Left arrow Go Back

STQARRIJA MILL-MINISTERU GĦALL-INKLUŻJONI, IL-KWALITÀ TAL-ĦAJJA U L-VOLONTARJAT: Aġenzija Sapport tingħata Marka ta’ Kwalità għas-servizz tagħha Sharing Lives

pr220165
Date Icon 06/02/2022

Aġenzija Sapport irċeviet il-Marka ta’ Kwalità mill-Aġenzija tal-Programmi tal-Unjoni Ewropea għall-Korp Ewropew ta’ Solidarjetà għas-servizz tagħha Sharing Lives, servizz li permezz tiegħu l-Aġenzija takkomoda u tiffaċilita opportunitajiet ta’ volontarjat. 

Il-Korp Ewropew ta’ Solidarjetà mmexxi mill-Kummissjoni Ewropea hu inizjattiva li permezz tagħha, żgħażagħ minn pajjiżi differenti jkunu jistgħu jipparteċipaw f’esperjenzi soċjali u ta’ solidarjetà kemm f’pajjiżhom kif ukoll f’pajjiżi oħra. 

Permezz ta’ din il-Marka ta’ Kwalità, Aġenzija Sapport issa se jkollha aċċess għal sistema fejn tista’ tippromwovi l-opportunitajiet tagħha ma’ dawn iż-żgħażagħ, u għalhekk iżżid iċ-ċans li tattira parteċipanti minn diversi pajjiżi sabiex jagħmlu esperjenza f’Malta ma’ Aġenzija Sapport, speċjalment mas-servizz Sharing Lives. Li tingħata din il-Marka ta’ Kwalità jfisser li Aġenzija Sapport tkun għaddiet mill-proċess ta’ applikazzjoni u assessjar sabiex ikun assigurat li bħala entità, l-Aġenzija għandha struttura ta’ servizzi ta’ kwalità u li diġà qed taħdem lejn l-inklużjoni ta’ persuni b’diżabilità fis-soċjetà. Din il-Marka ta’ Kwalità ngħatat lill-Aġenzija wkoll fuq kriterji oħra, inkluż is-sistema b’saħħitha ta’ taħriġ u superviżjoni disponibbli kemm għall-impjegati kif ukoll għall-voluntiera, il-kontribut dirett li l-voluntiera għandhom fl-implimentazzjoni tas-servizz, l-esperjenza li l-Aġenzija għandha fit-tmexxija ta’ proġetti tal-Unjoni Ewropea, l-għanijiet ċari u strutturati tal-Aġenzija u struttura ta’ riżorsi u mmaniġġjar f’saħħithom li jassiguraw servizzi sostenibbli. 

Din il-Marka ta’ Kwalità hi valida għat-tliet snin li ġejjin u li matulhom, Aġenzija Sapport ser tkun kommessa li twassal numru ta’ attivitajiet kull sena u li tinvolvi numru ta’ parteċipanti mill-Korp Ewropew ta’ Solidarjetà. 

Aġenzija Sapport ser tkun tista’ wkoll tapplika għal ko-finanzjament minn programmi oħra tal-Unjoni Ewropea relatati ma’ proġetti soċjali oħra u tifforma kollaborazzjonijiet ġodda ma’ entitajiet oħra fuq livell internazzjonali.

L-għan ta’ Sharing Lives hu li joħloq opportunitajiet fejn voluntiera u persuni b’diżabilità jaqsmu esperjenzi flimkien, u joħloq kuntatt soċjali speċjalment għal dawk il-persuni b’diżabilità fejn is-sapport hu limitat jew mhux eżistenti. Voluntiera jorganizzaw attivitajiet soċjali u jiżviluppaw ħbiberija ma’ persuni b’diżabilità, ikabbru ċ-ċirku ta’ sapport lil persuni b’diżabilità, u tiżdied l-aċċessibilità għal attivitajiet kulturali u ta’ divertiment fil-komunità. Persuni b’diżabilità jattendu dawn l-attivitajiet soċjali u jibnu ħbiberija kemm ma’ persuni oħra b’diżabilità kif ukoll mal-voluntiera u flimkien jaqsmu esperjenzi.

Il-Ministru għall-Inklużjoni, il-Kwalità tal-Ħajja u l-Volontarjat Julia Farrugia Portelli wriet is-sodisfazzjon tagħha għal dan ir-rikonoxximent li ngħata lil Aġenzija Sapport, filwaqt li rringrazzjat lill-ħaddiema kollha tax-xogħol u d-dedikazzjoni kollha li juru ta’ kuljum mal-persuni b’diżabilità. Il-Ministru saħqet li din il-marka ta’ kwalità trid isservi ta’ motivazzjoni biex inkomplu naħdmu flimkien biex noffru servizzi li jkunu ta’ kwalità u li joffru kwalità ta’ ħajja aħjar lil dawk li l-aktar li huma fil-bżonn.  

Għal aktar informazzjoni dwar Sharing Lives u servizzi oħra ta’ Aġenzija Sapport, wieħed jista’ jżur is-sit tal-Aġenzija, www.sapport.gov.mt, u jsegwi l-midja soċjali. Aktar dettalji jinkisbu wkoll mill-Helpline tal-Aġenzija – Freephone 153 (u tagħfas 5) jew permezz ta’ email fuq sharinglives.sapport@gov.mt.

Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow