Left arrow Mur Lura

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA U MIS-SEGRETARJAT PARLAMENTARI GĦAĊ-ĊITTADINANZA U KOMUNITAJIET Investiment ta’ €1.6 miljuni għal Ċentru tas-Saħħa kompletament rinovat fil-Gżira

pr220261
Date Icon 24/02/2022

Id-Deputat Prim Ministru u Ministru għas-Saħħa Chris Fearne, flimkien mas-Segretarju Parlamentari għaċ-Ċittadinanza u Kommunitajiet Alex Muscat fetħu mill-ġdid iċ-Ċentru tas-Saħħa tal-Gżira li għal dawn l-aħħar xhur kien magħluq biex fih setgħu isiru xogħolijiet strutturali u ta' rinovazzjoni.  L-investiment f'dan iċ-ċentru tas-saħħa kien ta' €1.6 miljuni, fondi NDSF li jinkludi wkoll magna tal-X-ray ġdida u l-installazzjoni ta' lift.

Iċ-Ċentru tas-Saħħa tal-Gżira jilqa' għall-ħtiġijiet primaji tas-saħħa ta' 95,000 persuna li joqogħdu l-Gżira, Msida, Ta' Xbiex, Kappara, Sliema, Ibragg, San Ġiljan, Pembroke, Swieqi u San Ġwann. F'dan iċ-ċentru se jkunu offruti diversi servizzi, fosthom dak tat-tabib u infermiera, teħid tad-demm, kura tas-saqajn, klinika għad-dijabete, klinika għall-kura tal-għajnejn u klinika għas-saħħa mentali fost oħrajn. Se jkunu qegħdin jiddaħħlu servizzi kompletament ġodda għaċ-Ċentru tas-Saħħa tal-Gżira, il-well baby clinic, postnatal clinic u servizzi ta' fiżjoterapija.

Id-Deputat Prim Ministru rringrazzja lill-ħaddiema tal-FMS u Primary Healthcare li b'ħidma konġunta bejniethom kien possibli li dan ċ-Ċentru tas-Saħħa jerġa' jiftaħ il-bibien tiegħu b'dehra kompletament ġdida u b'numru ferm ikbar ta' servizzi mogħtija. “Nibqgħu kommessi biex inżidu aktar servizzi fil-komunità qrib in-nies, u dan mhux biss billi nsebbħu u nimmodernizza ċ-Ċentri tas-Saħħa eżistenti, iżda wkoll billi naraw li jkollna berġa f'kull belt jew raħal. Diġà ftaħna 15 minn dawn il-bereġ, b'dik ta' Marsaskala, Tarxien, Ta' Giorni u Ħamrun jinsabu fi stadju avvanzat," qal id-Deputat Prim Ministru.

Is-Segretarju Parlamentari għaċ-Ċittadinanza u l-Komunitajiet Alex Muscat qal li ċ-Ċentru tas-saħħa tal-Ġżira huwa parti minn kullana ta' investimenti biex inwasslu servizzi ta' saħħa fil-qalba tal-belt jew raħal u huwa wieħed minn 15-il Ċentru tas-Saħħa li ġew miftuħa madwar Malta u Għawdex, b'investiment ta' €1.6 miljun. “Dan mhux l-unika investiment li qed nagħmlu fis-saħħa. Qed ninvestu wkoll fil-kunċett ta' urban greening. Nafu kemm spazji ħodor miftuħa jgħinu kemm is-saħħa fiżika kif ukoll dik mentali. L-investiment li qed inħabbru llum huwa turija ċara oħra ta' kif qed noħolqu ġid li qed jasal fil-komunità", stqarr is-Segretarju Parlamentari Muscat.

Imħabbra iżjed dati ta' rilaxx tal-miżuri restrittivi

Waqt l-istess konferenza tal-aħbarijiet, id-Deputat Prim Ministru saħaq li s-sitwazzjoni fl-isptarijiet u fil-komunità hija taħt kontroll, u li dan huwa riżultat dirett t'iktar minn miljun u mitejn elf doża tal-vaċċin ta' kontra l-COVID-19 li ngħatat mill-bidu tal-pandemija. Fil-fatt, id-Deputat Prim Ministru Fearne rrimarka li Malta għandha l-ogħla rata t'adulti mlaqqma bil-booster, b'80%, u li din ir-rata se tippermetti r-rilaxx t'iżjed miżuri restrittivi.

Hu ħabbar li mit-Tnejn 7 ta' Marzu 2022, kuntatti primarji ta' persuni pożittivi mhumiex se jkunu obbligati jagħmlu kwarantina jekk ikunu fil-pussess ta' ċertifikat validu tal-vaċċin, filwaqt li l-kwarantina mandatorja tal-persuna pożittiva u tal-persuni li jgħixu fl-istess residenza se tinżel għal 7 ijiem, kemm-il darba dawn il-persuni jkunu fil-pussess ta' ċertifikat validu tal-vaċċin u jagħmlu test li jirriżulta fin-negattiv.

Id-Deputat Prim Ministru ħabbar ukoll li mis-7 ta' Marzu 2022 wkoll se titneħħa l-kwarantina mandatorja ta' kuntatti sekondarji li mhumiex ivvaċċinati, filwaqt li l-kwarantina ta' kuntatti primarji li mhumiex ivvaċċinati se tinżel għal 5 ijiem b' test negattiv fl-aħħar jum. Hu ta l-eżempju ta' tfal li għandhom inqas minn 5 snin u li għalhekk ma jistgħux jitlaqqmu, li jkunu meħtieġa jagħmlu kwarantina minħabba każ pożittiv fil-klassi, u li mis-7 ta' Marzu l-perjodu ta' kwarantina se jonqos għal 5 ijiem.

Il-kwarantina marbuta mal-ivjaġġar minn pajjiżi tal-lista l-ħamra skura, mis-7 ta' Marzu 2022, se tonqos għal 7 ijiem b' test negattiv fl-aħħar jum. Fuq rakkomandazzjoni tal-Unjoni Ewropea, mis-7 ta' Marzu wkoll, Malta se tibda tirrikonoxxi l-vaċċini approvati mill-World Health Organization (WHO) anke jekk mhumiex approvati mill-EMA, bħat-tilqima tad-ditta Sinopharm u Covishield. Dan sakemm iċ-ċertifikat ikun rikonoxxut mis-Supretendent għas-Saħħa Pubblika u jiġi ppreżentat PCR test negattiv mal-wasla f' pajjiżna.

Dwar il-ħinijiet tal-ftuħ tar-ristoranti u barijiet, id-Deputat Prim Ministru ħabbar li mis-7 ta' Marzu dawn jistgħu jmorru lura għall-ħin tal-għeluq kif permess mil-liċenżja tal-istabbiliment.

Id-Deputat Prim Ministru fakkar kif mill-14 ta' Marzu 2022 se jitneħħa l-obbligu tal-użu tal-maskra fuq barra u stqarr li qed tkun analizzata l-użu tal-maskri fuq ġewwa. Huwa qal li jekk is-sitwazzjoni tibqa' stabbli, wara l-vaganzi tal-Għid, hemm il-possibilità li jitneħħa l-obbligu tal-użu tal-maskri fl-iskejjel.

Dwar avvenimenti organizzati bil-wieqfa, id-Deputat Prim Minsitru sostna li min-nhar Tnejn 11 t' April 2022, se jkunu permessi attivitajiet bilwieqfa. Fil-każ t'attivitajiet fil-miftuħ mhuwiex se jkun obbligatorju li jiġi ppreżentat iċ-ċertifikat tal-vaċċin, filwaqt li għal attivitajiet fuq ġewwa ċ-ċertifikat tal-vaċċin se jkun mandatorju. Din il-miżura se tapplika ukoll għat-tiġijiet, li mill-1 t'April se jkunu permessi li jsiru bilwieqfa sa massimu ta' 300 persuna.

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA U MIS-SEGRETARJAT PARLAMENTARI GĦAĊ-ĊITTADINANZA U KOMUNITAJIET Investiment ta’ €1.6 miljuni għal Ċentru tas-Saħħa kompletament rinovat fil-Gżira
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA U MIS-SEGRETARJAT PARLAMENTARI GĦAĊ-ĊITTADINANZA U KOMUNITAJIET Investiment ta’ €1.6 miljuni għal Ċentru tas-Saħħa kompletament rinovat fil-Gżira
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA U MIS-SEGRETARJAT PARLAMENTARI GĦAĊ-ĊITTADINANZA U KOMUNITAJIET Investiment ta’ €1.6 miljuni għal Ċentru tas-Saħħa kompletament rinovat fil-Gżira
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow