Left arrow Mur Lura

STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Aktar kisbiet fis-settur marittimu

pr220201
Date Icon 14/02/2022

Investiment ta’ €6.5 miljun għal sistema diġitali fil-qasam marittimu f’pajjiżna

Fl-aħħar disa’ snin, ir-Reġistru Malti kważi rdoppja t-tunellaġġ reġistrat, ħabbar il-Ministru għat-Trasport, l-Infrastruttura u l-Proġetti Kapitali Ian Borg waqt konferenza tal-aħbarijiet fil-Mużew Marittimu, il-Birgu.

Il-Ministru Ian Borg semma li fl-2012 kien hemm ftit aktar minn 45 miljun tunellata reġistrata u sal-aħħar tal-2020 dawn telgħu għal aktar minn 86 miljun tunellata. Qal li sal-aħħar tas-sena 2021, in-numru ta’ bastimenti reġistrati taħt l-Att dwar il-Bastimenti Merkantili, kien ta’ kważi 9,300 bastiment li bħala tunellaġġ jammontaw għal aktar minn 86.1 miljun. Dan ifisser żieda ta’ 2.2% fuq Diċembru tas-sena 2020. 

“Minn din l-attività biss, l-awtorità Transport Malta ġġenerat €24 miljun matul is-sena li għaddiet. Dan ifisser żieda ta’ aktar min 82% fuq l-2012 li jfisser ukoll li ftit aktar minn 6% tal-flotta tal-bastimenti merkantili mondjali hija reġistrata taħt il-bandiera Maltija. Qed naraw li nkomplu nwasslu ’l quddiem dan is-settur mhux biss f’termini ta’ reġistru, li sal-lum pajjiżna kiseb riżultati pożittivi ħafna, iżda anke f’dik li hi teknoloġija. Aħna nemmnu bi sħiħ fil-potenzjal li għandha t-teknoloġija u l-bibien li kapaċi tiftaħ sabiex inkomplu nwasslu lil pajjiżna fil-quċċata u nibqgħu leaders f’diversi oqsma marittimi. Il-qasam marittimu jibqa’ parti integrali tal-ekonomija Maltija u kien għalhekk li l-gvern għażel li jadotta u jimplimenta diversi miżuri biex inkomplu niġġeneraw ammont sostanzjali ta’ investiment anċillari, introjtu sostanzjali f’munita barranija kif ukoll ħolqien ta’ diversi impjiegi ġodda. Il-gvern, b’mod speċjali l-ministeru tiegħi, huwa kommess li jkompli jibni din il-ħolqa ta’ suċċess għall-ġid komuni tal-poplu Malti u Għawdxi”.

Il-ministru ħabbar li Malta ser tibbenefika minn investiment ta’ €6.5 miljun biex tiġi implimentata sistema diġitali fil-qasam marittimu. Huwa qal li ġurnata bħal tal-lum tkompli turi li pajjiżna għandu fama internazzjonali bħala reġistru ta’ kwalità, ta’ reputazzjoni u ta’ kunfidenza.

Id-Direttorat tal-Bastimenti Merkantili diġà implimenta l-ewwel proġett diġitali li ser jiddiġitalizza l-proċess tal-applikazzjonijiet ta’ aktar minn 100,000 baħri b’mod elettroniku, li ser jirriżulta f’aktar effiċjenza fl-ipproċessar ta’ dawn l-applikazzjonijiet.

L-awtorità Transport Malta qiegħda wkoll tirregola l-korsijiet marittimi organizzati mill-istituti marittimi kemm f’Malta kif ukoll barra minn xtutna fejn għall-ewwel darba fl-aħħar xhur, l-awtorità, fi djalogu mal-industrija, żviluppat u approvat numru ta’ korsijiet għall-ekwipaġġ li jaħdem fuq jottijiet lussużi.

Fir-rigward ta’ superyachts, sal-aħħar tal-2021 kellna kważi elf jott taħt il-bandiera Maltija. Din hija żieda ta’ 16% fuq Diċembru tas-sena 2020. 

Il-bandiera Maltija żammet postha bħala l-akbar reġistru merkantili fl-Ewropa u s-sitta fid-dinja. Ir-reġistru kkwalifika mal-aqwa 20 f’dik li hija l-lista l-bajda tal-Paris MOU fejn pajjiżna ġie klassifikat fis-17-il post. 

STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Aktar kisbiet fis-settur marittimu
STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Aktar kisbiet fis-settur marittimu
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow