Left arrow Mur Lura

STQARRIJA MIS-SEGRETARJAT PARLAMENTARI GĦAĊ-ĊITTADINANZA U L-KOMUNITAJIET: Identità Malta b’aktar servizzi fil-komunità

pr220202
Date Icon 14/02/2022

Żieda fl-attività online: 60% taċ-ċertifikati ordnati saru online

L-Aġenzija Identità Malta aktar ma jmur, aktar qed toffri servizzi li jmorru lil hinn mill-uffiċċji tagħha u twassalhom fil-kumdità tad-djar tan-nies. Minkejja li fl-aħħar snin l-uffiċini ta’ Identità Malta mxew għal binjiet aktar moderni, l-aġenzija żiedet l-għażla ta’ servizzi offruti online u żiedet il-preżenza tagħha fil-komunitajiet. 

Permezz ta’ kollaborazzjoni ma’ servizz.gov, klijenti li ma jistgħux jagħmlu ordni ta’ ċertifikati online, jistgħu jinqdew billi jirrikorru f’wieħed mit-22 ċentru reġjonali ta’ servizz.gov mxerrda madwar Malta.    

Il-Kap Eżekuttiv tal-Aġenzija Identità Malta, il-Kurunell Mark Mallia, spjega li l-aġenzija tagħraf kemm huwa importanti li l-pubbliku jinqeda bl-aktar mod effiċjenti. Illum, wieħed jista’ jinqeda online, minn wieħed mill-uffiċini tal-aġenzija, jew inkella minn wieħed miċ-ċentri ta’ servizz.gov. 

Il-Kurunell Mallia fakkar li tista’ tinnotifika t-twelid jew il-mewt ta’ persuna online jew saħansitra tordna ċertifikat tat-twelid, mewt jew żwieġ online u tagħżel li jasal għandek bil-posta. Innota li r-rispons għas-servizzi mogħtija online kien wieħed pożittiv, tant li 60% taċ-ċertifikati ordnati s-sena l-oħra, jiġifieri madwar 40,000 ċertifikat, saru online permezz tas-sit ċertifikati.gov.mt.

Minkejja dan, Identità Malta hija konxja li hemm persuni li m’għandhomx l-għarfien jew l-aċċess diġitali, jew inkella jippreferu li jinqdew wiċċ imb’wiċċ. Għaldaqstant min jixtieq jordna ċertifikat tat-twelid, mewt jew żwieġ jista’ jżur l-uffiċċju l-ġdid tar-Reġistru Pubbliku fil-Marsa jew iżur wieħed mit-22 ċentru ta’ servizz.gov, mifruxin madwar Malta. 

Permezz tal-kollaborazzjoni bejn Identità Malta u servizz.gov, is-sena l-oħra nqdew 8,400 persuna minn dawn iċ-ċentri u mas-600 persuna oħra x-xahar li għadda waħdu. 

Ir-Reġistru Pubbliku ta’ Malta nnota wkoll żieda fin-notifikazzjonijiet li saru fil-fergħa ta’ Mater Dei. Matul is-sena li għaddiet, 90% (3,750) tat-twelid u 62% (2,304) tal-imwiet f’Malta ġew notifikati f’dan l-uffiċċju. 

Il-Kap Eżekuttiv ta’ servizz.gov Massimo Vella faħħar il-kollaborazzjoni bejn iż-żewġ entitajiet, u tenna li l-għan aħħari dejjem jibqa’ li aktar servizzi jitwasslu għand il-pubbliku bl-aktar mod effiċjenti.

Is-Segretarju Parlamentari responsabbli miċ-Ċittadinanza u l-Komunitajiet, Alex Muscat, kien preżenti waqt żjara li saret fl-uffiċċji ta’ Identità Malta fil-Marsa. “Flimkien ma’ servizz.gov qed nilħqu aktar nies fil-lokalitajiet u niffrankawlhom l-iskariġġ li jmorru barra mil-lokalità tagħhom biex jinqdew. Fix-xhur li ġejjin l-aġenzija se tkompli tibni fuq dawn il-kollaborazzjonijiet biex inkomplu niżguraw li l-aħjar servizz jingħata bl-inqas skariġġ possibbli”, ikkonkluda s-segretarju parlamentari. 

STQARRIJA MIS-SEGRETARJAT PARLAMENTARI GĦAĊ-ĊITTADINANZA U L-KOMUNITAJIET: Identità Malta b’aktar servizzi fil-komunità
STQARRIJA MIS-SEGRETARJAT PARLAMENTARI GĦAĊ-ĊITTADINANZA U L-KOMUNITAJIET: Identità Malta b’aktar servizzi fil-komunità
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow