettivi tagħhom filwaqt li jkunu indipendenti. 

Is-Sindku tar-Rabat Sandro Craus faħħar il-ħidma li qed issir minn Aġenzija Sapport u min-naħa tal-gvern biex jitwettqu proġetti bħal dawn li huma vera inklussivi, filwaqt li qal li l-Kunsill Lokali tar-Rabat se jara li jkun ta’ eżempju għal lokalitajiet oħra fejn għandha x’taqsam l-inklużjoni u fit-tħaddim ta’ din il-politika tal-gvern fil-livell tal-lokalità.

​ STQARRIJA MILL-MINISTERU GĦALL-INKLUŻJONI, IL-KWALITÀ TAL-ĦAJJA U L-VOLONTARJAT Imħabbar il-Ġirasol Community Hub, għal persuni b’diżabilità, b’investiment ta’ kważi nofs miljun ewro fuq ħames snin
​ STQARRIJA MILL-MINISTERU GĦALL-INKLUŻJONI, IL-KWALITÀ TAL-ĦAJJA U L-VOLONTARJAT Imħabbar il-Ġirasol Community Hub, għal persuni b’diżabilità, b’investiment ta’ kważi nofs miljun ewro fuq ħames snin
​ STQARRIJA MILL-MINISTERU GĦALL-INKLUŻJONI, IL-KWALITÀ TAL-ĦAJJA U L-VOLONTARJAT Imħabbar il-Ġirasol Community Hub, għal persuni b’diżabilità, b’investiment ta’ kważi nofs miljun ewro fuq ħames snin
​ STQARRIJA MILL-MINISTERU GĦALL-INKLUŻJONI, IL-KWALITÀ TAL-ĦAJJA U L-VOLONTARJAT Imħabbar il-Ġirasol Community Hub, għal persuni b’diżabilità, b’investiment ta’ kważi nofs miljun ewro fuq ħames snin
Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow