STQARRIJA MILL-MINISTERU GĦALL-EKONOMIJA U L-INDUSTRIJA Ftehim bejn l-Awtorità tal-Artijiet u l-Kunsill Lokali tar-Rabat dwar trasferiment ta’ proprjetà pubblika, se jwitti t-triq għal day car centre fir-Rabat
Bi ftehim bejn l-Awtorità tal-Artijiet u l-Kunsill Lokali tar-Rabat, twittiet it-triq biex għall-ewwel darba, ir-residenti Rabtin ikollhom day care centre, ħabbar il-Ministru għall-Ekonomija u l-Industrija Silvio Schembri. Il-ministru ppresieda dan il-ftehim filwaqt li pprovda dettalji ta' skema li l-Kunsill Lokali tar-Rabat ibbenefika minnha, u li permezz tagħha, issa jista' jitwettaq il-proġett.
“Permezz tal-iskema ta' allokazzjoni ta' proprjetà pubblika magħrufa bħala devoluzzjoni, se jingħaddu tliet garaxxijiet mill-awtorità għal għand il-kunsill lokali biex ikunu mibdula f'day care centre, bil-possibbiltà li jiżdied garaxx ieħor, hekk kif jinsabu fi stadju avvanzat id-diskussjonijiet dwar dan. Dan it-trasferiment se jiskatta l-proġett tal-Kunsill Lokali tar-Rabat li ilu tant mixtieq mir-Rabtin," spjega l-Ministru Schembri.
Il-ministru pprovda dettalji dwar kif kunsilli lokali madwar Malta u Għawdex raw li jibbenefikaw minn din l-iskema għall-benefiċċju tal-komunitajiet li jirrappreżentaw. Fil-fatt, sa tmiem is-sena li għaddiet, l-Awtorità tal-Artijiet irċeviet 40 applikazzjoni minn kunsilli lokali.Minn dawn l-40 applikazzjoni, 30 ġew konklużi sal-aħħar tas-sena li għaddiet. Kien hemm 24 applikazzjoni konkluża u approvata, u fuq 80% minnhom saħansitra sar ukoll il-ftehim ta' trasferiment bejn l-Awtorità tal-Artijiet u l-kunsill lokali rispettiv.
“Iżjed minn hekk, kien hemm sitwazzjoni ta' backlog fil-proċess ta' tiġdid ta' kuntratti ta' devoluzzjoni bejn L-awtorità u l-kunsilli lokali li kienu ngħaddew snin ilu u ngħataw il-ġenb. Matul is-sena li għaddiet ukoll, din is-sitwazzjoni ta' backlog ġiet indirizzata b'suċċess. Għalhekk bil-fatti, u iżjed minn qabel, qed naraw Awtorità tal-Artijiet viċin in-nies, b'ħidma effettiva li tasal għand in-nies, kif qed taraw fil-każ tal-(lum). Dan il-ftehim se jwitti t-triq għal day care centre. Dan se jsir b'investiment ta' €350,000 u iżjed minn hekk bħala residenti se tkunu qed tgawdu minn riġenerazzjoni tant mixtieqa minnkom ir-residenti ta' din iż-żona fir-Rabat," qal il-Ministru Schembri.
Il-binja ġdida se jkollha sala kbira mgħammra bil-faċilitajiet kollha li jippermettu biex isiru diversi attivitajiet matul il-jum.
Is-Sindku tar-Rabat Sandro Craus qal li bil-pass tal-lum se tibda l-ħolma li tant xtaqu r-residenti Rabtin, tant li għal bosta snin in-nuqqas ta' day care centre kien qed iwassal biex bosta anzjani jkollhom imorru f'irħula oħra biex jattendu attivitajiet ta' matul il-jum.
“Dan il-ftehim li tant ilna naħdmu fuqu ser iwassal biex din iż-żona terġa' tingħata lura l-ħajja. Dan is-sit ilu mitluq għal diversi snin u għalhekk il-Kunsill Lokali tar-Rabat ħass li għandu jiddiskuti mal-gvern biex jgħaddi din il-proprjetà lill-kunsill tar-Rabat, biex b'hekk inkunu nistgħu nwettqu proġett komunitarju. L-għan ta' dan il-proġett hu li nersqu aktar viċin ir-residenti ħalli nkunu ta' servizz lejn din iż-żona tar-Rabat magħrufa bħala tan-Nigret. Nixtieq nirringrazzja lill-Ministru Silvio Schembri li wara li spjegajnielu dan il-proġett, mill-ewwel ħa interess u (llum) wasalna għal dan il-ftehim li jtejjeb ħidmet il-kunsill tar-Rabat u ħajjet ir-residenti," ikkonkluda s-Sur Craus.
Stqarrijiet Oħra:
PR261950en
PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...
PR261950