Left arrow Mur Lura

STQARRIJA MILL-UFFIĊĊJU TAD-DEPUTAT PRIM MINISTRU U MINISTRU GĦAS-SAĦĦA: Rifużjoni tal-ispejjeż tal-mediċini tal-IVF

pr220221
Date Icon 17/02/2022

Madwar 1,000 persuna fis-sena li tagħmel użu mill-IVF se tgawdi mill-mediċini b’xejn li se jiddaħħlu fuq il-formularju tal-gvern, u sakemm dawn il-mediċini jkunu daħlu kollha se tkun qed tingħata rifużjoni lil persuni li ġew bżonnhom mill-1 ta’ Jannar ta’ din is-sena ’l quddiem.

Dan ħabbru d-Deputat Prim Ministru u Ministru għas-Saħħa Chris Fearne waqt konferenza tal-aħbarijiet. Id-Deputat Prim Ministru qal li s-servizzi li għandhom x’jaqsmu mal-IVF fl-Isptar Mater Dei huma kollha bla ħlas, fosthom il-konsulenzi, l-ultrasounds, il-proċess tal-embrijoloġija, il-counselling waqt u wara t-trattament,  il-pick-ups, u l-embryo transfers. Il-Ministru Fearne spjega li fi kliniċi privati dan il-proċess jiġi jiswa madwar €15,000, filwaqt li fil-każ ta’ gamete donation, li wara l-bdil tal-liġi din tista’ ssir u qed issir f’pajjiżna wkoll, l-ispiża titla’ għal madwar €20,000 għal ċiklu wieħed. Ma’ dawn, issa se jiżdiedu l-mediċini li jiswew minn €500 sa €3,000 u aktar għal kull ċiklu ta’ IVF.

“Bdejna l-proċess ta’ procurement, li jimxi ma’ regoli lokali u Ewropej, però peress li dan il-proċess jieħu fit-tul, mill-1 ta’ Jannar 2022 u sakemm ikunu fuq il-formularju tal-gvern, se nkunu qegħdin ngħinu lil persuni li jużawhom b’mod finanzjarju. Dan ikompli jagħmel kuraġġ lil dawk il-persuni li jixtiequ jkollhom it-tfal,” qal id-Deputat Prim Ministru. “Kburi ngħid li mill-2014, meta bdejna noffru s-servizz tal-IVF mill-isptar Mater Dei, sal-lum twieldu 252 tarbija, filwaqt li 24 mara għadha fil-proċess li qed tistenna tarbija,” qal id-Deputat Prim Ministru. 

Il-Ministru Fearne fakkar kif is-sena li għaddiet ir-rata ta’ suċċess, it-‘take home baby rate’, tal-IVF f’pajjiżna kienet ta’ 21.5%, rata li tħabbatha sew ma’ ta’ ċentri oħra barra minn Malta. Id-Deputat Prim Ministru qal li din is-sena fl-ART clinic f’Mater Dei qed jerġa’ jinqabad ir-ritmu ta’ qabel il-pandemija u aktar minn hekk huwa mistenni li jibda jsir l-irkupru taċ-ċikli li ma sarux minħabba l-pandemija.

It-Tabib Ewlieni tal-Gvern Walter Busuttil spjega li l-formoli tar-rifużjoni tal-mediċini jistgħu jinkisbu mill-ART Clinic tal-Isptar Mater Dei, fejn se tingħata l-għajnuna neċessarja biex jinkisbu dawn ir-rifużjonijiet. 

Imħabbra iżjed stadji ta’ rilassament tal-miżuri tal-COVID-19

“Għandna biżżejjed immunità fil-komunità biex għal din ix-xitwa jidher li mhux se jkun hemm bżonn ir-raba’ doża tal-vaċċin tal-COVID-19,” stqarr id-Deputat Prim Ministru Chris Fearne waqt l-istess konferenza tal-aħbarijiet. Huwa fakkar li l-awtoritajiet tas-saħħa Maltin qegħdin janaliżżaw is-sitwazzjoni wara kull stadju ta’ rilassament tal-miżuri sabiex ikunu evitati żidiet tal-każijiet fil-komunità u fl-isptarijiet. 

Id-Deputat Prim Ministru stqarr li peress li ma kienx hemm żieda fil-każijiet minkejja r-rilassament tal-miżuri li saru sa issa, se jkun possibbli li jkompli jonqos il-perjodu ta’ kwarantina obbligatorja. Huwa fakkar li, kif diġà ġie mħabbar fil-ġimgħat li għaddew, min-nhar it-Tnejn, 21 ta’ Frar 2022, kuntatti primarji ta’ persuni pożittivi, li ma jgħixux fl-istess residenza tal-persuna pożittiva, u li huma fil-pussess ta’ ċertifikat tal-vaċċin validu, jistgħu jtemmu l-kwarantina obbligatorja wara ħamest ijiem jekk isir test li jirriżulta fin-negattiv. Il-Ministru Fearne ħabbar li mis-7 ta’ Marzu 2022, din l-istess kwarantina mhux se tibqa’ obbligatorja. Dan filwaqt li mis-7 ta’ Marzu 2022 ukoll, persuni pożittivi għall-COVID-19, li jkunu fil-pussess ta’ ċertifikat tal-vaċċin validu, jistgħu jtemmu l-kwarantina mandatorja wara sebat ijiem jekk jagħmlu test li jirriżulta negattiv. F’każ li t-test jirriżulta pożittiv, il-kwarantina mandatorja tibqa’ dik ta’ 10 ijiem. 

Dwar kwarantina ta’ persuni li jkunu ġejjin minn pajjiż fil-lista l-ħamra skura u li jkollhom ċertifikat tal-vaċċin validu u rikonoxxut mill-awtoritajiet tas-saħħa Maltin, mis-7 ta’ Marzu 2022, il-kwarantina obbligatorja se tonqos għal sebat ijiem, kemm-il darba jsir test li jirriżulta fin-negattiv. 

Mill-14 ta’ Marzu 2022, l-użu tal-maskri f’postijiet pubbliċi aperti mhux se jibqa’ obbligatorju. Il-maskri jibqgħu obbligatorji biss għal postijiet pubbliċi fuq ġewwa u waqt avvenimenti tal-massa jew organizzati. 

Il-Ministru Fearne ħabbar ukoll li wara arranġamenti li saru mal-kamra mortwarja, b’mod immedjat il-funerali ta’ persuni li jkunu pożittivi għall-COVID-19 jistgħu jsiru fi żmien 48 siegħa minflok sa 24 siegħa. Huwa spjega kif għaddejjin diskussjonijiet mal-istakeholders Maltin u mal-awtoritajiet tas-saħħa barranin sabiex l-oqbra fejn ikunu midfuna persuni pożittivi għall-COVID-19 jew persuni li mietu b’mard infettiv ieħor, ikunu jistgħu jinfetħu wara 5 snin minflok wara 10 snin. 

Il-Ministru Fearne ħeġġeġ lil min għadu ma tlaqqamx sabiex jagħmel dan permezz tal-walk-in clinics fl-Università ta’ Malta, fil-POYC ta’ Raħal Ġdid, fil-Berġa ta’ Kerċem f’Għawdex jew permezz ta’ appuntament fuq vaccin.gov.mt.

STQARRIJA MILL-UFFIĊĊJU TAD-DEPUTAT PRIM MINISTRU U MINISTRU GĦAS-SAĦĦA: Rifużjoni tal-ispejjeż tal-mediċini tal-IVF
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow